കണ്ണൂർ: അനധികൃത മണൽകടത്ത് തടയാനെത്തിയ എസ്ഐയേയും പോലീസുകാരനെയും മണൽ മാഫിയ ടിപ്പറിടിച്ച് കൊല്ലാൻ ശ്രമിച്ചു. ഇന്നലെ പുലർച്ചെ മൂന്നോടെ പാപ്പിനിശേരി പാറക്കലിലായിരുന്നു സംഭവം. മണൽ കടത്ത് തടയാനെത്തിയ വളപട്ടണം എസ്ഐ ടി.എം.വിപിൻ(35), സിപിഒ കിരൺ(33) എന്നിവരെയാണ് കൊലപ്പെടുത്താൻ ശ്രമിച്ചത്.
പോലീസ് സ്കൂട്ടറിൽ നൈറ്റ് പട്രോളിംഗ് നടത്തുന്നതിനിടെ മണൽ കടത്ത് നടക്കുന്നുണ്ടോയെന്നറിയാൻ പ്രദേശത്ത് എത്തിയതായിരുന്നു. എന്നാൽ, സ്കൂട്ടറിലെത്തി എസ്ഐയെ മനസിലായ പ്രതികളിലൊരാൾ ടിപ്പർ ലോറിയിടിച്ച് കൊലപ്പെടുത്താൻ ശ്രമിക്കുകയായിരുന്നു. അപകടത്തിൽ പോലീസുകാർക്ക് സാരമായി പരിക്കേറ്റു. ഇരുവരെയും ജില്ലാ ആശുപത്രിയിൽ പ്രവേശിപ്പിച്ചു. പോലീസിനെ ഇടിച്ച് കടന്നുകളഞ്ഞ പ്രതികൾക്കായി അന്വേഷണം ഊർജിതമാക്കിയിട്ടുണ്ട്.