എടക്കുളം: കാക്കാത്തുരുത്തി കനോലി കനാലില്‍ ചെന്നുചേരുന്ന ഷണ്‍മുഖം കനാലില്‍ വീണ്ടും അറവുമാലിന്യം തള്ളി. ഇരിങ്ങാലക്കുട നഗരസഭയില്‍നിന്നാരംഭിച്ച് പൂമംഗലം പടിയൂര്‍ പഞ്ചായത്തുകളിലൂടെ കടന്നുപോകുന്ന കനാലാണിത്. ഷണ്‍മുഖം കനാലില്‍നിന്നു പൂമംഗലം പടിയൂര്‍ പുഞ്ചപ്പാടത്തേയ്ക്കുള്ള തോടിനു സമീപമാണു മാലിന്യം തള്ളിയിരിക്കുന്നത്. ഈ ഭാഗത്ത് അറവുമാലിന്യങ്ങള്‍ തള്ളുന്നതു പതിവായിട്ടുണ്ടെന്നു പ്രദേശവാസികള്‍ കുറ്റപ്പെടുത്തി.
കഴിഞ്ഞയാഴ്ചയും ഇത്തരത്തില്‍ മാലിന്യംതള്ളിയിരുന്നു. രാത്രിയാണു മാലിന്യംതള്ളുന്നത്. ബണ്ട് റോഡുകളില്‍ സിസിടിവി കാമറകള്‍ ഇല്ലാത്തതും മാലിന്യംതള്ളുന്നതു കൂടാന്‍ കാരണമാണ്. പൂമംഗലം പഞ്ചായത്തിലെ രണ്ടാംവാര്‍ഡില്‍ പെരുവല്ലിപ്പാടത്തേക്കു പോകുന്ന ഒരപ്പന്‍തോട്ടില്‍ തോട്ടില്‍ കഴിഞ്ഞയാഴ്ച കക്കൂസ് മാലിന്യം തള്ളിയിരുന്നു. പഞ്ചായത്തിലെ തോടുകളില്‍ ഇത്തരത്തില്‍ മാലിന്യംതള്ളുന്നതു തടയണമെന്നും കുറ്റക്കാര്‍ക്കെതിരെ നടപടിയെടുക്കണമെന്നുമാണു ജനങ്ങളുടെ ആവശ്യം.