ശ്രേഷ്ഠബാവയ്ക്ക് കീഴില്ലത്ത് ഇന്ന് സ്വീകരണം

പെരുമ്പാവൂര്‍: യാക്കോബായ സുറിയാനി സഭയുടെ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയ്ക്ക് കേരള കൗണ്‍സില്‍ ഓഫ് ചര്‍ച്ചസിന്‍റെ (കെസിസി) നേതൃത്വത്തില്‍ ഇന്ന് മൂന്നിന് കീഴില്ലം നസ്രത്ത് മാര്‍ത്തോമ്മാ പള്ളിയില്‍ സ്വീകരണം നല്കും. കര്‍ദിനാള്‍ മാര്‍ ജോര്‍ജ് ആലഞ്ചേരി സ്വീകരണപരിപാടി ഉദ്ഘാടനം ചെയ്യും.

കെസിസി വൈസ് പ്രസിഡന്‍റ് മാത്യൂസ് സെറാഫീം എപ്പിസ്‌ക്കോപ്പ അധ്യക്ഷത വഹിക്കും. സിറില്‍ മാര്‍ ബസേലിയോസ് മെത്രാപ്പോലീത്ത, കുര്യാക്കോസ് മാര്‍ ഔഗിന്‍ മെത്രാപ്പോലീത്ത, മാത്യൂസ് മാര്‍ അപ്രേം മെത്രാപ്പോലീത്ത, ബിഷപ് റവ.വി.എസ്.ഫ്രാന്‍സിസ്, മാത്യൂസ് സില്‍വാനിയോസ് എപ്പിസ്‌ക്കോപ്പ, ശബരിമല മുന്‍ മേല്‍ശാന്തി ആത്രശേരി രാമന്‍ നമ്പൂതിരി, എംഎല്‍എമാരായ എല്‍ദോസ് കുന്നപ്പിള്ളി,പി.വി.ശ്രീനിജന്‍, പഞ്ചായത്ത് പ്രസിഡന്‍റ് എന്‍.പി.അജയകുമാര്‍ എന്നിവര്‍ പങ്കെടുക്കും.
പത്രസമ്മേളനത്തില്‍ കെസിസി ചെയര്‍മാന്‍ അലക്‌സാണ്ടര്‍ ജോര്‍ജ്, ജനറല്‍ സെക്രട്ടറി ഡോ. പ്രകാശ് പി. തോമസ്, ഫാ.പോള്‍ ഐസക് കവലിയേലില്‍, ജനറല്‍ കണ്‍വീനര്‍ ജോസഫ് ദാനിയേല്‍ തുടങ്ങിയവർ പങ്കെടുത്തു.

ADVERTISEMENT

കിണറ്റിൽ ചാടി യുവാവ് മരിച്ചു

കോലഞ്ചേരി: കടമറ്റം പള്ളിയുടെ കീഴിലുള്ള പോയേടം പള്ളിയുടെ കിണറ്റിൽ ചാടി യുവാവ് മരിച്ചു. വാഴക്കുളം കാട്ടു കണ്ടത്തിൽ അലൻ(25) ആണ് മരിച്ചത്. ഇന്നലെ രാവിലെ 11.30 നായിരുന്നു സംഭവം. കിണറിന്‍റെ മുകൾഭാഗം കല്ല്, ഗ്ലാസ് എന്നിവ ഉപയോഗിച്ച് മൂടിയിരുന്നിട്ടും കിണറിന്‍റെ ഭിത്തി പൊളിച്ച് ദ്വാരമുണ്ടാക്കിയാണ് യുവാവ് കിണറ്റിലേക്ക് ചാടിയത്. പട്ടിമറ്റം ഫയർഫോഴ്സ് സംഘം സ്ഥലത്തെത്തി ഗ്ലാസിന്‍റെ മൂടി നീക്കംചെയ്താണ് യുവാവിനെ പുറത്തെടുത്തത്. മൃതദേഹം കോലഞ്ചേരി മെഡിക്കൽ കോളജാശുപത്രിയിലേക്ക് മാറ്റി. തൊടുപുഴയിലെ സ്വകാര്യ ആശുപത്രിയിലെ മരുന്ന് ബില്ലും കുറെ മരുന്നുകളും മൃതദേഹത്തിൽ നിന്നും ലഭിച്ചു. യുവാവ് കുളത്തിലേക്ക് ചാടാൻ ശ്രമിക്കുന്നതിനിടെ പള്ളിയിലുണ്ടായിരുന്ന രണ്ടു പേർ ചേർന്ന് വലിച്ചുകയറ്റിയിരുന്നു. സഹായത്തിനായി കൂടുതൽ ആളുകളെ വിളിക്കാൻ ശ്രമിക്കുന്നതിനിടെ ഇയാൾ വീണ്ടും കുളത്തിലേക്ക് ചാടുകയായിരുന്നു. കയറിട്ടു കൊടുത്തെങ്കിലും മുങ്ങിപ്പോയി.പുത്തൻകുരിശ് പോലീസ് മേൽനടപടികൾ സ്വീകരിച്ചു.

ട്രെയിനിൽനിന്ന് വീണ് മരിച്ചു

ആലുവ: ട്രെയിനിന്‍റെ ചവിട്ടുപടിയിൽ ഇരുന്ന് യാത്ര ചെയ്യുകയായിരുന്ന മധ്യവയസ്കൻ താഴെ വീണ് മരിച്ചു. തമിഴ്നാട് അത്യനല്ലൂർ പോണഗിരി സ്വദേശി ബാലകൃഷ്ണൻ (50 ആണ് മരിച്ചത്. ചൊവ്വര റെയിൽവേ സ്റ്റേഷനു സമീപം ഇന്നലെ ഉച്ചകഴിഞ്ഞ് 1.45ഓടെയായിരുന്നു സംഭവം. നേത്രാവതി എക്സ്പ്രസിൽ എറണാകുളത്ത് നിന്നാണ് ബാലകൃഷ്ണൻ കയറിയത്. മൃതദേഹം ആലുവ ജില്ലാ ആശുപത്രി മോർച്ചറിയിൽ. നെടുമ്പാശേരി പോലീസ് കേസ് എടുത്തു.

കാറിടിച്ച് സ്കൂട്ടർ യാത്രികൻ മരിച്ചു

ഫോർട്ടുകൊച്ചി: സ്കൂട്ടറിന്‍റെ പിന്നിൽ കാറിടിച്ച് സ്കൂട്ടര്‍ യാത്രികന്‍ മരിച്ചു. ഫോര്‍ട്ട്കൊച്ചി വെളി കുരിശിങ്കല്‍ വീട്ടില്‍ കെ.ടി. ആന്റണിയുടെ മകന്‍ സമ്പത്ത് (57) ആണ് മരിച്ചത്. വെല്ലിംഗ്ടൺ ഐലന്‍റിലെ പോർട്ട് ട്രസ്റ്റ് സ്കൂളിനു സമീപം ഇന്നലെ ഉച്ചയ്ക്ക് 2.10 നായിരുന്നു അപകടം. സമ്പത്ത് ഓടിച്ചിരുന്ന സ്കൂട്ടർ പെട്ടെന്ന് നിർത്തിയപ്പോൾ പിന്നാലെ വരുകയായിരുന്ന കാർ ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചു വീണ് സമ്പത്തിനെ നാട്ടുകാരും ഹാര്‍ബര്‍ പോലീസും ചേര്‍ന്ന് എറണാകുളം ജനറല്‍ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം എറണാകുളം ജനറല്‍ ആശുപത്രി മോര്‍ച്ചറിയിൽ സൂക്ഷിച്ചിരിക്കുകയാണ്. പോസ്റ്റുമോർട്ടത്തിനു ശേഷം സംസ്ക്കാരം ഇന്ന് നസ്റത്ത് തിരുകുടുംബ ദേവാലയത്തില്‍. സമ്പത്ത് അവിവാഹിതനാണ്. മാതാവ്: ചിന്നമ്മ. സഹോദരങ്ങള്‍: ഉഷ, സന്തോഷ്, പ്യാരി. കാറോടിച്ച ചെല്ലാനം മറുവക്കാട് സ്വദേശി ജോസഫ് ജീനീഷി(26)നെതിരെ ഹാര്‍ബര്‍ പോലീസ് കേസ് എടുത്തു.

ചെണ്ടുമല്ലി വിളവെടുത്തു

കോതമംഗലം: പിണ്ടിമന പഞ്ചായത്തിലെ ആറാം വാർഡിൽ ഐശ്വര്യ കുടുംബശ്രീയിലെ ഞാറ്റുവേല ജെഎൽജി അംഗങ്ങൾ കൃഷി ചെയ്ത ചെണ്ടുമല്ലിയുടെ വിളവെടുപ്പ് നടത്തി. ഉദ്ഘാടനം പഞ്ചായത്ത്‌ പ്രസിഡന്‍റ് ജെസി സാജു നിർവഹിച്ചു. ആവശ്യകാർക്ക് കുറഞ്ഞ വിലയിൽ ഇനി മുതൽ ഓണ ദിവസങ്ങളിൽ പൂക്കൾ ലഭ്യമാകുമെന്നും അറിയിച്ചു.

ലേബര്‍ മൂവ്‌മെന്‍റ് യൂണിറ്റ് ഉദ്ഘാടനം

മൂവാറ്റുപുഴ: അസംഘടിത തൊഴിലാളികളുടെ ക്ഷേമത്തിനായി പ്രവര്‍ത്തിക്കുന്ന കോതമംഗലം രൂപത ലേബര്‍ മൂവ്‌മെന്‍റ് മൂവാറ്റുപുഴ ഹോളി മാഗി യൂണിറ്റിന്‍റെ പ്രവര്‍ത്തനോദ്ഘാടനം ഇടവക വികാരി റവ.ഡോ. മാനുവല്‍ പിച്ചളക്കാട്ട് നിര്‍വഹിച്ചു. രൂപതാ പ്രസിഡന്‍റ് തോമസ് മാത്യു അധ്യക്ഷത വഹിച്ചു. രൂപത പാലിയേറ്റീവ് ഹോം കെയര്‍ കോ-ഓര്‍ഡിനേറ്റര്‍ ആന്‍റണി പുല്ലന്‍, മൂവാറ്റുപുഴ മേഖലാ പ്രസിഡന്‍റ് മാത്യൂസ് ഉറുമ്പില്‍ എന്നിവര്‍ പ്രസംഗിച്ചു. വനിതാ കര്‍ഷക, തയ്യല്‍, നിര്‍മാണ, മോട്ടോര്‍, പീടിക, ഗാര്‍ഹിക തോട്ടം എന്നീ മേഖലകളിലെ തൊഴിലാളി ഫോറങ്ങളും, സാമൂഹ്യ സുരക്ഷാ പദ്ധതിയും, പാലിയേറ്റീവ് ഹോം കെയര്‍ സേവന ഫോറം എന്നിവക്കും തുടക്കം കുറിച്ചു. ജോബിന്‍ ജോണ്‍ - പ്രസിഡന്‍റ്, റെനി ജോസ് - വൈസ് പ്രസിഡന്‍റ്, ജോണ്‍ ജോസഫ് - ജനറല്‍ സെക്രട്ടറി, ജൂലി സിജി - ജോയിന്‍റ് സെക്രട്ടറി, ജോര്‍ജ് എള്ളില്‍ - ട്രഷറര്‍ എന്നിവരെ യോഗം തെരഞ്ഞെടുത്തു. ജോസ് കാക്കൂച്ചിറ, ജോജോ വടക്കേവീട്ടില്‍, ആന്‍റണി രാജന്‍ മടേയ്ക്കല്‍, ലിസമ്മ തോമസ്, ഷിമി ടോമി എന്നിവര്‍ നേതൃത്വം നല്‍കി.

പിറവം സ്കൂൾ: രണ്ടാംഘട്ട നിർമാണത്തിന് രൂപരേഖയായി

പിറവം: പൊതു വിദ്യാഭ്യാസ സംരക്ഷണ യജ്ഞത്തിന്‍റെ ഭാഗമായി പിറവം ഗവ. ഹയര്‍സെക്കൻഡറി സ്കൂളിന്‍റെ രണ്ടാംഘട്ട നിര്‍മാണ പ്രവർത്തനങ്ങളുടെ രൂപരേഖയായി. അനൂപ്‌ ജേക്കബ്‌ എംഎല്‍എയുടെ അധ്യക്ഷതയില്‍ ചേർന്ന യോഗമാണ് അംഗീകരിച്ചത്. ഇത് സര്‍ക്കാരിലേക്ക് സമര്‍പ്പിച്ച്‌ അംഗീകാരം ലഭിക്കുന്ന മുറയ്ക്ക് നിര്‍മാണം ആരംഭിക്കുമെന്ന് എംഎല്‍എ പറഞ്ഞു. കിഫ്‌ബി പദ്ധതി വഴി അനുവദിച്ച 5.30 കോടി രൂപയിൽ 1.50 കോടി രൂപയുടെ ഒന്നാം ഘട്ടം പൂർത്തീകരിച്ചിരുന്നു. ബാക്കിയുള്ള 3.80 കോടി രൂപയുടെ നിർമാണ പ്രവർത്തനങ്ങളുടെ വിശദമായ പ്രോജക്ട് റിപ്പോർട്ട് യോഗത്തില്‍ അവതരിപ്പിച്ചു. നാല് ക്ലാസ് റൂം, ലാബുകള്‍, ലൈബ്രറി, റീഡിംഗ് റൂം, സ്റ്റാഫ് റൂം, ആധുനിക നിലവാരത്തിലുള്ള ടോയ്ലെറ്റുകള്‍, ഭിന്നശേഷി സൗഹൃദമായ ടോയ് ലെറ്റ്, റാമ്പ് ഉള്‍പ്പെടെ പ്രത്യേകമായ വാഷ്‌ ഏരിയ ഉള്‍പ്പെടുത്തി പുതിയ ബ്ലോക്കും, സ്കൂളിന് പ്രവേശന കവാടവുമാണ് രണ്ടാംഘട്ട നിര്‍മാണ പ്രവൃത്തനങ്ങളിൽ ഉള്‍പ്പെടുത്തിയിരിക്കുന്നത്. പിറവം മുനിസിപ്പാലിറ്റി ചെയര്‍പേഴ്സണ്‍ ജൂലി സാബു, വൈസ് ചെയര്‍മാന്‍ കെ.പി. സലിം, നഗരസഭാ വിദ്യാഭ്യാസ സ്റ്റാന്‍ഡിംഗ് കമ്മിറ്റി വൈസ് ചെയര്‍പേഴ്സണ്‍ വത്സലാ വര്‍ഗീസ്‌, ബിമൽ ചന്ദ്രൻ, സ്കൂള്‍ പ്രിന്‍സിപ്പല്‍ ബി. ബിധു, പിടിഎ പ്രസിഡന്‍റ് എസ്‌. സജി തുടങ്ങിയവർ യോഗത്തിൽ പങ്കെടുത്തു.

