കോലഞ്ചേരി: പാങ്കോടിൽ ലോറി നിയന്ത്രണം വിട്ട് മറിഞ്ഞു. കുമരകത്ത് നിന്ന് പെരുമ്പാവൂർ പവിഴം റൈസ് മില്ലിലേക്ക് നെല്ലുമായി പോവുകയായിരുന്ന ഐഷർ ലോറിയാണ് ഇന്നലെ വൈകിട്ട് പി.പി.റോഡിൽ പാങ്കോട് ആശ്രമം പടിക്ക് സമീപം നിയന്ത്രണം വിട്ട് മറിഞ്ഞത്. അപകടത്തിൽ ഡ്രൈവർ മനോജിന് നിസാര പരിക്കുപറ്റി.
ലോറിയുടെ ഓയിൽ ടാങ്ക് പൊട്ടി റോഡിൽ ഓയിൽ പരന്നിരുന്നത് പരിഭ്രാന്തി പരത്തി.നെല്ല് ചാക്കുകൾ മറ്റൊരു ലോറിയിലേക്ക് നീക്കം ചെയ്തശേഷം ക്രെയിൻ ഉപയോഗിച്ച് ലോറി ഉയർത്തുകയായിരുന്നു. സ്റ്റേഷൻ ഓഫീസർ എൻ എച്ച് അസൈനാരുടെ നേതൃത്വത്തിൽ പട്ടിമറ്റം ഫയർ ഫോഴ്സ് സ്ഥലത്തെത്തി വെള്ളം പമ്പ് ചെയ്ത് റോഡിൽ നിന്നും ഓയിൽ നീക്കം ചെയ്തു. ലോറി കയറ്റം കയറി വരുന്നതിനിടെ പോക്കറ്റ് റോഡിൽ നിന്നും കാർ വരുന്നതുകണ്ട് വെട്ടിക്കാൻ ശ്രമിച്ചപ്പോഴായിരുന്നു അപകടം.