മൂവാറ്റുപുഴ: എഐവൈഎഫ് മൂവാറ്റുപുഴ മണ്ഡലം കമ്മിറ്റി ജനകീയ പ്രതിഷേധ ജ്വാല സംഘടിപ്പിച്ചു. എഐവൈഎഫ് സംസ്ഥാന പ്രസിഡന്‍റ് എൻ. അരുണ്‍ ഉദ്ഘാടനം ചെയ്തു. മൂവാറ്റുപുഴ നഗരം മയക്കുമരുന്ന് ലഹരി മാഫിയാ സംഘങ്ങളുടെ സ്വൈര്യ വിഹാരകേന്ദ്രമായി മാറുന്ന സ്ഥിതിയാണ് നിലവിലുള്ളതെന്ന് അദ്ദേഹം പറഞ്ഞു.
മൂവാറ്റുപുഴയിലെ മയക്കുമരുന്ന് ലഹരി മാഫിയ സംഘത്തെ അമർച്ച ചെയ്യുവാൻ എക്സൈസ് പോലീസ് സംവിധാനം സംയുക്തമായി ശക്തമായ പ്രവർത്തനം നടത്തണമെന്ന് അദ്ദേഹം ആവശ്യപ്പെട്ടു. എഐവൈഎഫ് മണ്ഡലം പ്രസിഡന്‍റ് സൈജൽ പാലിയത്ത് അധ്യക്ഷത വഹിച്ചു. സിപിഐ ജില്ലാ എക്സിക്യൂട്ടീവ് അംഗം കെ.എ. നവാസ്, എഐഎസ്എഫ് ജില്ലാ സെക്രട്ടറി ഗോവിന്ദ് എസ്. കുന്നുംപുറത്ത്, എൽ.എ. അജിത്, പോൾ പുമറ്റം, കെ.പി അലിക്കുഞ്ഞ്, ഫൗസിയ അലി, അൻഷാജ് തേനാലി തുടങ്ങിയവർ പ്രസംഗിച്ചു.