‘റബറിന് 250 രൂപ താങ്ങുവില പ്രഖ്യാപിക്കണം’

കോതമംഗലം: റബറിന് 250 രൂപ താങ്ങ് വില പ്രഖ്യാപിക്കണം എന്ന് കേരള കോൺഗ്രസ് കോതമംഗലം നിയോജകമണ്ഡലം കമ്മിറ്റിയുടെ നേതൃ സംഗമം സർക്കാരിനോട് ആവശ്യപ്പെട്ടു. കഴിഞ്ഞ നിയമ സഭാ തെരഞ്ഞെടുപ്പിൽ ഇടത് പക്ഷ മുന്നണിയുടെ പ്രകടന പത്രികയിൽ റബർ കിലോയ്ക്ക് 250 രൂപ ഗ്യാരണ്ടി വില വാഗ്ദാനം ചെയ്തിട്ട്, പ്രകടന പത്രികയിലെ ഒരു കാര്യം പോലും നടപ്പിലാക്കാൻ ഇടത് സർക്കാരിന് ഇതുവരെ സാധിച്ചില്ല എന്നും യോഗം കുറ്റപ്പെടുത്തി. നേതൃസംഗമം മുൻ മന്ത്രി ടി.യു. കുരുവിള ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് എ.ടി. പൗലോസ് അധ്യക്ഷത വഹിച്ചു. ജില്ലാ പ്രസിഡന്‍റ് ഷിബു തെക്കുംപുറം മുഖ്യ പ്രഭാഷണം നടത്തി. സംസ്ഥാന ജനറൽ സെക്രട്ടറിമാരായ ജോമി തെക്കേക്കര, സി.കെ സത്യൻ, റാണികുട്ടി ജോർജ് തുടങ്ങിയവർ പ്രസംഗിച്ചു.

കുട്ടമ്പുഴ കൊച്ചുനാകപ്പുഴ പള്ളിയിൽ എട്ടു നോമ്പ് ആചരണം

കുട്ടമ്പുഴ: മരിയന്‍ തീര്‍ഥാടന കേന്ദ്രമായ കുട്ടമ്പുഴ കൊച്ചുനാകപ്പുഴ പള്ളിയില്‍ എട്ടു നോമ്പാചരണവും പരിശുദ്ധ കന്യകാമറിയത്തിന്‍റെ പിറവിത്തിരുനാളും 31 മുതല്‍ സെപ്റ്റംബർ എട്ട് വരെ ആഘോഷിക്കുമെന്ന് വികാരി ഫാ. അരുണ്‍ വലിയതാഴത്ത് അറിയിച്ചു. 31ന് രാവിലെ 6.45ന് കുര്‍ബാന, സെമിത്തേരി സന്ദര്‍ശനം, 9.30ന് കുര്‍ബാന, മതബോധനം. ഒന്ന് മുതല്‍ എട്ട് വരെ ദിവസവും രാവിലെ ആറിന് ജപമാല, 6.30ന് കുര്‍ബാന, നൊവേന. ഒന്നിന് വൈകുന്നേരം 3.45ന് ജപമാല, 4.30ന് കൊടിയേറ്റ്, ലദീഞ്ഞ്, കുര്‍ബാന, നൊവേന-മാര്‍ ജോസ് പുത്തന്‍വീട്ടില്‍. രണ്ട് മുതൽ അഞ്ച് വരെ 10.30ന് ജപമാല, 11ന് കുര്‍ബാന, നൊവേന, വൈകുന്നേരം 4.30ന് ലദീഞ്ഞ്, കുര്‍ബാന, നൊവേന. ആറിന് വൈകുന്നേരം മൂന്നിന് ജപമാല പ്രദക്ഷിണം-കുട്ടമ്പുഴ ടൗണ്‍ കപ്പേളയില്‍നിന്ന്, 4.30ന് ലദീഞ്ഞ്, ആഘോഷമായ കുര്‍ബാന, നൊവേന. ഏഴിന് രാവിലെ എട്ടിന് അമ്പ് വീടുകളിലേയ്ക്ക്, വൈകുന്നേരം മൂന്നിന് അമ്പ് പ്രദക്ഷിണം പള്ളിയിലേയ്ക്ക്, 3.45ന് ജപമാല, 4.30ന് ലദീഞ്ഞ്, ആഘോഷമായ കുര്‍ബാന, നൊവേന- മാര്‍ സെബാസ്റ്റ്യന്‍ വാണിയപ്പുരയ്ക്കല്‍, 6.30ന് പ്രദക്ഷിണം (കുറ്റിയാംചാല്‍ കപ്പേള). എട്ടിന് രാവിലെ 9.30ന് ലദീഞ്ഞ്, ആഘോഷമായ തിരുനാള്‍ കുര്‍ബാന, നൊവേന,11.30ന് പ്രദക്ഷിണം (കുട്ടമ്പുഴ കപ്പേള), 12.45ന് സമാപനാശീര്‍വാദം.

മഴ ശക്തം; മൂവാറ്റുപുഴ നഗരറോഡിലെ ടാറിംഗ് നിർത്തിവച്ചു : തുടരുന്നു യാത്രാ ദുരിതം

മൂവാറ്റുപുഴ: വര്‍ഷങ്ങളായുള്ള കാത്തിരിപ്പിന് ശേഷം ആരംഭിച്ച നഗര റോഡുകളുടെ ടാറിംഗ് മഴ വീണ്ടും ശക്തമായതിനെ തുടർന്ന് നിർത്തിവച്ചു. പി ഒ മുതല്‍ ടി ബി ജംഗ്ഷന്‍ വരെ രണ്ടു ദിവസം നീണ്ടുനിന്ന ടാറിംഗ് പ്രവര്‍ത്തനങ്ങളാണ് നിര്‍ത്തിവയ്‌ക്കേണ്ടിവന്നത്. ഒരു ദിവസം ഏകദേശം 350 - 400 മീറ്റര്‍ വീതം കണക്കിൽ നാല് ദിവസംകൊണ്ട് പി ഒ മുതല്‍ കച്ചേരിത്താഴം വരെയുള്ള ജോലികൾ പൂർത്തിയാക്കാമെന്നായിരുന്നു കണക്കുകൂട്ടൽ. ഒരുവശത്തെ ടാറിംഗ് പൂര്‍ത്തിയാക്കി വാഹനങ്ങള്‍ കഴിഞ്ഞദിവസം കടത്തിവിടാന്‍ തുടങ്ങിയിരുന്നു. ഇതേ തുടര്‍ന്ന് ചിലയിടങ്ങളില്‍ ടാറിംഗ് വിണ്ടുകീറിയിട്ടുണ്ട്. ഓണത്തിനു മുമ്പ് നഗര റോഡിലെ ടാറിംഗ് പൂര്‍ത്തിയാക്കി വ്യാപാരികള്‍ക്കും ജനങ്ങൾക്കും ആശ്വാസകരമായ സാഹചര്യം ഒരുക്കണമെന്നതായിരുന്നു മാത്യു കുഴല്‍നാടന്‍ എംഎല്‍എ ഉദ്യോഗസ്ഥര്‍ക്ക് നല്‍കിയിരുന്ന നിര്‍ദ്ദേശം. എന്നാല്‍ മഴ ശക്തമായതോടെ പരിശ്രമം പ്രതിസന്ധിയിലായിരിക്കുകയാണ്. മഴ മാറി റോഡിലെ ഈർപ്പം നീങ്ങുന്ന മുറയ്ക്ക് ടാറിംഗ് പുനരാരംഭിക്കുമെന്ന് മാത്യു കുഴല്‍നാടന്‍ എംഎല്‍എ അറിയിച്ചു.

ഓട്ടോറിക്ഷ മോഷ്ടിച്ചയാൾ പിടിയിൽ

കിഴക്കന്പലം: ഓട്ടോറിക്ഷ മോഷ്ടിച്ച് കടന്നു കളഞ്ഞ കേസിൽ പ്രതി അറസ്റ്റിൽ. കുന്നത്തുനാട് ചേലക്കുളം വട്ടപ്പറമ്പിൽ വീട്ടിൽ സമദ് (30) നെയാണ് കുന്നത്തുനാട് പോലീസ് അറസ്റ്റ് ചെയ്തത്. വെങ്ങോല സ്വദേശിയായ യുവാവ് വാടകയ്ക്ക് എടുത്ത് ഓടിക്കുന്ന ഓട്ടോറിക്ഷയാണ് പ്രതി മോഷ്ടിച്ചത്. ബുധനാഴ്ച വൈകിട്ട് പെരുമ്പാവൂർ സ്റ്റാൻഡിൽ നിന്നും വീട്ടിലേക്ക് പോകാനാണെന്ന് പറഞ്ഞ് സമദ് ഓട്ടം വിളിക്കുകയായിരുന്നു. കിഴക്കമ്പലം ഭാഗത്ത് എത്തിയപ്പോൾ ഒട്ടോ നിർത്തി പരാതിക്കാരനായ യുവാവ് മൂത്രം ഒഴിക്കാൻ പോയ തക്കം നോക്കി ഓട്ടോറിക്ഷ മോഷ്ടിച്ചു കൊണ്ടു പോകുകയായിരുന്നു. സമദിനെതിരായി വിവിധ പോലീസ് സ്റ്റേഷനുകളിലായി നിരവധി കേസുകളുണ്ട്. അന്വേഷണ സംഘത്തിൽ ഇൻസ്പെക്ടർ സുനിൽ തോമസ്, എസ് ഐ മാരായ സെയ്ദു മുഹമ്മദ്, നിസാർ, ജിൻസൻ, സിപിഒ മാരായ എൻ.ജി. അനീഷ്, ഒ.എസ്. ബിബിൻ രാജ്, എം.എസ്. അജാസ് എന്നിവരാണ് ഉണ്ടായിരുന്നത്.

സിയാൽ കാർഗോ ക്ലബ് ഓണാഘോഷം

നെടുമ്പാശേരി : സിയാൽ എയർ കാർഗോ ക്ലബിന്‍റെ ആഭിമുഖ്യത്തിൽ നടന്ന ഓണാഘോഷം എയർപോർട്ട് ജനറൽ മാനേജർ മനോജ് ജോസഫ് ഉദ്ഘാടനം ചെയ്തു. ക്ലബ് പ്രസിഡന്‍റ് ജെബി മാത്യു അധ്യക്ഷനായിരുന്നു. സ്റ്റീഫൻ ആന്‍റണി കല്ലറയ്ക്കൽ, സജിത്ത്, റഫിക്ക്, സൈനുൽ ആബിദ്. രാജേഷ് മധുസൂദനൻ എന്നിവർ പ്രസംഗിച്ചു. വിവിധ കലാമത്സരങ്ങളും സംഘടിപ്പിച്ചിരുന്നു.

കുന്നത്തേരി കവല വികസിപ്പിക്കണമെന്ന ആവശ്യം ശക്തമാകുന്നു

ആലുവ : ചൂർണിക്കര പഞ്ചായത്തിലെ പൈപ്പ് ലൈൻ റോഡ്, കുന്നത്തേരി റോഡ് എന്നിവ സംഗമിക്കുന്ന കുന്നത്തേരി ജംഗ്ഷൻ വികസിപ്പിക്കണമെന്ന ആവശ്യം ശക്തമാകുന്നു. ജംഗ്ഷൻ വീതി കൂട്ടുവാൻ ആവശ്യമായ സ്ഥലം ഏറ്റെടുക്കൽ നടപടി ആരംഭിക്കണമെന്നാവശ്യപ്പെട്ട് വാർഡംഗം കെ.കെ. ശിവാനന്ദൻ പൊതു മരാമത്ത് മന്ത്രിക്ക് നിവേദനം സമർപ്പിച്ചു. ദേശീയ പാതയിലെ തിരക്ക് ഒഴിവാക്കി മുട്ടം മെട്രോ യാർഡ്, കൊമ്പാറ, കളമശേരി, ആലുവ ഭാഗങ്ങളിൽ നിന്ന് ചെറുതും വലുതുമായ നൂറു കണക്കിന് വാഹനങ്ങളാണ് കുന്നത്തേരി പി ഡബ്ല്യൂ ഡി റോഡിലൂടെ കടന്നു പോകുന്നത്. കെ എസ് ആർ ടി സി, പ്രൈവറ്റ് ബസുകളും ഇത് വഴി സർവീസ് നടത്തുന്നുണ്ട്. കൂടാതെ നിരവധി സ്കൂൾ ബസുകളും രാവിലെയും വൈകിട്ടും ഇതുവഴി പോകുന്നുണ്ട്. തിരക്കേറിയ കുന്നത്തേരി കവലയുടെ വികസനം നടപ്പാക്കുവാൻ സ്ഥലം ഏറ്റെടുക്കാതെ നിവൃത്തിയില്ല. ചൂർണിക്കര പഞ്ചായത്തും ഇതേ ആവശ്യം ഉന്നയിച്ച് ജില്ലാ കളക്ടർക്ക് കത്ത് നൽകിയിട്ടുണ്ട്. ഇവിടെ റോഡിനു ആവശ്യമായ സ്ഥലം ഇല്ലാത്തതിനാൽ ഗതാഗതക്കുരുക്ക് നിത്യസംഭവമാണ്. വലിയ വാഹനങ്ങൾ കടന്നു പോകുവാൻ പ്രയാസവുമാണ്. പ്രദേശത്തിന്‍റെ പ്രാധാന്യം കണക്കിലെടുത്തു എത്രയും വേഗം ഈ കവലയുടെ വികസനം നടപ്പാക്കുവാനുള്ള നടപടികളും സ്ഥലം ഏറ്റെടുക്കലും ഉടൻ ആരംഭിക്കണമെന്ന് മന്ത്രിക്ക് നൽകിയ നിവേദനത്തിൽ ശിവാനന്ദൻ ആവശ്യപ്പെട്ടു. ഇതിനിടയിൽ കുന്നത്തേരി ജംഗ്ഷനിലെ ഗതാഗത്തിന് തടസ്സമായിരുന്ന ബിഎസ്എൻഎൽ ബോക്സ് കഴിഞ്ഞ ദിവസം മാറ്റി. പൈപ്പ് ലൈൻ റോഡും പിഡബ്ല്യു റോഡും കൂടിച്ചേരുന്ന കുന്നത്തേരി ജംഗ്ഷനിലെ ഈ ബോക്സിൽ അടിയിലെ പൈപ്പ് പൊട്ടിയത് മാറ്റി സ്ഥാപിക്കാനാണ് ബോക്സ് മാറ്റിയത്. പിന്നീട് അത് അവിടെ സ്ഥാപിക്കാൻ നാട്ടുകാർ അനുവദിച്ചില്ല. ഗതാഗതത്തിന് തടസമായി നിന്ന ബോക്സ് സ്ഥാപിക്കാൻ ശ്രമിച്ചാൽ ശക്തമായ സമരപരിപാടികളുമായി മുന്നോട്ട് ഇറങ്ങുമെന്ന് ബിജെപി ചൂർണിക്കര പഞ്ചായത്ത് ജനറൽ സെക്രട്ടറി രാജേഷ് ബത്തേരി പറഞ്ഞു.

