കണ്ണൂര്: മലബാര് സോഷ്യല് സര്വീസ് സൊസൈറ്റിയുടെ നേതൃത്വത്തില് ഉഷ ഇന്റര്നാഷണലും കണ്ണൂര് എംജിഎസ് കളരി സംഘവുമായി സഹകരിച്ച് ശ്രീപുരം ഇംഗ്ലീഷ്മീഡിയം സ്കൂള് ഓഡിറ്റോറിയത്തില് മൂന്നാമത് കളരിപ്പയറ്റ് ചാമ്പ്യന്ഷിപ്പിന്റെ ഭാഗമായി പൊതുസമ്മേളനം സംഘടിപ്പിച്ചു. കോട്ടയം അതിരൂപത സഹായ മെത്രാൻ മാര് ജോസഫ് പണ്ടാരശേരില് ഉദ്ഘാടനം ചെയ്തു. പരിപാടിയിൽ 180 കളരിപ്പയറ്റ് കലാകാരന്മാർ പങ്കെടുത്തു. ശ്രീപുരം ബറുമറിയം പാസ്റ്ററല് സെന്റര് ഡയറക്ടര് ഫാ. ജോയ് കട്ടിയാങ്കല് അധ്യക്ഷത വഹിച്ചു.
സൊസൈറ്റി സെക്രട്ടറി ഫാ. സിബിന് കൂട്ടകല്ലുങ്കല്, വടിവേലന് പെരുമാള്, ശശീന്ദ്രന്, ദിനേശന് ഗുരുക്കള്, സദാശിവന് ഗുരുക്കള്, ഏബ്രഹാം ഉള്ളാടപ്പുള്ളില് എന്നിവര് പ്രസംഗിച്ചു. കളരിപ്പയറ്റ് ചാമ്പ്യന്ഷിപ്പില് പയ്യമ്പള്ളി കളരിസംഘം ഒന്നാം സ്ഥാനവും, ഹിന്ദുസ്ഥാന് കളരിസംഘം ശ്രീകണ്ഠപുരം രണ്ടാം സ്ഥാനവും, ഗുരുകൃപ കളരിസംഘം കതിരൂര് മൂന്നാം സ്ഥാനവും കരസ്ഥമാക്കി. വിജയികള്ക്കുള്ള കാഷ് അവാര്ഡ്, ട്രോഫി , സര്ട്ടിഫിക്കറ്റ് എന്നിവ വടിവേലന് പെരുമാള്, ഫാ. സിബിന് കൂട്ടകല്ലുങ്കല് എന്നിവര് വിതരണം ചെയ്തു.