മട്ടന്നൂർ: മരം കടപുഴകി വീണ് റോഡ് പഴശി കനാലിലേക്ക് ഇടിഞ്ഞു. ഇന്നലെ ഉച്ചയോടെ മട്ടന്നൂർ-തലശേരി റോഡിൽ കനാൽ പരിസരത്താണ് റോഡ് ഇടിഞ്ഞത്. മട്ടന്നൂർ സബ് രജിസ്ട്രാർ ഓഫീസ്, എക്സൈസ് ഓഫീസ്, വാട്ടർ അഥോറിറ്റി ഓഫീസ്, കള്ള് ഷാപ്പ് എന്നിവിടങ്ങളിലേക്കും വീടുകളിലേക്കും പോകുന്ന റോഡിന്‍റെ ഒരു ഭാഗമാണ് ഇടിഞ്ഞു താഴ്ന്നത്.
റോഡരികിലെ മരം കടപുഴകി കനാലിലേക്ക് വീഴുന്നതിനൊപ്പമാണ് റോഡ് ഇടിഞ്ഞു താഴ്ന്നത്. മരം വീഴുമ്പോൾ മറ്റൊരു മരവും കനാലിലേക്ക് പതിച്ചു. റോഡിന്‍റെ ഒരു ഭാഗം തകർന്നതിനാൽ അപകട ഭീഷണി ഉയർത്തുകയാണ്. ഓഫീസുകളിലേക്കും വീടുകളിലേക്കും പോകുന്നതിന് പുറമെ തലശേരി റോഡിൽ നിന്നും ഇല്ലംമൂലയിൽ എത്താനുള്ള എളുപ്പ വഴികൂടിയാണിത്.