പറവൂർ ചന്തയും പരിസരവും മാലിന്യക്കൂമ്പാരമായി

പറവൂർ: പറവൂർ ചന്തയും പരിസരവും മാലിന്യക്കൂമ്പാരമായി. മഴ പെയ്തതോടെ പച്ചക്കറി മാലിന്യങ്ങളും വെള്ളവും നിറഞ്ഞ് നടക്കാൻ മറ്റാത്ത അവസ്ഥയാണ്.ചൊവ്വ, വെള്ളി ദിവസങ്ങളിലാണ് പച്ചക്കറി ചന്ത നടക്കുന്നത്. ചന്തയുടെ പ്രവർത്തനം കഴിഞ്ഞാൽ വൈകിട്ടോടെ പച്ചക്കറി അവശിഷ്ടങ്ങൾ നഗരസഭ മാറ്റാറാണ് പതിവ്. എന്നാൽ കഴിഞ്ഞ ചന്തയ്ക്കു ശേഷമുള പച്ചക്കറി മാലിന്യങ്ങളും മറ്റും അങ്ങിങ്ങായി കുന്നുകൂടി കിടക്കുകയാണ്. രണ്ട് ദിവസമായി മഴ പെയ്തതോടെ ഇവ ചീഞ്ഞ് ദുർഗന്ധമായി. ഇന്ന് ചന്തയിലെത്തുന്നവർക്ക് മൂക്കുപൊത്തി മാത്രമേ സാധനങ്ങൾ വാങ്ങാനാകു. മാത്രമല്ല സമീപത്തുള്ള കാന വൃത്തിയാക്കിയിട്ടും നാളേറെയായി. അതിൽ നിന്നുള്ള അസഹനീയമായ ദുർഗന്ധം കൂടിയാകുമ്പോൾ ജനം വലയുമെന്നുറപ്പാണ്. ചന്ത കഴിഞ്ഞാൽ അന്നു തന്നെ അവിടം വൃത്തിയാക്കണമെന്ന് ആവശ്യപ്പെട്ടതാണെങ്കിലും നഗരസഭാ ഭരണാധികാരികൾ കേട്ട ഭാവം നടിക്കുന്നില്ലെന്ന് വാർഡ് കൗൺസിലർ എം.കെ. ബാനർജി പറഞ്ഞു. കച്ചവടക്കാർക്കും ജനത്തിനും ബുദ്ധിമുട്ടുണ്ടാക്കുന്ന തരത്തിൽ പച്ചക്കറി മാലിന്യം കുന്നുകൂടിയത് നീക്കം ചെയ്യണമെന്നും അല്ലെങ്കിൽ സമരം നടത്തുമെന്നും മത്സ്യത്തൊഴിലാളി യൂണിയൻ(സിഐടിയു), മത്സ്യത്തൊഴിലാളി ഫെഡറേഷൻ(എഐടിയുസി) മാർക്കറ്റ് ഭാരവാഹികളായ സി.എ.രാജീവ്, അജി മാട്ടുമ്മൽ എന്നിവർ ആവശ്യപ്പെട്ടു.

മുകേഷ് എംഎൽഎയുടെ രാജി ആവശ്യപ്പെട്ട് ഐഎൻടിയുസി പ്രതിഷേധ മാർച്ച്

മരട്: ലൈംഗിക പീഡനക്കേസിൽ പ്രതിയായ മുകേഷ് എംഎൽഎയുടെ രാജി ആവശ്യപ്പെട്ട് ഐഎൻടിയുസിയുടെ നേതൃത്വത്തിൽ പ്രതിഷേധ മാർച്ച് നടത്തി. കൊട്ടാരം ജംഗ്‌ഷനിൽ നിന്ന് മരടിലെ ടി.കെ.എസ്. റോഡിലുള്ള മുകേഷിന്‍റെ വീട്ടിലേക്ക് നടത്തിയ മാർച്ച് മരട് നഗരസഭാ ചെയർപേഴ്‌സൺ ആന്‍റണി ആശാൻപറമ്പിൽ ഉദ്ഘാടനം ചെയ്തു. പീഡനക്കേസിൽ പ്രതിയായിരിക്കെ നിയമസഭാ അംഗമായിരിക്കുന്നത് ജനാധിപത്യ മൂല്യങ്ങൾക്കും സമൂഹത്തിന്‍റെ വിശ്വാസത്തിനും വിരുദ്ധമാണെന്നും പൊതുജനങ്ങളുടെ മാന്യത സംരക്ഷിക്കുന്നതിനായി മുകേഷ്, എംഎൽഎ സ്ഥാനം രാജി വയ്ക്കേണ്ടത് കാലത്തിന്‍റെ ആവശ്യമാണെന്നും അദ്ദേഹം പറഞ്ഞു. അഡ്വ. വിവേക് ഹരിദാസ് അധ്യക്ഷത വഹിച്ചു. പ്രതിഷേധ മാർച്ച് പോലീസ് തടഞ്ഞു വഴിയിൽ പ്രതിഷേധം തുടർന്നു.

കീഴ്മാട് പൈപ്പ് പൊട്ടി ജലവിതരണം മുടങ്ങി

ആലുവ: കീഴ്മാട് മടപ്പിള്ളി താഴം ഭാഗത്ത് കുടിവെള്ള പൈപ്പ് പൊട്ടി. വ്യാപാര ശാലയിലേക്ക് വെള്ളം ഇരമ്പിക്കയറി വിൽപ്പനയ്ക്ക് വച്ചിരുന്ന സാധനങ്ങൾ നശിച്ചതായി പരാതി. ഇന്നലെ മാടപ്പള്ളി താഴത്ത് കട നടത്തുന്ന മണിയുടെ കടയിലാണ് വെള്ളം കയറിയത്. അറ്റകുറ്റപ്പണി ആരംഭിച്ചു. ഇതിനെ തുടർന്ന് ജിടിഎൻ, നാലാംമൈൽ, റേഷൻകട കവല മുതലായ മേഖലകളിൽ ജലവിതരണം മുടങ്ങി.

തുരുത്ത് റോഡിൽ വെള്ളക്കെട്ട് ; യാത്രക്കാർ ദുരിതത്തിൽ

ആലുവ: തുരുത്ത് സർക്കാർ സ്കൂളിന് സമീപം മനയ്ക്കപ്പടി റോഡിൽ വെള്ളക്കെട്ട് രൂക്ഷം. മഴ പെയ്താൽ ഇവിടെ പൊതുമരാമത്ത് റോഡ് വെള്ളത്തിൽ മുങ്ങിയാൽ മുട്ടിന് മീതെ വെള്ളത്തിലൂടെ വേണം കാൽനടയാത്രികർക്ക് സഞ്ചരിക്കാൻ. തുരുത്തിലെ ഏക സർക്കാർ കെവൈഎൽപി സ്കൂളിലെ വിദ്യാർഥികളും വെള്ളക്കെട്ട് മൂലം യാത്ര ചെയ്യാനാവാതെ ബുദ്ധിമുട്ടുകയാണ്. രക്ഷകർത്താക്കളെത്തിയാണ് വിദ്യാർത്ഥികളെ കൊണ്ടു പോകുന്നത്. മണിക്കൂറുകൾ കഴിഞ്ഞാലേ ഇവിടത്തെ വെള്ളക്കെട്ട് അൽപ്പമെങ്കിലും ശമനമാകൂ. മഴ വെള്ളം ഒഴുകി പോകുവാൻ കാനയില്ലാത്തതാണ് ഇവിടത്തെ ശക്തമായ വെള്ളക്കെട്ടിന് കാരണം. റോഡിന് സമീപം മുന്നൂറ് മീറ്റർ കാന നിർമിച്ച് വെള്ളം സുഗമമായി ഒഴുകിപ്പോകാൻ അടിയന്തിര നടപടി കൈക്കൊള്ളണമെന്ന് തുരുത്ത് സമന്വയ ഗ്രാമവേദി ആവശ്യപ്പെട്ടു.

ബിജെപി എറണാകുളം മേഖലാ നേതൃ ശില്പശാല ഇന്ന് ഒക്കലില്‍

പെരുമ്പാവൂര്‍: ബിജെപി എറണാകുളം മേഖലാ നേതൃ ശില്പശാല ഇന്ന് രാവിലെ ഒന്പത് മുതല്‍ വൈകുന്നേരം അഞ്ചു വരെ ഒക്കല്‍ ആസാദ് ഓഡിറ്റോറിയത്തില്‍ നടക്കും. ദേശീയ നിര്‍വാഹക സമിതി അംഗം സി.കെ. പത്മനാഭന്‍ ഉദ്ഘാടനം ചെയ്യും. മേഖലാ പ്രസിഡന്‍റ് എ. നാഗേഷ് അധ്യക്ഷനാകും. വിവിധ സെഷനുകളിലായി സംസ്ഥാന ജനറല്‍ സെക്രട്ടറിമാരായ എം.ടി. രമേഷ്, അഡ്വ. എസ്. സുരേഷ്, അനൂപ് ആന്‍റണി, സംസ്ഥാന വൈസ് പ്രസിഡന്‍റ് വി.ഉണ്ണികൃഷ്ണന്‍ മാസ്റ്റര്‍ എന്നിവര്‍ ക്ലാസെടുക്കും.

രായമംഗലം ബഡ്‌സ് സ്‌കൂളില്‍ ചവിട്ടി നിര്‍മാണ യൂണിറ്റ്

പെരുമ്പാവൂര്‍: രായമംഗലം ഗ്രാമ പഞ്ചായത്ത് ബഡ്സ് സ്‌കൂളില്‍ തൊഴില്‍ പരിശീലന പദ്ധതിയുടെ ഭാഗമായി ചവിട്ടി നിര്‍മാണ യൂണിറ്റ് തുടങ്ങി. കുടുംബശ്രീ ജില്ലാ മിഷന്‍ പദ്ധതിയില്‍ നിന്നനുവദിച്ച 2.40 ലക്ഷം രൂപ വിനിയോഗിച്ചാണ് പ്രവര്‍ത്തനം ആരംഭിച്ചത്. ബഡ്സ് സ്‌കൂളിലെ വിദ്യാര്‍ഥികള്‍ക്കും മാതാപിതാക്കള്‍ക്കും സ്വയംതൊഴില്‍ വരുമാനം ലഭിക്കുന്നതിന് ലക്ഷ്യം കണ്ടാണ് പരിശീലന യൂണിറ്റുകള്‍ പ്രവര്‍ത്തിക്കുന്നത്. പഞ്ചായത്ത് പ്രസിഡന്‍റ് എന്‍.പി. അജയകുമാര്‍ ഉദ്ഘാടനം ചെയ്തു. ഉത്പന്നതിന്‍റെ ആദ്യവില്പന ജില്ലാ പഞ്ചായത്തംഗം ഷൈമി വര്‍ഗീസ് നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് ദീപ ജോയ് അധ്യക്ഷത വഹിച്ചു. ചവിട്ടിയുടെ പ്രദര്‍ശനം, വിപണനം, ഓണാഘോഷപരിപാടിയുടെ ഭാഗമായി വിദ്യാര്‍ഥികളുടെ കലാപരിപാടികള്‍, പൂക്കളമൊരുക്കല്‍ സമ്മാനദാനം എന്നിവ ഉണ്ടായിരുന്നു.

കളമശേരിയിൽ വയോജന സംഗമം

കളമശേരി: വയോജനങ്ങളുടെ അറിവും അനുഭവവും ഉപയോഗിച്ച് സമൂഹത്തിന് ഗുണങ്ങളുണ്ടാക്കാനാകുമെന്ന ആശയമാണ് കൃഷിക്കൊപ്പം കളമശേരി എന്ന പദ്ധതിയിലൂടെ മന്ത്രി പി. രാജീവ് മുന്നോട്ട് വെയ്ക്കുന്നതെന്ന് ഡോ. ടി.എം. തോമസ് ഐസക്. കളമശേരി കാർഷികോത്സവ നഗറിൽ വയോജന സംഗമം ഉദ്ഘാടനം ചെയ്യുകയായിരുന്നു അദ്ദേഹം. വ്യവസായ മന്ത്രി പി. രാജീവ് ചടങ്ങിൽ അധ്യക്ഷനായി. കളമശേരി നിയോജക മണ്ഡലത്തെ വയോജന സൗഹൃദമാക്കാൻ വയോജനങ്ങൾക്കൊപ്പം പരിപാടി നടപ്പാക്കുമെന്ന് മന്ത്രി പി. രാജീവ് പറഞ്ഞു. വയോജന സംഗമത്തിൽ അധ്യക്ഷ പ്രസംഗം നടത്തുകയായിരുന്നു അദ്ദേഹം. തദ്ദേശ സ്ഥാപനങ്ങളിൽ വയോജന സംഗമം സംഘടിപ്പിക്കുമെന്നും മന്ത്രി അറിയിച്ചു.

