തലശേരി: ജില്ലാ സ്കൂൾ കായികമേളയിലെ മീറ്റ് റിക്കാര്‍ഡിനു പിന്നാലെ തലശേരി സായി സെന്‍ററിലെ ഇവാന ടോമി നാളെ ഭുവനേശ്വറിൽ നടക്കുന്ന നാഷണല്‍ അത്‌ലറ്റിക് ചാന്പ്യന്‍ഷിപ്പില്‍ മത്സരിക്കും. ഇന്നലെ ജൂണിയര്‍ ഗേള്‍സ് 100 മീറ്റർ 12: 63 സെക്കന്‍ഡിൽ പൂർത്തിയാക്കിയാണ് ഇവാന റിക്കാർഡിട്ടത്. നേരത്തെയുള്ള ഇ.കെ.തേജലക്ഷ്മിയുടെ 12.66 സെക്കന്‍ഡിന്‍റെ റിക്കാർഡാണ് മറികടന്നത്.
ഭുവനേശ്വറിൽ നടക്കുന്ന ചാന്പ്യന്‍ഷിപ്പില്‍ 600 മീറ്റര്‍ മിഡ് റിലേയിലാണ് ഇവാന മത്സരിക്കുന്നത്. നേരത്തെ നാഷനല്‍ സ്‌കൂള്‍ ഗെയിംസില്‍ 4x100 റിലേയിൽ വെങ്കലവും സംസ്ഥാന സ്കൂൾ മീറ്റിൽ 100 മീറ്ററിൽ വെങ്കലവും 600 മീറ്ററില്‍ സ്വർണവും നേടിയിരുന്നു. ദേശീയ സ്‌കൂള്‍ ഗെയിംസില്‍ പരിക്കു കാരണമാണ് സ്വർണം നഷ്ടമായത്. ഭുവന്വേശ്വറിൽ നടക്കുന്ന മത്സരത്തില്‍ സ്വർണ പ്രതീക്ഷയിലാണ് ഇവാന. ഇവാന‍യുടെ നേട്ടത്തിന് സാക്ഷിയാകാൻ കുടുംബാംഗങ്ങൾ തലശേരി മുനിസിപ്പല്‍ സ്റ്റേഡിയത്തിലെത്തിയിരുന്നു. തലശേരി ടൗണ്‍ ഗവ. എച്ച്എസ്എസിലെ ഒമ്പതാം ക്ലാസ് വിദ്യാര്‍ഥിനിയാണ്. പടിയൂര്‍ തിരൂരിലെ നിരപ്പേല്‍ എന്‍.ടി.ടോമിയുടെയും ബിന്ദു ഫ്രാന്‍സീസിന്‍റെയും മകളാണ്.