ഇരിട്ടി: ആറളം ഫാമിലെ "സിഞ്ചി ബെർസിയെ ഗാർഡൻ' ഇഞ്ചി ഉദ്യാനത്തിന്റെ നടീൽ ഉത്സവം ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യൻ ഉദ്ഘാടനം ചെയ്തു. ആറളം ഫാം മാനേജിംഗ് ഡയറക്ടർ കാർത്തിക് പാണിഗ്രാഹി അധ്യക്ഷത വഹിച്ചു. അഡ്മിനിസ്ട്രേറ്റീവ് ഓഫീസർ ഡോ. കെ.പി. നിതീഷ് കുമാർ, അക്കൗണ്ട് ഓഫീസർ ടി.പി. പ്രേമരാജ്, ഫാം സൂപ്രണ്ട് എൻ. ദിനേശൻ എന്നിവർ പ്രസംഗിച്ചു.
ആറളം ഫാം തൊഴിലാളി യൂണിയൻ പ്രതിനിധികളും ജീവനക്കാരും തൊഴിലാളികളും പരിപാടിയിൽ പങ്കുചേർന്നു. മലേഷ്യ, തായ്ലാൻഡ്, സൗത്ത് അമേരിക്ക, ബ്രസീൽ തുടങ്ങിയ വിവിധ രാജ്യങ്ങളിൽ നിന്നുള്ള ഇഞ്ചിനങ്ങളും അതോടൊപ്പം മേഘാലയ, ഹിമാചൽ പ്രദേശ്, നാഗാലാൻഡ് തുടങ്ങിയ ഇന്ത്യൻ സംസ്ഥാനങ്ങളിൽ നിന്നുമായി ശേഖരിച്ച 105 ഇനത്തിൽപ്പെട്ട ഇഞ്ചി തൈകളാണ് ആദ്യഘട്ടത്തിൽ ആറളം ഫാമിന്റെ ബ്ലോക്ക് അഞ്ചിൽ ഒരുക്കുന്നത്.