നന്മവീട്: ആദ്യ വീടിന്‍റെ താക്കോൽ ദാനം നടത്തി

നെടുമ്പാശേരി: അത്താണി സെന്‍റ് ഫ്രാൻസിസ് അസീസി ഇംഗ്ലീഷ് മീഡിയം ഹൈസ്കൂളിന്‍റെ ആഭിമുഖ്യത്തിൽ 2023- 24 അധ്യയന വർഷം ആരംഭംകുറിച്ച അസീസിയൻ നന്മവീട് പദ്ധതിയുടെ ഭാഗമായി നിർമിച്ച ആദ്യ ഭവനത്തിന്‍റെ താക്കോൽ ദാനം നടത്തി. നെടുമ്പാശേരി ഗ്രാമ പഞ്ചായത്ത് പ്രസിഡന്‍റ് എ.വി. സുനിൽ നിർവഹിച്ചു . ചടങ്ങിൽ റവ. ഡോ. വർഗീസ് അസിൻ തൈപ്പറമ്പിൽ, ഹെഡ്മിസ്ട്രസ് ന്യൂബി വർഗീസ്, ഫാ. അൻസിൽ മൈപ്പാൻ, പിടിഎ പ്രതിനിധികളായ കെ.വി. ഷാലി, കാതറിൻ ലിൻസൺ, ടി സി ഷൈബി , ജെസി മാർട്ടിൻ , ശ്രീലക്ഷ്മി , ജിന്നി രാജഗോപാൽ എന്നിവർ പ്രസംഗിച്ചു.10 ലക്ഷത്തോളം രൂപ ചെലവാക്കി ഇരുനിലകളിലായി നിർമിച്ച വീടിന് 750 സ്ക്വയർ അടി വിസ്തീർണം ഉണ്ട് . സ്കൂളിലെ വിദ്യാർഥികളുടെയും രക്ഷിതാക്കളുടെയും സഹകാരികളുടെയും സഹകരണത്തോടെ പത്തുമാസം കൊണ്ട് ഈ പദ്ധതി പൂർത്തീകരിച്ചത് .

എ.പി. കുര്യന്‍റെ സംഭാവനകൾ വലുത്: എം. വിജയകുമാർ

അങ്കമാലി: നിയമസഭാ മുൻ സ്പീക്കർ എ.പി. കുര്യന്‍റെ ഇരുപത്തിനാലാമത് ചരമ വാർഷിക അനുസ്മരണം മുൻ സ്പീക്കർ എം. വിജയകുമാർ ഉദ്ഘാടനം ചെയ്തു. സിഎസ്എ വൈസ് പ്രസിഡന്‍റ് എം.പി.രാജൻ അധ്യക്ഷത വഹിച്ചു. നിയമസഭയ്ക്കകത്തും രാഷ്ട്രീയ ഇടപെടലുകളിലും എ.പി. കുര്യന്‍റെ സംഭാവനകൾ വളരെ വലുതാണെന്ന് അദ്ദേഹം പറഞ്ഞു.എ.പി.യുടെ നിയമസഭാ രേഖകൾ സിഎസ്എ പുസ്തകമാക്കണമെന്നും എം. വിജയകുമാർ അഭിപ്രായപ്പെട്ടു. സിഎസ്എ സുവർണ ജൂബിലി സുവനീർ എം. വിജയകുമാറിന് നൽകി. കെ.എൻ. വിഷ്ണു മാസ്റ്റർ ആമുഖ പ്രഭാഷണം നടത്തി. ബെന്നി ബഹനാൻ എംപി, റോജി എം. ജോൺ എംഎൽഎ., നഗരസഭാ ചെയർമാൻ അഡ്വ. ഷിയോ പോൾ, മുൻ മന്ത്രി അഡ്വ. ജോസ് തെറ്റയിൽ, അഡ്വ. കെ.കെ. ഷിബു, കെ. തുളസി ടീച്ചർ, കെ.പി. റെജീഷ്, അഡ്വ. വി.കെ. ഷാജി, പോൾ ജോവർ, ടോണി പറമ്പി എന്നിവർ പ്രസംഗിച്ചു.

കോളജ് കാന്പസുകളിലെ പരിശോധന : കോമ്പൗണ്ടിംഗ് ഫീസിനത്തിൽ 1.5 ലക്ഷം ഈടാക്കി

പെരുമ്പാവൂര്‍: സബ് ആര്‍ടി ഓഫീസിന്‍റെ പരിധിയില്‍ ഓണാഘോഷത്തോടനുബന്ധിച്ച് കോളജ് കാമ്പസുകളിലും പരിസരങ്ങളിലും ബുധനാഴ്ച നടത്തിയ പ്രത്യേക പരിശോധനയില്‍ 33 കേസുകളില്‍ നിന്നായി കോമ്പൗണ്ടിംഗ് ഫീസായി 1, 56, 250 രൂപ ഈടാക്കി. റോഡ് ഷോയ്ക്ക് വേണ്ടി ഉപയോഗിച്ച രജിസ്‌ട്രേഷന്‍ മാര്‍ക്ക് ഇല്ലാത്ത രണ്ട് വാഹനങ്ങള്‍ കസ്റ്റഡിയില്‍ എടുത്തു. അനധികൃതമായ രൂപമാറ്റങ്ങള്‍ വരുത്തിയ വാഹനങ്ങള്‍ പരിശോധനയില്‍ കണ്ടെത്തി പിഴചുമത്തുകയും നീക്കം ചെയ്യുകയും ചെയ്തു. എംവിഐമാരായ നോബി, ബിനോയ് കുമാര്‍ എന്നിവരുടെ നേതൃത്വത്തില്‍ നടത്തിയ വാഹന പരിശോധനയില്‍ എഎംവിഐമാരായ ദിനേശ് കുമാര്‍, അജിത്, ശ്രീജിത്ത്, ബോണികൃഷ്ണ എന്നിവര്‍ പങ്കെടുത്തു. വരും ദിവസങ്ങളില്‍ പരിശോധന തുടരുമെന്നും നിയമലംഘനത്തിന് ലൈസന്‍സ്, രജിസ്‌ട്രേഷന്‍ എന്നിവ റദ്ദാക്കുന്നതുള്‍പ്പെടെയുള്ള കര്‍ശന നടപടികള്‍ സ്വീകരിക്കുമെന്ന് ജോയിന്‍റ് ആര്‍ടിഒ എസ്.എസ്. പ്രദീപ് അറിയിച്ചു.

മഴ ചതിച്ചു; ടൈൽ പാകൽ അവതാളത്തിലായി : ആലുവ-മൂന്നാർ റോഡിൽ ഗതാഗതക്കുരുക്ക് രൂക്ഷം

ആലുവ: റോഡിൽ ടൈലുകൾ പാകുന്നത് പാതിവഴിയിൽ ആവതാളത്തിലായതോടെ ആലുവ-മൂന്നാർ റോഡിൽ കാർമൽ മുതൽ രാജഗിരി വരെ ഗതാഗതക്കുരുക്ക് രൂക്ഷമായി. ഇന്നലെ രാവിലെ മുതൽ ആലുവ മേഖലയിൽ കനത്തമഴ പെയ്തതും ബസുകൾ റൂട്ട് മാറിയോടിയതും യാത്രാ ദുരിതം ഇരട്ടിയാക്കി. ചൂണ്ടി, കൊച്ചിൻ ബാങ്ക്, കാർമൽ ജംഗ്ഷനുകളിൽ കഴിഞ്ഞ ദിവസം ആരംഭിച്ച ടൈൽ വിരിക്കലാണ് മുടങ്ങിയത്. ഇതിനായി പാകിയ മെറ്റലുകളും വെള്ളക്കെട്ടിലായി. വാഹനങ്ങൾക്ക് വളരെ പതുക്കെ മാത്രമാണ് ഇതിലൂടെ കടന്നു പോകാനാകുന്നത്. ഇതോടെ പെരുമ്പാവൂർ, പൂക്കാട്ടുപടി റൂട്ടിലോടുന്ന യാത്രാ ബസുകൾ വൈകിയാണ് ഓടുന്നത്. ഓടിയെത്താൻ മണിക്കൂറുകൾ എടുക്കുന്നുവെന്ന പേരിൽ ഭൂരിഭാഗം പെരുമ്പാവൂർ സ്വകാര്യ ബസുകൾ റൂട്ട് മാറ്റിയാണ് കടന്നു പോയത്. കെഎസ്ആർടിസി റൂട്ടിലൂടെ കുട്ടമശേരി-കീഴ്മാട് സർക്കുലർ രാജഗിരി ആശുപത്രിയുടെ മുന്നിലെത്തിയാണ് യാത്ര തുടർന്നത്. ബിഎംബിസി നിലവാരത്തിൽ ടാറിംഗ് നടത്തുന്നതിന് അഞ്ച് കോടി രൂപയുടെ ടെൻഡർ നടപടികൾ പൂർത്തിയായിട്ടും പണി നടക്കാത്തതിനാലാണ് പ്രധാന ജംഗ്ഷനുകളിൽ ടൈലുകൾ പാകാൻ തീരുമാനിച്ചത്. എന്നാൽ ടൈൽ പാകലും മുടങ്ങിക്കിടക്കുകയാണ്.

വരുമാനം കണ്ടെത്താന്‍ സുഭാഷ് പാര്‍ക്ക് : പരിപാടികള്‍ക്കു വിട്ടുനല്‍കുന്നു

കൊച്ചി: സായാഹ്നങ്ങളില്‍ സമയം ചെലവിടുന്നതിനായി കൊച്ചിക്കാരുടെ പ്രിയ ഇടമായ സുഭാഷ് പാര്‍ക്ക് വരുമാന നേട്ടത്തിനായി ഇതര പരിപാടികള്‍ക്കു വിട്ടുനല്‍കാന്‍ നീക്കം. കഴിഞ്ഞ ദിവസം ഇതു സംബന്ധിച്ച് അജണ്ട കൗണ്‍സിലില്‍ വന്നെങ്കിലും പ്രതിപക്ഷ ബഹളത്തെത്തുടര്‍ന്ന് യോഗം അലസിപ്പിരഞ്ഞതിനാല്‍ ചര്‍ച്ച ഇല്ലാതെ അജണ്ട പാസാക്കി. പാര്‍ക്കിന്‍റെ സ്വഭാവത്തിന് ഇളങ്ങുന്ന പരിപാടികള്‍ക്കു മാത്രമേ അനുമതി നല്‍കുകയുള്ളൂവെന്നാണ് കോര്‍പറേഷന്‍റെ ഉറപ്പ്. എന്നാല്‍ ഇതുമൂലം പാര്‍ക്കിലെ ശാന്തമായ അന്തരീക്ഷം ഇല്ലാതാകുമെന്നാണ് പ്രതിപക്ഷം ആരോപിക്കുന്നത്. ടൗണ്‍ പ്ലാനിംഗ് കമ്മിറ്റിയാണ് ആശയത്തിനു പിന്നില്‍. പാര്‍ക്കിന്‍റെ പ്രവര്‍ത്തനത്തിനും പരിപാലനത്തിനും വരുമാനം കണ്ടെത്തുകയെന്നതാണ് ലക്ഷ്യം. പാര്‍ക്കിനുള്ളിലെ കൂത്തമ്പലം, ഓപ്പണ്‍ സ്റ്റേജ് തുടങ്ങിയ ഇടങ്ങളാണ് വിട്ടുനല്‍കുക. പരിപാടികള്‍ സംഘടിപ്പിക്കുന്നതിനായി ടൗണ്‍ പ്ലാനിംഗ് കമ്മിറ്റിക്ക് അപേക്ഷ നല്‍കണം. കമ്മിറ്റി അപേക്ഷകള്‍ പരിശോധിച്ച ശേഷം പാര്‍ക്കിന് അനിയോജ്യമായവയ്ക്ക് അനുമതി നല്‍കും. കോര്‍പറേഷന്‍റെ സഹോദര സ്ഥാപനമായ സെന്‍റര്‍ ഫോര്‍ ഹെറിറ്റേജ്, എന്‍വയോണ്‍മെന്‍റ് ആന്‍ഡ് ഡെവലപ്‌മെന്‍റ് (സിഹെഡ്) ആണ് പാര്‍ക്കിന്‍റെ നടത്തിപ്പും പരിപാലനവും ചെയ്തുവരുന്നത്. അറ്റകുറ്റപ്പണികള്‍ക്കും തൊഴിലാളികള്‍ക്കുള്ള ശമ്പളത്തിനും മറ്റും പണം കണ്ടെത്തിയിരുന്നത് പൊതുമേഖലാ സ്ഥാപനങ്ങളില്‍ നിന്നുള്ള സിഎസ്ആര്‍ ഫണ്ടുകളില്‍ നിന്നാണ്. ഈ പണം എല്ലായിപ്പോഴും ലഭിക്കണമെന്നുമില്ല. ഫണ്ട് ലഭിക്കാതെ വന്നാലും പാര്‍ക്കിന്‍റെ പരിപാലനം മുടങ്ങാതിരിക്കാനാണ് മറ്റു വരുമാന മാര്‍ഗങ്ങള്‍കൂടി തേടുന്നതെന്നാണ് കോര്‍പറേഷന്റെ പക്ഷം. എന്നാല്‍ പാര്‍ക്കിനെ സ്വകാര്യ വത്കരിക്കാനുള്ള നീക്കത്തിന്‍റെ ആദ്യപടിയാണിതെന്നാണ് പ്രതിപക്ഷം ആരോപിക്കുന്നത്. മറ്റു പാര്‍ക്കുകളുടെ പരിപാലനത്തിനും നടത്തിപ്പിനും ലക്ഷങ്ങള്‍ തനതുഫണ്ടില്‍ നിന്ന് ചെലവഴിക്കുമ്പോള്‍ സുഭാഷ് പാര്‍ക്കില്‍ മറ്റു ധനസമാഹരണ മാര്‍ഗങ്ങള്‍ തേടുന്നത് എന്താണെന്ന് പ്രതിപക്ഷ നേതാവ് ആന്‍റണി കുരീത്തറയും പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടിലും ചോദിച്ചു. പദ്ധതിയോടുള്ള എതിര്‍പ്പ് പ്രതിപക്ഷം രേഖമൂലം മേയര്‍ക്ക് കൈമാറിയിട്ടുണ്ടെന്നും ഇരുവരും പറഞ്ഞു.

