തലശേരി: റവന്യൂ ജില്ലാ സ്കൂള് കായികമേളയ്ക്ക് തലശേരി ജസ്റ്റിസ് വി.ആര്. കൃഷ്ണയ്യര് സ്മാരക മുനിസിപ്പല് സ്റ്റേഡിയത്തില് തുടക്കം. ആദ്യദിനത്തില് 35 ഇനങ്ങൾ പൂർത്തിയാപ്പോൾ 118 പോയിന്റുമായി പയ്യന്നൂര് ഉപജില്ല മുന്നിട്ടുനില്ക്കുന്നു. 28 പോയിന്റുമായി ഇരിക്കൂര് ഉപജില്ല രണ്ടാം സ്ഥാനത്തും 20 പോയിന്റുമായി മട്ടന്നൂര് ഉപജില്ല മൂന്നാംസ്ഥാനത്തുമുണ്ട്. ഇന്ന് നടത്തം, ഹൈജംപ്, ലോംഗ് ജംപ്, ഷോട്ട്പുട്ട്, ഡിസ്കസ്ത്രോ, റിലേ ഇനങ്ങളാണ് നടക്കുക. 15 ഉപജില്ലകളില് നിന്ന് രണ്ടായിരത്തോളം കായികപ്രതിഭകള് മേളയില് മാറ്റുരയ്ക്കുന്നുണ്ട്. നാളെയാണ് സമാപനം
നിയമസഭാ സ്പീക്കര് എ.എന്.ഷംസീര് കായികമേള ഉദ്ഘാടനം ചെയ്തു. കായികതാരങ്ങള്ക്ക് ആവശ്യമായ പിന്തുണയും പ്രോത്സാഹനവും സര്ക്കാര് നല്കുന്നുണ്ടെന്നും കായികരംഗത്ത് മുന്നേറാന് വിദ്യാര്ഥികള് നന്നായി പരിശ്രമിക്കണമെന്നും പങ്കാളിത്തം ഉറപ്പാക്കണമെന്നും സ്പീക്കര് പറഞ്ഞു.തലശേരി നഗരസഭാ ചെയര്പേഴ്സണ് കെ.എം. ജമുനാറാണി അധ്യക്ഷത വഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയര്പേഴ്സണ് ടി.കെ. സാഹിറ, കൗണ്സിലര് പി.കെ. സോന, കണ്ണൂര് വിദ്യാഭ്യാസ ഉപ ഡയറക്ടര് കെ.എന്. ബാബു മഹേശ്വരിപ്രസാദ്, ഹയര് സെക്കൻഡറി റീജണല് ഡെപ്യൂട്ടി ഡയറക്ടര് ആര്.രാജേഷ്കുമാര്, കണ്ണൂര് ഡയറ്റ് പ്രിന്സിപ്പല് വി.വി. പ്രേമരാജന്, വിദ്യാകിരണം ജില്ലാ കോ- ഓര്ഡിനേറ്റര് കെ.സി. സുധീര്, ജില്ലാ സ്കൂള് സ്പോര്ട്സ് കോ- ഓര്ഡിനേറ്റര് പി.പി. മുഹമ്മദലി, രജീഷ് കാളിയത്താന് പ്രസംഗിച്ചു.