കണ്ണൂർ: കണ്ണൂർ ഗവ. ഐടിഐയിൽ ആർട്ടിഫിഷ്യൽ ഇന്റലിജൻസ് (എഐ), സോളാർ ടെക്നീഷ്യൻ, ത്രീഡി പ്രിന്റിംഗ് എന്നീ അതിനൂതന ട്രേഡുകൾ തുടങ്ങുമെന്നും അടുത്ത വർഷം മുതൽ കോഴ്സുകൾ ആരംഭിക്കുമെന്നും മന്ത്രി ശിവൻ കുട്ടി. കണ്ണൂർ ഗവ. ഐടിഐയെ അന്താരാഷ്ട്ര നിലവാരത്തിലേക്കുയർത്തുന്നതിന്റെ ഭാഗമായി നിർമിച്ച പുതിയ കെട്ടിട സമുച്ഛയം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി.
വിദഗ്ധരായ തൊഴിലാളികളെ സൃഷ്ടിക്കുന്നതിൽ കേരളം രാജ്യത്തിന് മാതൃകയാണ്. നൈപുണ്യ പരിശീലന രംഗത്ത് സ്വദേശത്തും വിദേശത്തും മെച്ചപ്പെട്ട തൊഴിൽ കണ്ടെത്താൻ വിദഗ്ധ പരിശീലനമാണ് ഐടിഐകൾ നൽകുന്നു. സംസ്ഥാനത്ത് സാങ്കേതിക മേഖലകളിൽ സ്ത്രീകളുടെ പങ്കാളിത്തം ശ്രദ്ധേയമാണ്. കണ്ണൂർ ഗവ ഐടിഐയിൽ നിലവിലുള്ള ടെക്നീഷ്യൻ പവർ ഇലക്ട്രോണിക്സ് ട്രേഡിന് കേരള പിഎസ്സിയുടെ അംഗീകാരം ലഭിക്കാൻ നടപടി സ്വീകരിക്കുമെന്നും മന്ത്രി പറഞ്ഞു. ഇലക്ട്രിക്കൽ ഇൻസ്റ്റാലേഷൻ വിഭാഗത്തിൽ അവാർഡ് നേടിയ വിദ്യാർഥി അഭിനവിനെയും മെന്റർ എം.എം മനോജിനെയും മന്ത്രി ആദരിച്ചു. മന്ത്രി കടന്നപ്പള്ളി രാമചന്ദ്രൻ അധ്യക്ഷത വഹിച്ചു.