കാഷ്മീര്‍ സ്വദേശിയുടെ പണവും മൊബൈലും കവര്‍ന്നവർ അറസ്റ്റില്‍

കൊച്ചി: കാഷ്മീര്‍ സ്വദേശിയായ യുവാവിന്‍റെ പണവും മൊബൈല്‍ ഫോണും കവർന്ന സംഭവത്തില്‍ പ്രതികള്‍ അറസ്റ്റില്‍. വൈപ്പിന്‍ മാലിപ്പുറം സ്വദേശി ഹനീസ്, മട്ടാഞ്ചേരി സ്വദേശി ജെന്‍സണ്‍, പള്ളുരുത്തി സ്വദേശി ഗഫൂര്‍ എന്നിവരെയാണ് മട്ടാഞ്ചേരി പോലീസ് പിടികൂടിയത്. മട്ടാഞ്ചേരി പോലീസ് സ്റ്റേഷന്‍ പരിധിയില്‍ താമസിച്ച് ജോലിനോക്കിവന്ന കാഷ്മീര്‍ സ്വദേശി ഹാരിസ് ബിന്‍ റിയാസിന്‍റെ പണവും മൊബൈല്‍ ഫോണുമാണ് പ്രതികള്‍ കവര്‍ന്നത്. സിസിടിവി കേന്ദ്രീകരിച്ച് നടത്തിയ അന്വേഷണത്തിലാണ് പ്രതികൾ കുടുങ്ങിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കൂത്താട്ടുകുളത്തിന്‍റെ നായകരെ ഇന്നറിയാം

കൂത്താട്ടുകുളം: നഗരസഭയിലെ ചെയർപേഴ്സൺ, വൈസ് ചെയർമാൻ തെരഞ്ഞെടുപ്പ് ഇന്ന്. രാവിലെ 11ന് ചെയർപേഴ്സൺ തെരഞ്ഞെടുപ്പും ഉച്ചകഴിഞ്ഞ് രണ്ടിന് വൈസ് ചെയർമാൻ തെരഞ്ഞെടുപ്പും നടക്കുക. യുഡിഎഫ് ധാരണ പ്രകാരം കലാ രാജു ചെയർപേഴ്സൺ സ്ഥാനത്തേക്കും പി.ജി. സുനിൽകുമാർ വൈസ് ചെയർമാൻ സ്ഥാനത്തേക്കും മത്സരിക്കും. എൽഡിഎഫ് ഇതുവരെ സ്ഥാനാർഥികളെ പ്രഖ്യാപിച്ചിട്ടില്ല. കഴിഞ്ഞ അഞ്ചിന് നടന്ന അവിശ്വാസപ്രമേയ ചർച്ചയിൽ യുഡിഎഫിന് ഒപ്പംനിന്ന് സിപിഎം കൗൺസിലർ കലാ രാജുവും സ്വതന്ത്ര കൗൺസിലർ പി.ജി.സുനിൽകുമാറും വോട്ട് ചെയ്‌തതിനെ തുടർന്നാണ് നഗരസഭാ ഭരണം നി എൽഡിഎഫിന് നഷ്‌ടമായത്. ഇതേ തുടർന്നു വികസനകാര്യ സ്ഥിരം സമിതി അധ്യക്ഷ ജിജി ഷാനവാസിന് ചെയർപേഴ്സന്‍റെ താൽക്കാലിക ചുമതല നൽകിയിരുന്നു. യുഡിഎഫ് ധാരണപ്രകാരം ചെയർപേഴ്സൻ സ്ഥാനം യുഡിഎഫിലെ വനിതാ കൗൺസിലർമാരിൽ ഒരാൾക്ക് നൽകാനാണിരുന്നത്. ഇതിനിടെയാണ് കലാ രാജു ചെയർപേഴ്സൺ സ്ഥാനം ആവശ്യപ്പെട്ട് രംഗത്തുവന്നത്. ഇതേ തുടർന്ന് ബുധനാഴ്ച വൈകുന്നേരം പിറവത്ത് ചേർന്ന യുഡിഎഫ് പാർലമെന്‍ററി പാർട്ടി യോഗത്തിലാണ് തീരുമാനം ഉണ്ടായത്. എൽഡിഎഫിൽനിന്ന് യുഡിഎഫിലേക്ക് എത്തിയ കൗൺസിലർ കലാ രാജുവിനെ ചെയർപേഴ്സൺ സ്ഥാനാർഥി ആക്കുന്നതിനും സുനിൽകുമാറിനെ വൈസ് ചെയർമാൻ സ്ഥാനാർഥിയാക്കുന്നതിനും ഐകകണ്ഠ്യേന തീരുമാനിച്ചു. അനൂപ് ജേക്കബ് എംഎൽഎ, ഡിസിസി പ്രസിഡന്‍റ് മുഹമ്മദ് ഷിയാസ് തുടങ്ങിയവർ ചർച്ചയ്ക്ക് എത്തിയിരുന്നു.

ഗ്യാസ് സിലിണ്ടറിന് തീപിടിച്ചു

അരൂർ: വീട്ടിലെത്തിച്ച പുതിയ ഗ്യാസ് സിലിണ്ടറിൽ റെഗുലേറ്റർ ഘടിപ്പിക്കുന്നതിനിടെ തീപിടിച്ചു. തുറവൂർ ഗ്രാമപഞ്ചായത്ത് വാർഡ് രണ്ടിൽ പരവക്കത്തറ രന്ദീപിന്‍റെ വീട്ടിലാണ് സംഭവം. സിലിണ്ടറിൽ റെഗുലേറ്റർ ഘടിപ്പിച്ചശേഷം തുറന്നപ്പോൾ ഗ്യാസ് ചോർന്ന് മണ്ണെണ്ണ വിളക്കിൽനിന്ന് തീപിടിക്കുകയായിരുന്നു. തീ പടർന്നതിനെ തുടർന്ന് വാഷിംഗ് മെഷീൻ, മിക്സി, മൊബൈൽ ഫോൺ, ഇലക്ട്രിക് വയറിംഗ്, അടുക്കളയിൽ സാധനങ്ങൾ സൂക്ഷിച്ചിരുന്ന പ്ലാസ്റ്റിക് ടിന്നുകൾ, പാത്രങ്ങൾ തുടങ്ങിയവ കത്തിനശിച്ചു. ഗൃഹനാഥൻ, നീളമുള്ള കമ്പി ഉപയോഗിച്ച് സിലിണ്ടറും സ്റ്റൗവും വീടിന് വെളിയിലേക്ക് കൊണ്ടുപോ‌യതുകൊണ്ട് വലിയൊരു അപകടം ഒഴിവായി.

ഭരണവിരുദ്ധ വികാരത്തെ സിപിഎം വഴിതിരിച്ചുവിടുന്നു: മുഹമ്മദ് ഷിയാസ്

കൊച്ചി: ഭരണ നേതൃത്വത്തില്‍ ഇരിക്കുന്നവര്‍ക്കെതിരെ ഉയരുന്ന അഴിമതി മറയ്‌ക്കാന്‍ ഡിവൈഎഫ്‌ഐയെ കളത്തിലിറക്കി സിപിഎം സംഘര്‍ഷത്തിനാണ് ശ്രമിക്കുന്നതെന്ന് ഡിസിസി പ്രസിഡന്റ് മുഹമ്മദ് ഷിയാസ്. ഷാഫി പറമ്പില്‍ എംപിക്കെതിരായ ഡിവൈഎഫ്‌ഐ അക്രമത്തില്‍ പ്രതിഷേധിച്ച് ജില്ലാ കോണ്‍ഗ്രസ് കമ്മിറ്റി സംഘടിപ്പിച്ച പ്രതിഷേധ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സിപിഎം സംസ്ഥാന സെക്രട്ടറി എം.വി. ഗോവിന്ദനും മകനും ഉള്‍പ്പെട്ട ഹവാല, റിവേഴ്‌സ് ഹവാല ഇടപാടില്‍ മന്ത്രിമാരും പങ്കുപറ്റിയെന്ന് ഗുരുതരമായ ആരോപണം ഉയര്‍ന്നിട്ടുണ്ട്. ഇത് മറക്കാനാണ് ഡിവൈഎഫ്‌ഐ കോണ്‍ഗ്രസ് നേതാക്കള്‍ക്കെതിരെ സമരം അഴിച്ചു വിടുന്നതെന്ന് ഷിയാസ് പറഞ്ഞു. ഷാഫിക്കെതിരായ സിപിഎം ആക്രമത്തില്‍ വരും ദിവസങ്ങളില്‍ കോണ്‍ഗ്രസ് കൂടുതല്‍ ശക്തമായ പ്രതിഷേധപരിപാടികള്‍ ആസൂത്രണം ചെയ്യുമെന്ന് മുഹമ്മദ് ഷിയാസ് കൂട്ടിച്ചേര്‍ത്തു. ഡിസിസി ഓഫീസില്‍ നിന്നാരംഭിച്ച മാര്‍ച്ച് എംജി റോഡില്‍ സമാപിച്ചു. പ്രതിഷേധ പ്രകടനത്തിന് നേതാക്കളായ അബ്ദുള്‍ ലത്തീഫ്, പി.വി. സജീവന്‍, സിജോ ജോസഫ്, അജിത്ത് അമീര്‍ ബാവ, എം.ജി.അരിസ്റ്റോട്ടില്‍, ജോഷി പള്ളന്‍, സഫല്‍ വലിയവീടന്‍, ശോഭ, പി.വൈ. ഷാജഹാന്‍, ടിബിന്‍ ദേവസി, എം.എ. ജോസി, നോബല്‍ കുമാര്‍ തുടങ്ങിയവര്‍ നേതൃത്വം നല്‍കി.

മദ്യപിച്ചതിന്‍റെ പണം ചോദിച്ച് തര്‍ക്കം : കളമശേരിയില്‍ യുവാവിനെ കുത്തിക്കൊന്നു

കളമശേരി: ഒരുമിച്ചിരുന്നു മദ്യപിച്ചതിന്‍റെ പണം ചോദിച്ചുണ്ടായ തര്‍ക്കത്തെ തുടർന്ന് കളമശേരിയില്‍ യുവാവിനെ കുത്തിക്കൊന്നു. മൂന്നംഗ സംഘം അറസ്റ്റിൽ. ഞാറക്കല്‍ കിഴക്കേപ്പാടത്ത് നികത്തിത്തറ വിനോദ് കുമാറിന്‍റെ മകന്‍ വിവേക് (25) ആണ് കൊല്ലപ്പെട്ടത്. സംഭവത്തില്‍ എറണാകുളം വട്ടേക്കുന്നം സ്വദേശി സനോജ്(39), തൃശൂര്‍ തലപ്പിള്ളി സ്വദേശി പ്രസാദ്(28), കളമശേരി ഗ്ലാസ് ഫാക്ടറി കോളനി സ്വദേശി ജോയല്‍ ബെന്നി(24) എന്നിവരെ കളമശേരി പോലീസ് അറസ്റ്റ് ചെയ്തു. കളമശേരി ഗ്ലാസ് ഫാക്ടറി കോളനിയില്‍ ബാുധനാഴ്ച രാത്രി 11ഓടെയായിരുന്നു സംഭവം. കൊലപാതകത്തെതുടർന്ന് രക്ഷപ്പെട്ട സനോജിനെയും പ്രസാദിനെയും വൈറ്റില ജംഗ്ഷനില്‍നിന്നും, ജോയല്‍ ബെന്നിയെ കളമശേരി ഗ്ലാസ് ഫാക്ടറി കോളനി പരിസരത്തുനിന്നുമാണ് പോലീസ് പിടികൂടിയത്. വിവേകിന്‍റെ മൃതദേഹം കളമശേരി മെഡിക്കല്‍ കോളജിലെ പോസ്റ്റ്‌മോര്‍ട്ടത്തിന് ശേഷം സംസ്‌കരിച്ചു. ഉഷയാണ് വിവേകിന്‍റെ അമ്മ, ഭാര്യ സ്നേഹ. മകൾ രണ്ടു വയസുകാ രി അൻബി. കൊല്ലപ്പെട്ട വിവേകും പ്രതികളും ഒരുമിച്ചിരുന്ന് മദ്യപിച്ചതിന്‍റെ പണത്തെ ചൊല്ലിയുള്ള തര്‍ക്കവും മർദനവുമാണ് കൊലപാതകത്തില്‍ കലാശിച്ചതെന്ന് പോലീസ് പറഞ്ഞു. ഒന്നാം പ്രതിയായ സനോജ് മദ്യപിച്ചതിന്‍റെ പണം ആവശ്യപ്പെട്ടത് ഇഷ്ടപ്പെടാതിരുന്ന വിവേക് സനോജിനെയും രണ്ടാംപ്രതി പ്രസാദിനെയും ദേഹോപദ്രവം ഏല്‍പ്പിച്ചിരുന്നു. ഇതിന്‍റെ വൈരാഗ്യത്തില്‍ പ്രതികൾ വീണ്ടും ഒരുമിച്ച് മദ്യപിച്ച ശേഷം വിവേകിന്‍റെ സുഹൃത്തും കേസിലെ മൂന്നാം പ്രതിയുമായ ജോയലിനെയും കൂട്ടി രാത്രി 11ഓടെ കളമശേരി ഗ്ലാസ് ഫാക്ടറി കോളനിയില്‍ വാടകയ്ക്കു താമസിക്കുന്ന വിവേകിന്‍റെ വീട്ടില്‍ എത്തുകയായിരുന്നു. ജോയല്‍ വിവേകിനെ സൗഹൃദം നടിച്ച് വീടിനു പുറത്തിറക്കിയതിന് പിന്നാലെ സനോജും പ്രസാദും ചേര്‍ന്ന് വിവേകിനെ മര്‍ദിക്കുകയും സനോജ് കൈയില്‍ കരുതിയിരുന്ന കത്തി വിവേകിന്‍റെ നെഞ്ചില്‍ കുത്തുയിറക്കുകയുമായിരുന്നു. ആക്രമണത്തിനു പിന്നാലെ പ്രതികള്‍ ഓടി രക്ഷപ്പെട്ടു. ബഹളം കേട്ടെത്തിയ ബന്ധുക്കളാണ് വിവേകിനെ കളമശേരി മെഡിക്കല്‍ കോളജില്‍ പ്രവേശിപ്പിച്ചത്. ഗുരുതരമായി പരിക്കേറ്റ വിവേക് ഇന്നലെ പുലര്‍ച്ചെ 1.30ഓടെ മരണപ്പെടുകയായിരുന്നു. കൊച്ചി ഡിസിപി അശ്വതി ജിജി, തൃക്കാക്കര എസിപി പി.എസ്. ഷിജു എന്നിവര്‍ സംഭവസ്ഥലം സന്ദര്‍ശിച്ചു. തെളിവെടുപ്പിനു ശേഷം പ്രതികളെ കോടതിയില്‍ ഹാജരാക്കും.

