പഴയങ്ങാടി: പുതിയങ്ങാടി ചൂട്ടാട് അഴിമുഖത്ത് മത്സ്യബന്ധന വള്ളം മറിഞ്ഞ് 12 പേർ കടലിൽ വീണു. മൂന്നുപേർക്ക് പരിക്കേറ്റു. ഇന്നലെ രാവിലെ ആറോടെയാണ് സംഭവം. ഒഡീഷ സ്വദേശികളായ കാളു ബഹ്റ (42), ജഗൻനാഥ് (32), ആസാം സ്വദേശി ഇബ്രാഹിം (30) എന്നിവർക്കാണ് പരിക്കേറ്റത്. ഇവരെ പുതിയങ്ങാടി മൊട്ടാന്പ്രത്തെ സ്വകാര്യ ആശുപത്രിയിൽ പ്രവേശിപ്പിച്ചു. മറ്റുള്ളവർ നീന്തി രക്ഷപ്പെട്ടു. അമ്പതിനായിരം രൂപയുടെ നാശനഷ്ടം കണക്കാക്കുന്നു. നാലു ദിവസം മുന്പ് അഴിമുഖത്ത് സമാനമായ അപകടത്തിൽപ്പെട്ട രണ്ടുപേരെ ലൈഫ് ഗാർഡുകൾ രക്ഷപ്പെടുത്തിയിരുന്നു.