തൃപ്പൂണിത്തുറ: ട്രൂറ ദക്ഷിണ - മധ്യമേഖല കമ്മിറ്റികളുടെ ആഭിമുഖ്യത്തിൽ നടത്തിയ പ്രതിഷേധ ധർണ ചെയർമാൻ വി.പി.പ്രസാദ് ഉദ്ഘാടനം ചെയ്തു. തൃപ്പൂണിത്തുറയിലെ വികസന പ്രവർത്തനങ്ങൾ അട്ടിമറിക്കുന്നതിനെതിരേ സമരം ശക്തമാക്കുമെന്ന് അദ്ദേഹം പറഞ്ഞു.
മധ്യമേഖലാ പ്രസിഡന്‍റ് എം. രവി അധ്യക്ഷത വഹിച്ചു. എം.സന്തോഷ് കുമാർ, സി.എസ്. മോഹനൻ, വി.സി. ജയേന്ദ്രൻ, പി.എസ്. ഇന്ദിര, സേതുമാധവൻ മൂലേടത്ത്, ജെയിംസ് അത്താണിക്കൽ തുടങ്ങിയവർ പ്രസംഗിച്ചു.
എസ്എൻ ജംഗ്ഷൻ-പൂത്തോട്ട റോഡിന്‍റെ വികസനം ത്വരിതപ്പെടുത്തുക, കോണോത്തു പുഴയുടെ പുനരുജ്ജീവന നടപടികൾ ഉടനാരംഭിക്കുക, നിർമാണം പൂർത്തിയാക്കി അടച്ച് പൂട്ടിയിട്ടിരിക്കുന്ന മാളുകൾ, ആയുർവേദ ഗവേഷണ കേന്ദ്രം തുടങ്ങിയവ തുറന്നു പ്രവർത്തിപ്പിക്കുക, മെട്രോ റെയിലിനോടൊപ്പം ഹിൽപാലസ് റോഡ് വരെ 22 മീറ്റർ വീതിയിൽ റോഡ് നിർമിക്കുക, ബസ് ടെർമിനൽ യാഥാർഥ്യമാക്കുവാൻ നടപടി സ്വീകരിക്കുക, സീപോർട്ട് എയർപോർട്ട് റോഡ് നിർമാണം പുതിയകാവ് വരെ നീട്ടുക തുടങ്ങിയ ആവശ്യങ്ങളുന്നയിച്ചായിരുന്നു സമരം.