വെച്ചൂർ അഞ്ചുമന പാലം ഓണക്കാലത്ത് തുറന്നുകൊടുക്കണമെന്ന് ആവശ്യം : Deepika.com Nattu Visesham

KOTTAYAM

വെച്ചൂർ അഞ്ചുമന പാലം ഓണക്കാലത്ത് തുറന്നുകൊടുക്കണമെന്ന് ആവശ്യം

Wednesday, August 21, 2024 7:07 AM IST

വൈക്കം: വൈക്കം - വെച്ചൂർ റോഡിലെ വെച്ചൂർ പോലീസ് ഔട്ട് പോസ്റ്റിനു സമീപത്തെ അഞ്ചുമന പാലത്തിലൂടെ ഈ ഓണക്കാലത്തെങ്കിലും ഗതാഗതം സാധ്യമാക്കണമെന്ന ആവശ്യം ശക്തമായി. പാലത്തിന്‍റെ മീതെ കോൺക്രീറ്റുചെയ്തു ടാറിംഗ് നടത്തുന്ന ജോലികളും സമീപ റോഡിന്‍റെ ടാറിംഗും പെയിന്‍റിംഗുമാണ് ഇനി ശേഷിക്കുന്നത്. പാലത്തിൻെറ മീതെ കോൺക്രീറ്റു നടത്തിയാൽ അത് ഉറയ്ക്കാൻ 20 ദിവസം പിന്നിടണം. നിർമാണ പ്രവർത്തനങ്ങൾ ഇനിയും വൈകിയാൽ പാലത്തിലൂടെയുള്ള ഗതാഗതം വൈകും.

ബിഎം ബിസിയുടെ ടാർ മിക്സിംഗ് പ്ലാന്‍റ് എത്താത്തതും മഴയുമാണ് നിർമാണ പ്രവർത്തനങ്ങൾ തടസപ്പെടുത്തുന്നതെന്ന് സി.കെ. ആശ എംഎൽഎ പറഞ്ഞു. അഞ്ചുമന തോടിനു കുറുകെ 18 മീറ്റർ നീളത്തിൽ മൂന്നു കോടി മുപ്പത്തിമൂന്നു ലക്ഷം രൂപ വിനിയോഗിച്ചാണ് പാലം നിർമിച്ചത്.അപ്രോച്ച് റോഡ് നിർമാണത്തിനായി വേറെ തുകയും അനുവദിച്ചു.

2020 ഒക്‌ടോബർ 22ന് ആരംഭിച്ച പാലത്തിന്‍റെ നിർമാണം 2021 ഒക്‌ടോബർ 22ന് പൂർത്തിയാക്കുമെന്നായിരുന്നു കരാർ. പാലം നിർമാണത്തോടനുബന്ധിച്ചു സമാന്തരമായി തീർത്ത താത്കാലിക റോഡുവഴിയാണ് ഗതാഗതം.

പാലത്തിന്‍റെ പണികൾ പൂർത്തിയാക്കി ഗതാഗതം പുനഃസ്ഥാപിക്കാത്തതിനാൽ തോട്ടിലെ നീരൊഴുക്ക് തടസപ്പെട്ടത് കാർഷിക മേഖലയ്ക്കും തിരിച്ചടിയായി. 11.75 കിലോമീറ്റർ ദൈർഘ്യമുള്ള വൈക്കം- വെച്ചൂർ റോഡ് വീതി കൂട്ടി പുനർനിർമിക്കുന്ന പദ്ധതിയുടെ ഭാഗമായാണ് അഞ്ചുമന പാലം നിർമിക്കുന്നത്.

കിഫ്ബി ഫണ്ട് ഉപയോഗിച്ച് റോഡ് നിർമിക്കുന്നതിനു മുന്നോടിയായാണ് പാലം നിർമാണം. പാലത്തിന്‍റെ നിർമാണം ഉടൻ പൂർത്തിയാക്കി ഗതാഗതത്തിന് തുറന്നുകൊടുക്കണമെന്നാണ് വൈക്കം, വെച്ചൂർ നിവാസികളുടെ ആവശ്യം.