ചെറുപുഴ: കിണറ്റിൽ വീണയാളെ പോലീസും അഗ്നിരക്ഷാസേനയും ചേർന്ന് രക്ഷപ്പെടുത്തി. ഇന്നലെ വൈകുന്നേരം നാലോടെയായിരുന്നു സംഭവം. ചെറുപുഴ അയ്യപ്പക്ഷേത്രത്തിന് സമീപം ആൾത്താമസമില്ലാത്ത കിണറ്റിലാണ് തമിഴ്നാട് സ്വദേശിയായ മണി (36) വീണത്. പി.സി. രാഘവന്റെ ഉടമസ്ഥതയിലുള്ളതാണ് കിണർ.
ഉച്ചത്തിലുള്ള കരച്ചിൽ കേട്ട് സമീപത്ത് ജോലി ചെയ്തുകൊണ്ടിരുന്ന ആളുകൾ ഓടിയെത്തി നോക്കുമ്പോൾ കിണറിൽ ഒരാൾ വീണ് കിടക്കുന്നതാണ് കാണുന്നത്. ഉടൻ തന്നെ ചെറുപുഴ പോലീസ് സ്റ്റേഷനിലും പെരിങ്ങോം ഫയർഫോഴ്സിലും വിവരമറിയിച്ചു. ചെറുപുഴ എസ്ഐ രൂപാ മധുസൂദനന്റെ നേതൃത്വത്തിൽ പോലീസും പെരിങ്ങോത്ത് നിന്ന് അഗ്നിരക്ഷാസേനയും സ്ഥലത്തെത്തി കിണറ്റിൽ വീണയാളെ രക്ഷപ്പെടുത്തി. കാലിന് പരിക്കേറ്റ മണിയെ ചെറുപുഴ സഹകരണ ആശുപത്രിയിൽ പ്രവേശിപ്പിച്ചു.