വിമാനത്താവളത്തിലേക്ക് വാട്ടര്‍മെട്രോ; പ്രാരംഭ പഠനം ആരംഭിച്ചു

കൊച്ചി: വാട്ടര്‍ മെട്രോ ആലുവയില്‍നിന്ന് നെടുമ്പാശേരി വിമാനത്താവളത്തിലേക്ക് സര്‍വീസ് ആരംഭിക്കുന്നത് സംബന്ധിച്ച സാധ്യതാപഠനം നടത്തുന്നതിന് മുന്നോടിയായുള്ള പ്രാരംഭ പ്രവര്‍ത്തനങ്ങള്‍ കൊച്ചി മെട്രോ റെയില്‍ ലിമിറ്റഡ് ആരംഭിച്ചു.പ്രാരംഭപഠനത്തിനായി രൂപീകരിച്ച ആഭ്യന്തര ഉന്നതതല കമ്മിറ്റി പ്രവര്‍ത്തനം തുടങ്ങി. ഒരു മാസത്തിനുള്ളില്‍ റിപ്പോര്‍ട്ട് സമര്‍പ്പിക്കും. പ്രാരംഭ പഠനത്തിന്‍റെ ഭാഗമായി ഏതുതരം ബോട്ടാണ് ഇവിടെ സര്‍വീസ് നടത്താന്‍ സാധ്യയുള്ളത് എന്ന് പഠിക്കും. കണക്ടിവിറ്റി ഏതൊക്കെ മാര്‍ഗത്തിലാകണം എന്നതും പഠനവിധേയമാക്കും. ആലുവ വാട്ടര്‍മെട്രോ ടെര്‍മിനലിലേക്ക് ആലുവ മെട്രോ സ്‌റ്റേഷനെ ബന്ധിപ്പിക്കുന്നതിന് ആകാശപാതയാണോ ഉപകാരപ്രദം എന്ന കാര്യവും പരിശോധിക്കും, ഏകദേശം എട്ട് കിലോമീറ്ററാണ് ആലുവയില്‍നിന്ന് പെരിയാറിലൂടെ വിമാനത്താവളത്തിലേക്കുള്ള ദൂരം. ആലുവയില്‍ നിന്ന് ആരംഭിച്ച് എയര്‍പോര്‍ട്ടില്‍ അവസാനിക്കുന്ന പോയിന്‍റ് ടു പോയിന്‍റ് സര്‍വീസാണോ ഇടയ്ക്ക് സ്‌റ്റോപ്പ് അനുവദിക്കുന്നതാണോ അഭികാമ്യം, എന്തൊക്കെ അടിസ്ഥാന സൗകര്യങ്ങള്‍ വികസിപ്പിക്കണം തുടങ്ങിയ കാര്യങ്ങളും പ്രാരംഭ സാധ്യതാ പഠനത്തിന്‍റെ ഭാഗമായി പരിശോധിക്കും.

മഴഭീതിയില്‍ ഓണം വിപണി; കുരുക്കിലായി നഗരവിഥീകള്‍

കൊച്ചി: ഒരു വര്‍ഷത്തെ കാത്തിരിപ്പിന്‍റെ പ്രതീക്ഷയാണ് വ്യാപാരികള്‍ക്ക് ഓണംവിപണി. വലിയ കച്ചവടം പ്രതീക്ഷിച്ച് വ്യാപാരികള്‍, അപ്രതീക്ഷിതമായി പെയ്യുന്ന മഴ തിരിച്ചടിയുണ്ടാക്കുമോയെന്ന ഭീതിയിലാണ്. ഇന്നും ജില്ലയിലുള്‍പ്പെടെ മഴ പ്രവചിക്കുന്നുണ്ട്. ഓണക്കോടി വാങ്ങാനും ഓണസദ്യയും പൂക്കളവുമൊക്കെ ഒരുക്കുന്നതിനുമായി നിരത്തിലിറങ്ങിയ വാഹനയാത്രക്കാര്‍ മഴയെത്തുടര്‍ന്ന് രൂപപ്പെട്ട ഗതാഗതക്കുരുക്കില്‍പ്പെട്ട് വലയുന്ന കാഴ്ചയാണ്. നഗരത്തിലെ പ്രധാന റോഡുകളിലെല്ലാം രണ്ടു ദിവസം മുന്‍പേ തിരക്ക് തുടങ്ങി. മഴകൂടി പെയ്തതോടെ ഗതാഗതക്കുരുക്ക് രൂക്ഷമായി.ബാനര്‍ജി റോഡിലും ഷണ്‍മുഖം റോഡിലും എസ്എ റോഡിലും സിവില്‍ലൈന്‍ റോഡിലുമൊക്കെ വാഹനങ്ങളുടെ നീണ്ടനിര പതിവുകാഴ്ചയായി. ചങ്ങമ്പുഴ പാര്‍ക്ക് മുതല്‍ പത്തടിപ്പാലം വരെ ഇപ്പോള്‍ തന്നെ വലിയ കുരുക്കാണ്. വിദ്യാഭ്യാസ സ്ഥാപനങ്ങളിലും സര്‍ക്കാര്‍ സ്ഥാപനങ്ങളിലുമൊക്കെ ഓണാഘോഷങ്ങള്‍ നടക്കുന്നതിനാല്‍ തിരക്ക് ഇനിയും കൂടിയേക്കും. വ്യാപാരസ്ഥാപനങ്ങള്‍ ഏറെയുള്ള എംജി റോഡിലും തിരക്കിന് കുറവില്ല. റോഡരികില്‍ വാഹനം പാര്‍ക്ക് ചെയ്യുന്നതാണ് ഇവി‌ടുത്തെ ബ്ലോക്കിന് പ്രധാന കാരണം. മേനക റോഡിലും ബ്രോഡ്‌വേയിലും സ്ഥിതി വിത്യസ്തമല്ല. കൂനിന്മേല്‍ കുരു എന്ന പോലെ റോഡുകളുടെ ശോച്യാവസ്ഥയും ഗതാഗതതടസത്തിന് ഇടയാക്കുന്നുണ്ട്.

ഓണസങ്കല്‍പ്പത്തിലെ ഓണത്താര്‍

കണ്ണൂര്‍, കാസര്‍കോഡ് ജില്ലകളില്‍ ഓണത്തിന്‍റെ വരവറിയിച്ച് വീടുകളില്‍ എത്തുന്ന തെയ്യമാണ് ഓണത്താര്‍. പട്ടുടയാട ചുറ്റി, കിരീടമണിഞ്ഞ്, ചെറു മണിയും ഓണവില്ലും കൈയിലേന്തിയാണ് ഓണത്താറുടെ വരവ്. ചില ഭാഗങ്ങളില്‍ അത്തം മുതല്‍ തിരുവോണം വരെ ഓണത്താര്‍ ഭവനങ്ങളില്‍ എത്തും. കാഞ്ഞങ്ങാട്, നീലേശ്വരം ഭാഗങ്ങളില്‍ മഹാവിഷ്ണു സങ്കല്പമാണ് ഓണത്താറിനുള്ളത്. ബാലരൂപത്തിലുള്ള ശ്രീകൃഷ്ണനായും സങ്കല്പമുണ്ട്. എന്നാല്‍ മറ്റിടങ്ങളില്‍ ഓണത്താർ എന്നാല്‍ മഹാബലി സങ്കല്പമാണ്. ഉത്രാടത്തിനും തിരുവോണത്തിനുമാണ് മഹാബലി സങ്കല്പത്തോടെ ഓണത്താര്‍ ഇവിടങ്ങളില്‍ എത്തുക. പൂക്കളത്തിനു ചുറ്റും ഓണത്താര്‍ പാട്ടിന്‍റെ അകമ്പടിയോടെ നൃത്തംവയ്ക്കും. മഹാബലിയുടെ ആഗമന കഥയാണ് ഇതിവൃത്തം. മാവേലിപ്പാട്ടെന്നും ഓണപ്പാട്ടെന്നും ഇത് പറയപ്പെടുന്നു. വണ്ണാന്‍ സമുദായത്തിലെ ആണ്‍കുട്ടികളാണ് ഓണത്താര്‍ വേഷം കെട്ടുക. പണ്ട് മഹാബലി എന്ന് പേരായ്, ഉണ്ടായി പണ്ടൊരു ദാനവേന്ദ്രന്‍ എന്ന് തുടങ്ങുന്ന പാട്ടില്‍ മാവേലിയുടെ നന്മ നിറഞ്ഞ രാജ്യഭരണവും അതുകണ്ട് വാമനവേഷം പൂണ്ടെത്തുന്ന മഹാവിഷ്ണു, മന്നനെ പാതാളത്തിലേക്ക് അയയ്ക്കുന്നതുമെല്ലാം പാട്ടില്‍ വിശദമാക്കുന്നുണ്ട്. ഓരോ വീട്ടുമുറ്റത്തുമെത്തി ചെണ്ടയില്‍ താളമൊരുക്കി പാടുമ്പോള്‍, തെയ്യം കൈയിലേന്തിയ ചെറുമണി കിലുക്കി ചുവടുവയ്ക്കും. വീട്ടമ്മമാര്‍ പണവും ധാന്യവും നല്‍കി തെയ്യത്തെ യാത്രയാക്കുന്നു.

മത്സ്യബന്ധന വള്ളം പിടികൂടി : അഴിമുഖം ഉപരോധിച്ച് തൊഴിലാളികൾ

വൈപ്പിൻ: ലൈസൻസ് പുതുക്കാത്ത മത്സ്യബന്ധന വള്ളം പിടിച്ചെടുത്തതിൽ പ്രതിഷേധിച്ച് പരമ്പരാഗത മത്സ്യത്തൊഴിലാളികൾ നടത്തിയ പ്രതിഷേധം അഴിമുഖ ഉപരോധമായി മാറി. ഇന്നലെ രാവിലെ കൊച്ചി അഴിമുഖത്തുള്ള വൈപ്പിൻ ഫിഷറീസ് ഓഫീസ് ജെട്ടിക്കു സമീപം തൊഴിലാളികൾ വള്ളങ്ങളുമായി എത്തിയാണ് പ്രതിഷേധിച്ചത്. കായലിൽ നൂറുകണക്കിന് വള്ളങ്ങൾ നിരന്നതോടെ ജങ്കാർ സർവീസ് ഉൾപ്പെടെള്ള മറ്റു യാനങ്ങളുടെ സർവീസിനു തടസമായി. ലൈസൻസ് പുതുക്കാത്ത ജപമാല എന്ന വള്ളം ബുധനാഴ്ചയാണ് ഫിഷറീസ് അധികൃതർ പിടിച്ചെടുത്തത്. തുടർന്ന് രണ്ടരലക്ഷം രൂപ ഫൈൻ അടക്കാതെ വള്ളം വിട്ടുനൽകില്ലെന്നും ഫിഷറീസ് അധികൃതർ അറിയിച്ചു. ഇതേ തുടർന്നാണ് മത്സ്യത്തൊഴിലാളികൾ പ്രതിഷേധവുമായി രംഗത്തെത്തിയത്. കടലിൽ മത്സ്യം കുറഞ്ഞതോടെ മത്സ്യത്തൊഴിലാളികളുടെ വരുമാനം കുറഞ്ഞതും, സർക്കാർ വർഷംതോറും ലൈസൻസ് ഫീസ് കുത്തനെ വർധിപ്പിക്കുന്നതും മൂലം പാവപ്പെട്ട തൊഴിലാളികൾക്ക് ലൈസൻസ് പുതുക്കാൻ കഴിയാതെ വരുന്നുവെന്നാണ് കേരള പരമ്പരാഗത മത്സ്യത്തൊഴിലാളി സമിതി സെക്രട്ടറി പി.വി. ജയൻ പറയുന്നത്. മാത്രമല്ല മത്സ്യത്തൊഴിലാളികൾ അടക്കുന്ന നിശ്ചിത തുകയിൽനിന്നും പഞ്ഞമാസങ്ങളിൽ നൽകാറുള്ള ഈ വർഷത്തെ സാമ്പത്തിക വിഹിതം സർക്കാർ ഇതുവരെ നൽകിയിട്ടില്ലെന്നും അദ്ദേഹം ആരോപിച്ചു. മൂന്നു മണിക്കൂറോളം നീണ്ട സമരത്തിന് ഒടുവിൽ പോലീസിന്‍റെ സാന്നിധ്യത്തിൽ പരമ്പരാഗത മത്സര തൊഴിലാളി നേതാക്കളും ഫിഷറീസ് സ്റ്റേഷൻ അസി. ഡയറക്ടറും തമ്മിൽ നടത്തിയ ചർച്ചയിൽ ലൈസൻസ് പുതുക്കാൻ വള്ളത്തിന് സാവകാശം നൽകുകയും, പിടിച്ചെടുത്ത വള്ളം വിട്ടുകൊടുക്കുകയും ചെയ്തു. മാത്രമല്ല രണ്ടര ലക്ഷം പിഴ അടയ്ക്കേണ്ടതില്ലെന്നും തീരുമാനമായി. ഇതിനുശേഷമാണ് സമരക്കാർ വള്ളങ്ങളുമായി അഴിമുഖത്തുനിന്നും പിരിഞ്ഞുപോയത്.

പുഷ്പക്കൃഷി വിളവെടുപ്പ്

വാഴക്കുളം: ഇൻഫന്‍റ് ജീസസ് ഹൈസ്കൂളിൽ പുഷ്പക്കൃഷി വിളവെടുപ്പു നടത്തി. മഞ്ഞള്ളൂർ പഞ്ചായത്തു പ്രസിഡന്‍റ് ആൻസി ജോസ് ഉദ്ഘാടനം ചെയ്തു. സ്കൂൾ മാനേജർ ഫാ.തോമസ് മഞ്ഞക്കുന്നേൽ, പഞ്ചായത്തംഗങ്ങളായ പി.എസ് സുധാകരൻ, കെ.വി സുനിൽ കുമാർ, കെ.എൻ അനിൽ കുമാർ, കൃഷി ഓഫീസർ കെ.ടി ജിജി തുടങ്ങിയവർ പങ്കെടുത്തു.പ്രധാനാധ്യാപകൻ ഷാജി വർഗീസ്‌, ഫാ.ബിനു ഇലഞ്ഞേടത്ത് തുടങ്ങിയവർ നേതൃത്വം നൽകി. ആയിരത്തോളം ബന്തിത്തൈകളാണ് നട്ടത്. സ്കൂളിലെ ഓണാഘോഷത്തിന് ഉപയോഗിച്ച ശേഷമുള്ള പൂക്കൾ സമീപ സ്കൂളുകളിൽ നൽകുമെന്ന് അധികൃതർ പറഞ്ഞു.

