കുടുംബശ്രീയുടെ ഫ്‌ളോട്ടിംഗ് ബോട്ട് റസ്‌റ്ററന്‍റ് മുങ്ങി : Deepika.com Nattu Visesham

KOTTAYAM

കുടുംബശ്രീയുടെ ഫ്‌ളോട്ടിംഗ് ബോട്ട് റസ്‌റ്ററന്‍റ് മുങ്ങി

Wednesday, September 25, 2024 3:57 AM IST

കോട്ടയം: കോടിമതയില്‍ കുടുംബശ്രീയുടെ നേതൃത്വത്തില്‍ ആരംഭിച്ച ഫ്‌ളോട്ടിംഗ് ബോട്ട് റസ്‌റ്ററന്‍റ് വെള്ളത്തില്‍ മുങ്ങി. തിങ്കളാഴ്ച രാത്രിയുണ്ടായ കാറ്റിലാണ് ബോട്ട് മുങ്ങിയതെന്നു കരുതുന്നു. ബോട്ടിന്‍റെ ഒരുവശം പൂര്‍ണമായും വെള്ളത്തില്‍ മുങ്ങി. ക്രെയിന്‍ ഉപയോഗിച്ച് ഇന്നലെ പകല്‍ മുഴുവന്‍ ബോട്ട് ഉയര്‍ത്താന്‍ ശ്രമം നടത്തിയെങ്കിലും ഫലമുണ്ടായില്ല.

ഉയര്‍ത്തുന്നതിനായി കൊണ്ടുവന്ന വലിയ വടം പൊട്ടുകയായിരുന്നു. തുടര്‍ന്ന് ബോട്ട് ഉയര്‍ത്താനുള്ള ശ്രമം ഇന്നത്തേക്ക് മാറ്റി. റസ്‌റ്ററന്‍റിലെ കസേരയും മേശയും പാത്രങ്ങളും ബോട്ടില്‍നിന്നു മാറ്റി. ഒരു ഭാഗം മാത്രം മുങ്ങിയതിനാല്‍ സാധന സാമഗ്രികള്‍ ഒഴുകിപ്പോയില്ല. ഇതിനാല്‍ കാര്യമായ നാശനഷ്ടവുമുണ്ടായില്ല.

മൂന്നു മാസം മുമ്പാണ് കോട്ടയം നഗരസഭ 29-ാം വാര്‍ഡ് കുടുംബശ്രീ യൂണിറ്റിന്‍റെ ആഭിമുഖ്യത്തില്‍ ഫ്‌ളോട്ടിംഗ് ബോട്ട് റസ്‌റ്ററന്‍റ് പ്രവര്‍ത്തനം തുടങ്ങിയത്. പ്രഭാതഭക്ഷണവും ഉച്ചയൂണും വൈകുന്നേരങ്ങളിലെ കാപ്പിയും ഉള്‍പ്പെടെ നല്ല രീതിയിലാണ് റസ്റ്ററന്‍റ് പ്രവര്‍ത്തിച്ചുവന്നിരുന്നത്. ഇന്ന് ബോട്ട് ഉയര്‍ത്തി ശുചീകരിച്ച് അടുത്ത ദിവസംതന്നെ റസ്റ്ററന്‍റ്്‍ തുടങ്ങാനുള്ള തയാറെടുപ്പിലാണ് കുടുംബശ്രീ അധികൃതര്‍.