മൂവാറ്റുപുഴ: മൂവാറ്റുപുഴ-തൊടുപുഴ റോഡിൽ നിർമല സെന്റർ കെട്ടിടത്തിൽ കൂടുകൂട്ടിയ വൻതേനീച്ചകൾ പരിഭ്രാന്തി പരത്തി. നിർമല സെന്റർ വ്യാപാര സമുച്ചയത്തിലെ വ്യാപാര സ്ഥാപനത്തിൽ ഇന്നലെ ഉച്ചയോടെയാണ് വൻ തേനീച്ച കൂട്ടമായെത്തി കൂടുകൂട്ടിയത്. വ്യാപാര സ്ഥാപനത്തിലെ ഷട്ടറിനു മുകളിൽ തേനീച്ച കൂടുകൂട്ടിയതോടെ സ്ഥാപനങ്ങളിലെ ജീവനക്കാർ ആശങ്കയിലാകുകയായിരുന്നു. തുടർന്ന് മൂവാറ്റുപുഴ പോലീസിലും അഗ്നിരക്ഷാസേനയിലും വിവരം അറിയിച്ചു. ഇവർ സ്ഥലത്തെത്തിയെങ്കിലും ഇവയെ തുരത്താൻ കഴിഞ്ഞില്ല. ഒടുവിൽ രാത്രിയോടെ തേനീച്ചകളെ തീയിട്ടു തുരത്തുകയായിരുന്നു.