അവാർഡുകൾ വിതരണം ചെയ്തു

മൂവാറ്റുപുഴ: ഭാരത് സ്‌കൗട്ട്‌സ് ആൻഡ് ഗൈഡ്‌സ് അധ്യാപകരുടെ ദീര്‍ഘകാല സേവന അവാര്‍ഡ് തിരുവനന്തപുരം ശിക്ഷക് ഭവനില്‍ ചേര്‍ന്ന കൗണ്‍സില്‍ യോഗത്തില്‍ വിതരണം ചെയ്തു. മന്ത്രി വി. ശിവന്‍കുട്ടി ചടങ്ങ് ഉദ്ഘാടനം ചെയ്തു. മൂവാറ്റുപുഴ സെന്‍റ് അഗസ്റ്റ്യന്‍സ് സ്‌കൂളിലെ കെ.എസ്. ഷൈനി, കല്ലൂര്‍ക്കാട് സെന്‍റ് അഗസ്റ്റ്യന്‍സ് സ്‌കൂളിലെ ടെസ് ജോസ്, മൂവാറ്റുപുഴ എംഐഇടി സ്‌കൂളിലെ പി.ടി. വര്‍ക്കി എന്നിവര്‍ക്കാണ് അവാര്‍ഡ് ലഭിച്ചത്. സ്റ്റേറ്റ് ചീഫ് കമ്മീഷണര്‍ എന്‍.എസ്.കെ. ഉമേഷ് അവാര്‍ഡ് നല്‍കി.

ജല സുരക്ഷാ പരിശീലനം

വാഴക്കുളം: ജലസുരക്ഷാ പരിശീലനവും ബോധവത്കരണവും നടത്തി. ഐഡിയല്‍ റിലീഫ് വിഭാഗത്തിന്‍റെ നേതൃത്വത്തില്‍ ആനിക്കാട് ചിറയിലായിരുന്നു പരിശീലനം. ജല അപകടങ്ങളിൽ സാധ്യമായ ഉപകരണങ്ങളുടെ സഹായത്താലുള്ള രക്ഷാപ്രവര്‍ത്തന പരിശീലനമാണ് നൽകിയത്. മൂവാറ്റുപുഴ ട്രാഫിക് എസ്എച്ച്ഒ കെ.പി. സിദ്ദിഖ് പരിശീലന പരിപാടിയുടെ ഉദ്ഘാടനം നിര്‍വഹിച്ചു. ഡീന്‍ കുര്യാക്കോസ് എംപിയുടെ നേതൃത്വത്തിലുള്ള ഇടുക്കി ഡിസാസ്റ്റര്‍ മാനേജ്‌മെന്‍റ് ടീമംഗങ്ങള്‍ നേതൃത്വം നൽകി.

വീട്ടൂര്‍ എസ്‌സി നഗറില്‍ ഒരു കോടി രൂപയുടെ വികസന പ്രവര്‍ത്തനങ്ങള്‍ നടപ്പിലാക്കും

കോലഞ്ചേരി: മഴുവന്നൂര്‍ പഞ്ചായത്തില്‍ വീട്ടൂര്‍ എസ്‌സി നഗര്‍ നവീകരിക്കുവാന്‍ ഒരു കോടി രൂപ അനുവദിച്ചതായി പി.വി. ശ്രീനിജിന്‍ എംഎല്‍എ അറിയിച്ചു. അംബേദ്കര്‍ ഗ്രാമവികസന പദ്ധതിയില്‍ ഉള്‍പ്പെടുത്തിയാണ് നവീകരണം നടത്തുന്നത്. ഭവന നവീകരണം, പൊതു കിണര്‍ നവീകരണം, റോഡ് നവീകരണം, ഇന്‍റർലോക്കിംഗ്, റോഡ് സൈഡ് കോണ്‍ക്രീറ്റിംഗ്, ഡ്രൈനേജുകള്‍, സോളാര്‍ തെരുവ് വിളക്ക് അടക്കമുള്ള പ്രവര്‍ത്തികളാണ് നവീകരണത്തിന്‍റെ ഭാഗമായി ഇവിടെ നടപ്പിലാക്കുന്നത്. തുടര്‍ നടപടികള്‍ വേഗത്തിലാക്കുമെന്ന് എംഎല്‍എ പറഞ്ഞു. ബന്തിപ്പൂ കൃഷി വിളവെടുപ്പ് മൂവാറ്റുപുഴ: ആരക്കുഴ പഞ്ചായത്ത് കുടുംബശ്രീ സിഡിഎസിന്‍റെ കീഴിൽ നടത്തിയ ബന്തിപ്പൂ കൃഷിയുടെ വിളവെടുത്ത് പഞ്ചായത്ത് പ്രസിഡന്‍റ് ലസിത മോഹനൻ നിർവഹിച്ചു.

പിറവം ഓണാഘോഷം : ‘യുഡിഎഫ് വിട്ടുനിന്നത് രാഷ്ട്രീയ മുതലെടുപ്പിനെന്ന്'

പിറവം: നഗരസഭയുടെ, ഓണാഘോഷത് ഉദ്ഘാടന പരിപാടിയിൽ നിന്നും, അത്തച്ചമയ ഘോഷയാത്രയിൽ നിന്നും യുഡിഎഫ് എംഎൽഎ അടക്കമുള്ളവർ ബഹിഷ്കരിച്ചത് രാഷ്ട്രീയ മുതലെടുപ്പ് ലക്ഷ്യം വച്ചാണെന്ന് നഗരസഭ ചെയർപേഴ്സൺ അഡ്വ. ജൂലി സാബു, വൈസ് ചെയർമാൻ കെ.പി. സലിം എന്നിവർ പറഞ്ഞു. മുൻ വർഷങ്ങളിൽ നടന്ന ഓണാഘോഷ പരിപാടികളിൽ എംഎൽഎയ്ക്ക് പതാക ഉയർത്തുന്ന ചടങ്ങാണ് അനുവദിച്ചിരുന്നത്. ഇതനുസരിച്ചാണ് ഇത്തവണയും പ്രോഗ്രാം തയാറാക്കിയത്. ന്യായീകരണം പോലുമില്ലാത്ത കാര്യങ്ങൾ ചൂണ്ടിക്കാട്ടി യുഡിഎഫ് അംഗങ്ങൾ പരിപാടിയിൽ നിന്നും വിട്ടു നിന്നത് ചില സ്വാർഥ രാഷ്ട്രീയ ലക്ഷ്യം മുന്നിൽകണ്ടാണന്ന് ഇവർ പത്രസമ്മേളനത്തിൽ ആരോപിച്ചു. കൗൺസിലർമാരായ ഡോ. അജേഷ് മനോഹർ, പി. ഗിരീഷ് കുമാർ, ജൂബി പൗലോസ്, ഷൈനി ഏലിയാസ്, പ്രിമ സന്തോഷ് എന്നിവരും പങ്കെടുത്തു.

എല്‍ഡിഎഫ് മാർച്ച് സംഘടിപ്പിച്ചു

മൂവാറ്റുപുഴ: മൂവാറ്റുപുഴ നഗരസഭയിലെ വികസന മുരടിപ്പിനും, അഴിമതിക്കും, കെടുകാര്യസ്ഥതക്കുമെതിരേ മൂവാറ്റുപുഴ നഗരസഭ ഓഫീസിലേക്ക് എല്‍ഡിഎഫ് മുനിസിപ്പല്‍ കമ്മിറ്റിയുടെ നേതൃത്വത്തില്‍ ജനകീയ മാര്‍ച്ചും കുറ്റപത്രസമര്‍പ്പണവും സംഘടിപ്പിച്ചു. ജനകീയ മാര്‍ച്ചും കുറ്റപത്രസമര്‍പ്പണം സിപിഎം ജില്ലാ സെക്രട്ടറി എസ്. സതീഷ് ഉദ്ഘാടനം ചെയ്തു. സിപിഐ മുനിസിപ്പല്‍ സെക്രട്ടറി കെ.പി അലിക്കുഞ്ഞ് അധ്യക്ഷത വഹിച്ചു. മൂവാറ്റുപുഴ ടി ബി ജംഗ്ഷനില്‍ നിന്നാരംഭിച്ച ജനകീയ മാര്‍ച്ചില്‍ സ്ത്രീകളടക്കം നൂറുകണക്കിന് ജനങ്ങള്‍ അണിനിരന്നു.

ടി.യു. കുരുവിളയ്ക്ക് അവാർഡ്

കോതമംഗലം: ലയണ്‍സ് ക്ലബ്ബ് ഇന്‍റര്‍നാഷണലിൽ 55 വര്‍ഷം പ്രവര്‍ത്തിച്ചതിനുള്ള മൈല്‍സ്റ്റോണ്‍ ഷെവറോണ്‍ അവാര്‍ഡിന് മുന്‍ മന്ത്രി ടി.യു. കുരുവിള അര്‍ഹനായി. ലയണ്‍സ് ഡിസ്ട്രിക്ട് ഗവര്‍ണര്‍ കെ.ബി. ഷൈന്‍കുമാർ അവാര്‍ഡ് സമ്മാനിച്ചു. വി.എസ്. ജയേഷ്, കെ.പി.പീറ്റര്‍, വി.അമര്‍നാഥ് തുടങ്ങിയവര്‍ ചടങ്ങില്‍ പങ്കെടുത്തു. 55 വര്‍ഷം ലയണ്‍സ് അംഗമായി പ്രവര്‍ത്തിച്ച കേരളത്തിലെ ആദ്യത്തെ വ്യക്തിയാണ് ടി.യു. കുരുവിള. 1970 ല്‍ പെരുമ്പാവൂര്‍ ലയണ്‍സ് ക്ലബ്ബില്‍ അംഗമായാണ് അദ്ദേഹം പ്രവര്‍ത്തനം തുടങ്ങിയത്. പിന്നീട് കോതമംഗലം ലയണ്‍സ് ക്ലബ്ബിന്‍റെ സ്ഥാപക അംഗമായി. തുടര്‍ന്ന് ലയണ്‍സ് ഇന്‍റര്‍നാഷണലിന്‍റെ വിവിധ തലങ്ങളില്‍ നിരവധി സ്ഥാനങ്ങളില്‍ പ്രവര്‍ത്തിച്ചു.ഡിസ്ട്രിക്കിന്‍റെ മുഖ്യഉപദേഷ്ടാവായി പ്രവർത്തിച്ചു വരുന്നതിനിടെയാണ് അവാർഡ് ലഭിക്കുന്നത്.

മുടവൂരില്‍ വിരിഞ്ഞു, ചെണ്ടുമല്ലി നൂറുമേനി

മൂവാറ്റുപുഴ: ഓണത്തിന് ദിവസങ്ങൾ മാത്രം ശേഷിക്കെ മുടവൂരില്‍ ചെണ്ടുമല്ലിപ്പാടം തീര്‍ത്തിരിക്കുകയാണ് വനിതാ കര്‍ഷകര്‍. മുടവൂര്‍ ചാക്കുന്നത്ത് ക്ഷേത്രത്തിനു സമീപമാണ് ഓണ വിപണി ലക്ഷ്യമാക്കി നടത്തിയ ചെണ്ടുമല്ലി കൃഷി നൂറുമേനി പൂവിട്ടത്. മൂടവൂര്‍ സ്വദേശികളായ പച്ചേലില്‍ തങ്ക ജോര്‍ജ്, ആശ പ്രവര്‍ത്തകയായ വാഗമറ്റത്തില്‍ സുലോജന ബിജു എന്നിവര്‍ ചേര്‍ന്നാണ് ചെണ്ടുമല്ലികൃഷി നടത്തിയത്. അത്തപ്പൂക്കളത്തിലെ ഒഴിച്ചുകൂടാനാകാത്ത പൂവാണ് ചെണ്ടുമല്ലി. മഞ്ഞയും ഓറഞ്ചും നിറത്തില്‍ പൂത്തുലഞ്ഞ് നില്‍ക്കുന്ന ചെണ്ടുമല്ലിപ്പാടം കാണാന്‍ നിരവധി ആളുകളാണ് എത്തുന്നത്. പായിപ്ര പഞ്ചായത്ത് വൈസ് പ്രസിഡന്‍റ് വിജി പ്രഭാകരന്‍ ചെണ്ടുമല്ലി പൂന്തോട്ടത്തില്‍ എത്തി കര്‍ഷകരെ അഭിനന്ദിച്ചു. ഹൈബ്രിഡ് ഇനത്തില്‍പ്പെട്ട തൈകളാണ് ഇവിടെ കൃഷിയിറക്കിയിരിക്കുതെന്ന് വനിത കര്‍ഷകര്‍ പറഞ്ഞു. കപ്പ, കൂര്‍ക്ക, വെള്ളരി തുടങ്ങി നിരവധി വിളകളും ഇവര്‍ പാട്ടത്തിനെടുത്തും സ്വന്തം സ്ഥലത്തും കൃഷി ചെയ്തുവരുന്നുണ്ട്. ചെണ്ടുമല്ലികള്‍ നേരിട്ട് ഉപഭോക്താക്കള്‍ക്ക് വിപണനം നടത്താനാണ് ഇവരുടെ തീരുമാനം.

ദീപിക നമ്മുടെ ഭാഷ പദ്ധതി : വലിയപാറ ഗവ. എല്‍പി സ്‌കൂളില്‍

കോതമംഗലം: വലിയപാറ ഗവ. എല്‍പി സ്‌കൂളില്‍ ദീപിക നമ്മുടെ ഭാഷ പദ്ധതിയുടെയും ഓണാഘോഷത്തിന്‍റെയും ഉദ്ഘാടനം നെല്ലിമറ്റം സെന്‍റ് ജോസഫ് പള്ളി വികാരി റവ. ഡോ. തോമസ് ജെ. പറയിടം നിർവഹിച്ചു. ദീപിക പത്രം പ്രധാനാധ്യാപിക പ്രീതയ്ക്ക് നല്‍കിയാണ് ഉദ്ഘാടനം നിർവഹിച്ചത്. പത്രം സ്‌പോണ്‍സര്‍ ചെയ്ത ബേബി പനിച്ചേപിടി, ഡിഎഫ്‌സി രൂപത സെക്രട്ടറി ജോര്‍ജ് മങ്ങാട്ട്, വാര്‍ഡംഗം റോസിലി ഷിബു, അധ്യാപകരായ ഇ.എസ്. ദിവ്യ, നന്ദുജ നന്ദനന്‍, കെ.എ. അന്‍സ, സൂര്യ രാജേഷ് എന്നിവര്‍ പ്രസംഗിച്ചു.

