തലശേരി: പാനൂർ മാക്കൂൽ പീടിക ജുമാമസ്ജിദിൽ കവർച്ച. പള്ളിയുടെ മുകൾ നിലയിലെ മുറിയിൽ സൂക്ഷിച്ച 27,000 രൂപ നഷ്ടപ്പെട്ടു. പള്ളിയോട് ചേർന്നുള്ള മദ്രസയിലെ ഉസ്താദിന്‍റെ മുറിയിൽ സൂക്ഷിച്ച പണമാണ് നഷ്ടപ്പെട്ടത്. രാവിലെ ഉസ്താദ് മദ്രസയിൽ ക്ലാസെടുക്കുന്നതിനിടെയാണ് കവർച്ച നടന്നതെന്ന് സംശയിക്കുന്നു.
പള്ളിയിലേക്ക് വന്ന സംഭാവനകളടക്കമുള്ള തുകയാണ് മോഷണം പോയത്. ചൊവ്വാഴ്ച പണം നഷ്ടപ്പെട്ടതറിഞ്ഞ് പള്ളിക്കമ്മിറ്റി ഭാരവാഹികൾ സിസിടിവി ദൃശ്യങ്ങൾ പരിശോധിച്ചപ്പോഴാണ് മോഷണം നടന്നത് വ്യക്തമായത്. മദ്രസയിൽ ക്ലാസ് നടക്കുന്ന സമയത്ത് യുവാവ് പള്ളിയിലേക്ക് കയറി വരുന്നതിന്‍റെ ദൃശ്യമാണ് ലഭിച്ചത്. ഈ ദൃശ്യങ്ങൾ സഹിതം പള്ളിക്കമ്മിറ്റി പാനൂർ പോലീസിൽ പരാതി നൽകി. പാനൂർ പോലീസ് സ്ഥലത്തെത്തി അന്വഷണം നടത്തി. പ്രതിയെക്കുറിച്ച് സൂചനകൾ ലഭിച്ചതായി പോലീസ് പറഞ്ഞു.