ചങ്ങനാശേരി: മുഖ്യമന്ത്രിയുടെ ഇടപെടല്‍മൂലം സില്‍വര്‍ലൈന്‍ പദ്ധതിക്ക് കേന്ദ്രം അനുമതി നല്‍കിയാലും പദ്ധതി കേരളത്തില്‍ നടപ്പാക്കാന്‍ സില്‍വര്‍ലൈന്‍ വിരുദ്ധ ജനകീയ സമിതി അനുവദിക്കില്ലെന്ന് സമരസമിതി കോട്ടയം ജില്ലാ ചെയര്‍മാന്‍ ബാബു കുട്ടന്‍ചിറ പറഞ്ഞു.
കേരള ജനത തള്ളിക്കളഞ്ഞ പദ്ധതി ഉപേക്ഷിക്കാന്‍ സര്‍ക്കാര്‍ തയാറാകണമെന്നും നിര്‍ദിഷ്ട പാത കടന്നുപോകുന്ന സ്ഥലങ്ങളിലെ സമരസമിതി യൂണിറ്റുകളുടെ നേതൃത്വത്തില്‍ ശക്തമായ സമരപരിപാടി ആരംഭിക്കുമെന്നും കോട്ടയം ജില്ലയില്‍ പാത കടന്നുപോകുന്ന സ്ഥലങ്ങളില്‍ വാഹനപ്രചാരണ ജാഥ നടത്തുമെന്നും ബാബു കുട്ടന്‍ചിറ പറഞ്ഞു.