കണ്ണൂർ: വയനാട്ടിലെ ദുരന്ത ബാധിതർക്ക് കൈതാങ്ങായി ജില്ലയുടെ ഔദ്യോഗിക സംവിധാനത്തിലൂടെ 15 വാഹനങ്ങൾ അവശ്യ വസ്തുക്കളുമായി വയനാട്ടിലേക്ക് തിരിച്ചു. ജില്ലാ പഞ്ചായത്ത് 10 വാഹനങ്ങളിലായാണ് അവശ്യ സാധനങ്ങൾ ശേഖരിച്ച് വയനാട്ടിലേക്ക് അയച്ചത്.
ജില്ലാ കളക്ടർ അരുൺ കെ വിജയൻ, ജില്ലാ പഞ്ചായത്ത് പ്രസിഡന്റ് പി.പി. ദിവ്യ , വൈസ് പ്രസിഡന്റ് ബിനോയ് കുര്യൻ, സ്ഥിരം സമിതി അധ്യക്ഷരായ വി.കെ. സുരേഷ് ബാബു, ടി. സരള, കെ.കെ. രത്നകുമാരി, അസി. കളക്ടർ ഗ്രന്ഥേ സായികൃഷ്ണ, ഇലക്ഷൻ ഡെപ്യൂട്ടി കളക്ടർ ബി. രാധാകൃഷ്ണൻ, ചലച്ചിത്ര നടൻ സന്തോഷ് കീഴാറ്റൂർ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ ഫ്ലാഗ് ഓഫ് ചടങ്ങിൽ പങ്കെടുത്തു. കണ്ണൂർ കോർപറേഷൻ മൂന്നു വാഹനങ്ങളിലായും തലശേരി, കണ്ണൂർ താലൂക്കുകൾ ഓരോ വാഹനങ്ങളിലായുമാണ് ദുരിതാശ്വാസ സാധനങ്ങൾ കൈമാറിയത്. കണ്ണൂർ താലൂക്ക് ഓഫീസിൽ നടന്ന ഫ്ലാഗ് ഓഫ് ചടങ്ങിൽ ജില്ലാ കളക്ടർ, അസി. കളക്ടർ, ഇലക്ഷൻ ഡെപ്യൂട്ടി കളക്ടർ എന്നിവർ പങ്കെടുത്തു.