പോത്താനിക്കാട്: റോഡരികിൽ നിർത്തിയിട്ടിരുന്ന ടോറസ് ലോറി നിരങ്ങിനീങ്ങി കാറിലേക്കും തുടർന്ന് വളക്കടയിലേക്കും ഇടിച്ചു കയറി. ഇന്നലെ വൈകിട്ട് അഞ്ചോടെ കക്കടാശേരി - ഞാറക്കാട് റോഡിൽ പോത്താനിക്കാട് പാറക്കപ്പീടികയിലായിരുന്നു സംഭവം.
ലോഡുമായി വന്ന ഇ.കെ.കെ. കരാർ കന്പനിയുടെ ടോറസ് ലോറിയാണ് അപകടത്തിൽപ്പെട്ടത്. ഹാൻഡ് ബ്രേക്ക് തകരാറിലായതാകാം അപകട കാരണമെന്നാണ് നിഗമനം. മുന്നിൽ കിടന്ന കാറിൽ ഇടിച്ചതിനു ശേഷം കടയിലേക്ക് ഇടിച്ചു കയറുകയായിരുന്നു. കടയിലുണ്ടായിരുന്നവർ ഓടി മാറിയതിനാൽ ആളപായം ഉണ്ടായില്ല. കാറിനും കടയ്ക്കും സാരമായ കേടുപാടുകൾ സംഭവിച്ചിട്ടുണ്ട്.