ഭിന്നശേഷിക്കാർക്ക് വീടു നിർമിക്കാൻ ഓൾ ഇന്ത്യ റൈഡുമായി രണ്ടു യുവാക്കൾ : Deepika.com Nattu Visesham

KOTTAYAM

ഭിന്നശേഷിക്കാർക്ക് വീടു നിർമിക്കാൻ ഓൾ ഇന്ത്യ റൈഡുമായി രണ്ടു യുവാക്കൾ

Sunday, July 7, 2024 3:52 AM IST

കാഞ്ഞിരപ്പള്ളി: ഭിന്നശേഷിക്കാർക്കായി വീട് നിർമിച്ചുനൽകാനായി ഓൾ ഇന്ത്യ റൈഡുമായി രണ്ട് യുവാക്കൾ. കോഴിക്കോട് സ്വദേശിയായ കെ.ജി. നിജിനും വയനാട് സ്വദേശിയായ ടി.ആർ. റെനീഷുമാണ് ഒരു രൂപ ചലഞ്ചുമായി ഭിന്നശേഷിക്കാരായ അഞ്ചു പേർക്ക് 22 സെന്‍റ് സ്ഥലത്ത് വീട് നിർമിച്ചു നൽകുന്നത്. നിജിൻ അധ്യാപകനും റെനീഷ് മൊബൈൽ ഷോപ്പ് ഉടമയുമാണ്.

സോളാർ ഘടിപ്പിച്ച സൈക്കിൾ കാരവനിലാണ് ഇവരുടെ സഞ്ചാരം. ഇവരുടെ താമസവും ഈ സൈക്കിളിൽ തന്നെയാണ്. 83,000 രൂപ മുടക്കി ഒരു മാസം എടുത്ത് സ്വന്തമായി നിർമിച്ചതാണ് സൈക്കിൾ കാരവൻ.

2021 ഡിസംബർ 10ന് വയനാട് ജില്ലയിൽനിന്ന് ആരംഭിച്ച യാത്ര കാസർഗോഡ്, കണ്ണൂർ, കോഴിക്കോട്, മലപ്പുറം, തൃശൂർ, പാലക്കാട്, എറണാകുളം, ആലപ്പുഴ ജില്ലകൾ കടന്ന് ഇപ്പോൾ കോട്ടയത്ത് എത്തി നിൽക്കുകയാണ്. പത്ത് ജില്ലകളിൽനിന്ന് 12 ലക്ഷം രൂപ ഇവർ സമാഹരിച്ചു. ഈ ഭൂമിയിൽ ജീവിച്ചിരിക്കുന്ന സമയത്ത് എന്തെങ്കിലും ഒരു കൈയൊപ്പ് അടയാളപ്പെടുത്തുകയാണ് തങ്ങളുടെ ലക്ഷ്യമെന്ന് ഇവർ പറയുന്നു.

വീട് നിർമാണത്തിനായി 7,70,000 രൂപ നൽകി സ്ഥലം വാങ്ങി. അഞ്ചു വീടുകളുടെയും തറകെട്ട് നിർമാണം പുരോഗമിക്കുകയാണ്. ഇതിനായി ആൾക്കാരെ ചുമതലപ്പെടുത്തിയിട്ടുണ്ട്.

തിരുവനന്തപുരം ജില്ലയിൽ എത്തുമ്പോൾ വീടുകളുടെ നിർമാണം പൂർത്തിയാക്കാമെന്ന പ്രതീക്ഷയിലാണ് ഇവർ. വീട് നിർമാണം പൂർത്തിയായ ശേഷം കാഷ്മീരിലേക്ക് യാത്ര തുടരാനാണ് ഇവരുടെ തീരുമാനം.