ചെമ്പേരി: ഏരുവേശി പഞ്ചായത്തിന്‍റെയും വിവിധ സന്നദ്ധ സംഘടനകളുടെയും സംയുക്താഭിമുഖ്യത്തിൽ ചെമ്പേരി കേന്ദ്രമായി പ്രവർത്തനമാരംഭിക്കുന്ന സമഗ്ര രക്തദാനസേനയുടെ രൂപീകരണം പഞ്ചായത്ത് ഹാളിൽ സജീവ് ജോസഫ് എംഎൽഎ ഉദ്ഘാടനം ചെയ്തു.
ഏരുവേശി, നടുവിൽ, പയ്യാവൂർ എന്നീ പഞ്ചായത്തുകളിലും ശ്രീകണ്ഠപുരം നഗരസഭാ പരിധിയിലും ഉൾപ്പെടുന്ന മലയോര മേഖലയിലെ യുവജനങ്ങളെ സഹകരിപ്പിച്ചാണ് രക്തദാന സേന രൂപീകരിച്ചത്.
സന്നദ്ധരായ രക്തദാതാക്കളുടെ വിവരങ്ങൾ ശേഖരിക്കുന്ന ഓൺലൈൻ പേജ് ലഭ്യമാകുന്ന ക്യുആർ കോഡ് രേഖപ്പെടുത്തിയ പ്രചാരണ പോസ്റ്ററിന്‍റെ ആദ്യ പതിപ്പ് ചെമ്പേരി കെവിവിഇഎസ് യൂണിറ്റ് പ്രസിഡന്‍റ് സാബു മണിമലയ്ക്ക് നൽകി എംഎൽഎ പ്രകാശനം ചെയ്തു. ചെമ്പേരി വൈഎംസിഎ പ്രസിഡന്‍റ് ജോമി ചാലിൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് മിനി ഷൈബി മുഖ്യപ്രഭാഷണവും ചെമ്പേരി ലൂർദ് മാതാ ബസിലിക്ക അസിസ്റ്റന്‍റ് റെക്ടർ ഫാ. അമൽ ചെമ്പകശേരി, കെസിവൈഎം ഡയറക്ടർ ഫാ. വിപിൻ ആനചാരിൽ എന്നിവർ അനുഗ്രഹ പ്രഭാഷണവും നടത്തി. പ്രോഗ്രാം കോ-ഓർഡിനേറ്റർ ടോമി ചാമക്കാലയിൽ, പഞ്ചായത്ത് വൈസ് പ്രസിഡന്‍റ് മധു തൊട്ടിയിൽ, സ്ഥിരംസമിതി അധ്യക്ഷരായ പൗളിൻ തോമസ്, മോഹനൻ മൂത്തേടൻ, കെസിവൈഎം ഫൊറോന വൈസ് പ്രസിഡന്‍റ് ജോയൽ പുതുപ്പറമ്പിൽ, പ്രോഗ്രാം ഡയറക്ടർ ജോഷി കുന്നത്ത്, കെസിവൈഎം മേഖല സെക്രട്ടറി ക്രിസ്റ്റീന എന്നിവർ പ്രസംഗിച്ചു.