ഇരിങ്ങാലക്കുട: ഇരിങ്ങാലക്കുട മണ്ഡലത്തിലെ വൈദ്യുതിവികസന രംഗത്തിനു കുതിപ്പേകിക്കൊണ്ട് വേളൂക്കര പഞ്ചായത്തില്‍ പുതിയ 33 കെവി സബ്‌സ്റ്റേഷന്‍ പണിതീര്‍ത്ത് ഇന്നു നാടിനു സമര്‍പ്പിക്കും. രാവിലെ 11 ന് സബ്‌സ്റ്റേഷന്‍ പരിസരത്തു നടക്കുന്ന ചടങ്ങ് വൈദ്യുതി മന്ത്രി കെ. കൃഷ്ണന്‍കുട്ടി ഉദ്ഘാടനം ചെയ്യും. മന്ത്രി ഡോ. ആര്‍. ബിന്ദു അധ്യക്ഷത വഹിക്കും.
ജില്ലാ പഞ്ചായത്ത് പ്രസിഡന്‍റ്് വി.എസ്. പ്രിന്‍സ്, ജില്ലാ കളക്ടര്‍ അരജുന്‍ പാണ്ഡ്യന്‍, ജില്ലാ പഞ്ചായത്ത് വൈസ് പ്രസിഡന്‍റ്് ലത ചന്ദ്രന്‍, ഇരിങ്ങാലക്കുട ബ്ലോക്ക് പപഞ്ചായത്ത് പ്രസിഡന്‍റ്് ലളിത ബാലന്‍, വെള്ളാങ്കല്ലൂര്‍ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ്, മാള ബ്ലോക്ക് പഞ്ചായത്ത് പ്രസിഡന്‍റ് രേഖ ഷാന്‍റി ജോസഫ് തുടങ്ങിയവര്‍ പങ്കെടുക്കും. ഏകദേശം 7.7 കോടി രൂപ ചെലവിലാണ് സബ്‌സ്റ്റേഷന്‍ യാഥാര്‍ഥ്യമാക്കുന്നത്. വോള്‍ട്ടേജ് ക്ഷാമം പരിഹരിക്കാനും ഗുണമേന്മയുള്ള വൈദ്യുതി എത്തിക്കാനും പ്രസരണവിതരണ നഷ്ടം കുറയ്ക്കാനും സബ്‌സ്റ്റേഷന്‍ ആരംഭിക്കുന്നതിലൂടെ സാധിക്കുമെന്ന് മന്ത്രി ഡോ. ആര്‍. ബിന്ദു പറഞ്ഞു.