പൊൻകുന്നം: ചിറക്കടവ് മഹാദേവക്ഷേത്രത്തിലും ചെങ്ങന്നൂർ മഹാദേവക്ഷേത്രത്തിലും ഇന്ന് രാവിലെ 7.42ന് ഒരേസമയം നെയ്യാട്ട് (നെയ്യഭിഷേകം) നടത്തുന്നതിന്റെ ഭാഗമായി ചെങ്ങന്നൂരിലേക്ക് ചിറക്കടവിൽനിന്ന് ഘോഷയാത്ര നടത്തി.
ചിറക്കടവ് മഹാദേവക്ഷേത്രത്തിൽ ഭക്തർ സമർപ്പിക്കുന്ന നെയ്യിൽ ഒരുവിഹിതം ചെങ്ങന്നൂർ ക്ഷേത്രത്തിലെത്തിച്ച് നെയ്യഭിഷേകം നടത്തുന്ന ആചാരഭാഗമായാണ് ഇന്നലെ വൈകുന്നേരം ചടങ്ങ് നടത്തിയത്.
മേൽശാന്തി പെരുന്നാട്ടില്ലം മനോജ് നമ്പൂതിരി വഴിപാടുസാധനങ്ങളും നെയ്യും സബ് ഗ്രൂപ്പ് ഓഫീസർ എൻ.ഡി. യദുകൃഷ്ണനും മഹാദേവ സേവാസംഘം ഭാരവാഹികൾക്കും കൈമാറി. ചിറക്കടവ് ക്ഷേത്രത്തിൽ ഭക്തർ സമർപ്പിച്ച നെയ്യിൽനിന്നുള്ള വിഹിതവും വാഴൂർ തീർഥപാദാശ്രമത്തിൽ നിന്ന് എത്തിച്ച നെയ്യും, ഓരോ പറ അവൽ, മലർ, ശർക്കര, ഉണക്കലരി, കദളിക്കുല, ദേവീദേവന്മാർക്കുള്ള ഉടയാടകൾ എന്നിവയും ചെങ്ങന്നൂർ ക്ഷേത്രത്തിൽ സമർപ്പിച്ചു. ഇന്ന് രാവിലെ രണ്ടുക്ഷേത്രത്തിലും നെയ്യഭിഷേകം നടത്തും.