ഈരാറ്റുപേട്ട: സെബാസ്റ്റ്യൻ കുളത്തുങ്കൽ എംഎൽഎ നേതൃത്വം നൽകുന്ന സന്നദ്ധ സംഘടനയായ എംഎൽഎ സർവീസ് ആർമി പൂഞ്ഞാറിന്റെ നേതൃത്വത്തിൽ മണപ്പുറം ഫൗണ്ടേഷന്റെ സഹകരണത്തോടെ പൂഞ്ഞാർ നിയോജകമണ്ഡലത്തിലെ 258 അങ്കണവാടികളിലെ 1800ലധികം കുട്ടികൾക്ക് കുടകൾ വിതരണം ചെയ്തു.
നിയോജകമണ്ഡലത്തിലെ പത്തു പഞ്ചായത്തുകളിലും ഓരോ അങ്കണവാടിയിലെയും കുട്ടികളുടെ എണ്ണത്തിന് അനുസൃതമായ കുടകൾ സെബാസ്റ്റ്യൻ കുളത്തുങ്കൽ എംഎൽഎ അങ്കണവാടി പ്രവർത്തകർക്ക് കൈമാറി. അങ്കണവാടികളിൽ നടത്തുന്ന ചടങ്ങിൽ വാർഡ് മെംബർമാർ കുട്ടികൾക്ക് കുട കൈമാറും.
നിയോജകമണ്ഡലംതല ഉദ്ഘാടനം പൂഞ്ഞാർ തെക്കേക്കര പഞ്ചായത്ത് ഹാളിൽ പഞ്ചായത്ത് പ്രസിഡന്റ് ജോർജ് മാത്യുവിന്റെ അധ്യക്ഷതയിൽ സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. ഇൻകം ടാക്സ് അസിസ്റ്റന്റ് കമ്മീഷണർ ജ്യോതിഷ് മോഹൻ, ജില്ലാ പഞ്ചായത്ത് മെംബർ പി.ആർ. അനുപമ, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്റ് അജിത രതീഷ്, ഈരാറ്റുപേട്ട മുനിസിപ്പൽ ചെയർപേഴ്സൺ സുഹ്റ അബ്ദുൾ ഖാദർ, പഞ്ചായത്ത് പ്രസിഡന്റുമാരായ ബിജോയി ജോസ് മുണ്ടുപാലം, സി.എം. ജാൻസി, കെ.കെ. ശശികുമാർ, സ്കറിയ പൊട്ടനാനി, ഗീത നോബിൾ, കെ.സി. ജയിംസ്, ബ്ലോക്ക് പഞ്ചായത്ത് മെംബർ മാർ തുടങ്ങിയവർ പങ്കെടുത്തു.