നിയന്ത്രണം വിട്ട ടോറസ് ലോറി വീട്ടിലേക്ക് ഇടിച്ചു കയറി

കോലഞ്ചേരി: കൊച്ചി-ധനുഷ്‌കോടി ദേശീയപാതയില്‍ കടമറ്റം നമ്പ്യാരുപടിയില്‍ നിയന്ത്രണം വിട്ട ടോറസ് ലോറി വീട്ടിലേക്ക് ഇടിച്ച് കയറി. വീടിനുള്ളില്‍ ഉറങ്ങിക്കിടന്ന ആളുകള്‍ അപകടത്തില്‍ നിന്നും തലനാരിഴക്കാണ് രക്ഷപെട്ടത്. ചൊവ്വാഴ്ച്ച പുലര്‍ച്ചെ നാലരയോടെയായിരുന്നു സംഭവം. കോലഞ്ചേരി ഭാഗത്തുനിന്നു മുവാറ്റുപുഴ ഭാഗത്തേക്കു വന്ന ടോറസാണ് അപകടത്തില്‍പ്പെട്ടത്. ദേശീയപാതയോട് ചേര്‍ന്നുള്ള മതിലും തകര്‍ത്താണ് ലോറി വീട്ടിലേക്ക് ഇടിച്ചുകയറിയത്. നമ്പ്യാരുപടി മാരി ഭാഗത്ത് എം.എന്‍. ഹരിദാസിന്‍റെ ഉടമസ്ഥതയിലുള്ള വീട്ടില്‍ വാടകക്കാരായ മൂന്നംഗ കുടുംബമാണ് താമസിച്ചുവന്നത്. മുറിയുടെ ഭിത്തി തകര്‍ന്ന് കല്ലുകള്‍ വീണെങ്കിലും ആരുടേയും ദേഹത്ത് പതിച്ചില്ല. വീട്ടിലെ ടിവിയും മറ്റ് ഉപകരണങ്ങളെല്ലാം നശിച്ചു. ഈ അപകടം നടന്നതിന് പിന്നാലെ തന്നെ മറ്റൊരു എയ്‌സ് വാഹനവും നിയന്ത്രണം വിട്ട് ഇതേ വീടിന്‍റെ മതില്‍ ഇടിച്ചു തകര്‍ത്തു.

പേപ്പതിയിൽ ടേക്ക്-എ ബ്രേക്ക് തുറന്നു

പിറവം: എറണാകുളം - നടക്കാവ് ഹൈവേ റോഡരികിൽ പേപ്പതി ജംഗ്ഷനിൽ ടേക്ക് - എ ബ്രേക്ക് മന്ദിരം തുറന്നു. വെളിയനാട് ചിന്മയാ അന്തർദേശീയ കേന്ദ്രം 35 ലക്ഷം രൂപ ചെലവഴിച്ചാണ് മന്ദിരത്തിന്‍റെ നിർമാണം പൂർത്തിയാക്കിയത്. വെളിയനാട്, എടക്കാട്ടുവയൽ, തിരുമറയൂർ ഭാഗങ്ങളിൽ നിന്നുള്ള റോഡ് കൂടിച്ചേരുന്ന പേപ്പതിയിൽ യാത്രക്കാർക്ക് വിശ്രമിക്കുന്നതിന് അപര്യാപ്തമായ സൗകര്യമായിരുന്നു ഉണ്ടായിരുന്നത്. യാത്രക്കാരുടെ ബുദ്ധിമുട്ട് മനസിലാക്കി പഞ്ചായത്ത് പ്രസിഡന്‍റ് കെ.ആർ. ജയകുമാറും, മെമ്പർ എം. ആശിഷും ചിന്മയ അധികൃതരുമായി നടത്തിയ ചർച്ചയെത്തുടർന്നാണ് ടെക് - എ ബ്രേക്കിന് അനുമതിയായത്. വിശാലമായ ബസ് കാത്തിരിപ്പ് കേന്ദ്രം, കടമുറി, അക്ഷയ കേന്ദ്രത്തിനുള്ള സൗകര്യം എന്നിവയും, താഴെയും മുകളിലുമായി ടോയ്‌ലറ്റുകൾ, ഭിന്നശേഷി സൗഹൃദ സൗകര്യങ്ങൾ എന്നിവയുൾപ്പെടുത്തിയാണ് കെട്ടിടം നിർമിച്ചിരിക്കുന്നത്. ചിന്മയ മിഷൻ സ്ഥാപനങ്ങളുടെ കേരള ഹെഡ് സ്വാമി വിവിക്താനന്ദ മന്ദിരം ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.ആർ. ജയകുമാർ അധ്യക്ഷത വഹിച്ചു. അനുപ് ജേക്കബ് എംഎൽഎ മുഖ്യപ്രഭാഷണം നടത്തി. ജില്ലാ പഞ്ചായത്ത് മെമ്പർ കെ.വി. അനിത. ബ്ലോക്ക് മെമ്പർ ജ്യോതി ബാലൻ, വൈസ് പ്രസിഡന്‍റ് സാലി പീറ്റർ, അംഗങ്ങളായ എം. ആശിഷ്, ജെസി പീറ്റർ, ബോബൻ കുര്യാക്കോസ്, ജൂലിയ ജെയിംസ്, മലബാർ എക്സ്ട്രൂഷൻസ് എംഡി ജെയിംസ് പോൾ എന്നിവർ പ്രസംഗിച്ചു.

കെട്ടിട നന്പർ പുതുക്കി നല്കുന്നില്ല : നഗരസഭക്കെതിരെ നിയമ പോരാട്ടത്തിന് ഒരുങ്ങി കൂത്താട്ടുകുളത്തെ വ്യാപാരികൾ

കൂത്താട്ടുകുളം: കൂത്താട്ടുകുളത്തെ വ്യാപാരികൾ നഗരസഭക്കെതിരെ നിയമ പോരാട്ടത്തിന് ഒരുങ്ങുന്നു. കെട്ടിട നമ്പർ പുതുക്കി ലഭിക്കാത്തതിനെ തുടർന്ന് നഗരത്തിലെ ഭൂരിഭാഗം വ്യാപാരസ്ഥാപനങ്ങളുടെയും ലൈസൻസ് പുതുക്കാൻ സാധിക്കുന്നില്ല. എംസി റോഡ് വികസനവുമായി ബന്ധപ്പെട്ട പല സ്ഥാപനങ്ങളുടെയും മുഖംമിനുക്കൽ നടത്തിയിരുന്നു. ഇത് പുതിയ നിർമാണമായി കണക്കാക്കി കെട്ടിടങ്ങൾക്ക് നമ്പർ പുതുക്കി നൽകാതിരിക്കുകയാണ് അധികൃതർ ചെയ്തിട്ടുള്ളത്. കെട്ടിട നിർമാണത്തിൽ ഏതെങ്കിലും തരത്തിലുള്ള ഭേദഗതികൾ വരുത്തിയിട്ടുണ്ടെങ്കിൽ നിർമാണം നടത്തിയ ഭാഗങ്ങളിൽ നിലവിലുള്ള ടാക്സിന്‍റെ മൂന്നിരട്ടി ഈടാക്കാനും പഴയ ഭാഗങ്ങൾക്ക് നേരത്തെയുള്ള ടാക്സ് തന്നെ തുടരാനും മന്ത്രിയുടെ ഓഫീസിൽ നിന്നും ഉത്തരവിട്ടിട്ടുണ്ട്. ഇതൊന്നും പാലിക്കാൻ ഉദ്യോഗസ്ഥർ ഇതുവരെ തയാറായിട്ടില്ല. കെ സ്മാർട്ട് സോഫ്റ്റ്‌വേറിലൂടെയാണ് ലൈസൻസ് പുതുക്കുന്നത്. സോഫ്റ്റ്‌വേറിനുള്ളിൽ വ്യാപാരസ്ഥാപന പ്രവർത്തിക്കുന്ന കെട്ടിടത്തിന്‍റെ നമ്പർ നൽകിയാൽ മാത്രമേ മുന്നോട്ടു പോകാനാകൂ. വ്യാപാരികൾക്ക് ബാങ്ക് ലോണുകൾ ഉൾപ്പെടെയുള്ള ധനസഹായങ്ങൾ ലഭിക്കണമെങ്കിൽ പ്രധാനമായി വേണ്ടത് വ്യാപാരസ്ഥാപനത്തിന്‍റെ കെട്ടിട നമ്പറാണ്. നഗരസഭ എൻജിനീയറിംഗ് വിഭാഗത്തിന്‍റെ കെടുകാര്യസ്ഥത മൂലമാണ് സ്ഥാപനങ്ങൾക്ക് ഇതുവരെ നമ്പർ ലഭിക്കാതിരിക്കാൻ കാരണമെന്നാണ് വ്യാപാരികളുടെ ആരോപണം. പലപ്പോഴും കെട്ടിടവുമായി ബന്ധപ്പെട്ട അളവുകൾ എടുക്കുന്നതിനും മറ്റും വരുന്നത് താത്കാലിക ജീവനക്കാരാണെന്നും ഇവരുടെ പരിജ്ഞാന കുറവും പ്രശ്നങ്ങൾക്ക് വഴിവയ്ക്കുന്നുണ്ടെന്നും വ്യാപാരികൾ പറഞ്ഞു. കൂത്താട്ടുകുളം സ്പെഷ്യൽ ഗ്രേഡ് പഞ്ചായത്തിൽ നിന്നും ഉയർത്തപ്പെട്ട് മുനിസിപ്പാലിറ്റി ആക്കിയ കാലയളവ് മുതൽ വ്യാപാരികൾ കെട്ടിട നമ്പറുമായി ബന്ധപ്പെട്ട നൂലാമാലകളിൽ അകപ്പെട്ടിരിക്കുകയാണ്. നീതി തേടിയുള്ള യാത്രയുടെ ആദ്യപടിയായി മുനിസിപ്പൽ ലൈസൻസ് ലഭിക്കാത്തവരുടെ ഒരു യോഗം ഈ മാസം 30ന് വൈകുന്നേരം ഏഴിന് വ്യാപാര ഭവൻ ഹാളിൽ നടക്കുമെന്ന് മർച്ചന്‍റ്സ് അസോസിയേഷൻ പ്രസിഡന്‍റ് മർക്കോസ് ജോയി, സെക്രട്ടറി ഇ.എം. വർഗീസ് എന്നിവർ അറിയിച്ചു.

ഓണനാളുകളിൽ പരിശോധന കർശനമാക്കും: എംഎൽഎ

പെരുമ്പാവൂർ: അതിഥിത്തൊഴിലാളികൾ ഏറെ തിങ്ങിപ്പാർക്കുന്ന പെരുമ്പാവൂരിൽ ഓണക്കാലത്ത് പോലീസ്-എക്സൈസ് വകുപ്പുകളുടെ സംയുക്ത ഇടപെടലുകളിലൂടെ കാര്യക്ഷമമായ നടപടികൾ ഉണ്ടാകുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു. നമ്മുടെ പുതുതലമുറ വഴിതെറ്റി മയക്കുമരുന്ന് പോലുള്ളവക്ക് അടിമപ്പെടുന്നത് സമൂഹം ഗൗരവമായി കാണണമെന്നും ഇതു തടയുന്നതിനായി ബോധവത്കരണ ക്ലാസുകൾ മുതലായവ നടത്തുമെന്നും എംഎൽഎ കൂട്ടിച്ചേർത്തു. സെപ്റ്റംബർ 10 വരെ ഭായി കോളനികൾ ഉൾപ്പെടെ അതിഥി തൊഴിലാളികൾ തിങ്ങിപ്പാർക്കുന്ന ഇടങ്ങളിൽ പരിശോധനകൾ കർശനമാക്കുകയും ബിവറേജസ് ഔട്ട്‌ലെറ്റുകളുടെ പരിസരത്ത് ഹിന്ദി, ഇംഗ്ലീഷ്, മലയാളം ഭാഷകളിൽ ബോർഡുകൾ സ്ഥാപിക്കുകയും ചെയ്യുമെന്ന് ബന്ധപ്പെട്ട ഉദ്യോഗസ്ഥർ അറിയിച്ചു. അതിഥി തൊഴിലാളികൾ ജോലിചെയ്യുന്ന വിവിധ മേഖലകളായ പ്ലൈവുഡ്, ഹോട്ടൽ ആൻഡ് റസ്റ്ററന്‍റ് അസോസിയേഷൻ ഉൾപ്പെടെയുള്ളവരെ വിളിച്ചു ചേർത്ത് മീറ്റിംഗ് സംഘടിപ്പിക്കുകയും വേണ്ട നിർദേശങ്ങൾ നൽകുകയും ചെയ്യും. യോഗത്തിൽ കുന്നത്തുനാട് എക്സൈസ് ഇൻസ്പെക്ടർ എസ്. ബിനു, പെരുമ്പാവൂർ സർക്കിൾ ഇൻസ്പെക്ടർ ടി.എം. സൂഫി , പെരുമ്പാവൂർ ഫയർ ഓഫീസർ സാബു വർഗീസ്, വിവിധ വിദ്യാഭ്യാസ സ്ഥാപനങ്ങളുടെ പ്രതിനിധികൾ, രാഷ്ട്രീയ നേതാക്കൾ തുടങ്ങിയവർ പങ്കെടുത്തു.

ഓണപ്പൂക്കളമൊരുക്കാൻ കുമ്പളങ്ങിയിൽ ചെണ്ടുമല്ലിക്കൃഷി

ഫോർട്ടുകൊച്ചി: ഓണപ്പൂക്കളമൊരുക്കി ഓണത്തപ്പനെ വരവേൽക്കാൻ കുമ്പളങ്ങിയിൽ ചെണ്ടുമല്ലി പൂക്കൾ വിരിഞ്ഞു. യുവസംരംഭകരായ സാദിഖ്, ബിജുകുട്ടൻ, ലിജിമോൻ എന്നിവരുടെ മൂന്നു മാസത്തെ അധ്വാനത്തിന്‍റെ ഫലമാണ് മഞ്ഞയും ഓറഞ്ചും നിറങ്ങളിൽ വിരിഞ്ഞ ഈ പൂക്കൾ. തിരുവനന്തപുരത്ത് നിന്നും 3,500 തൈകളാണ് ഇവർ വാങ്ങിയത്. ഇപ്പോൾ 50,000ത്തിലേറെ പൂക്കൾ തോട്ടത്തിൽ വിരിഞ്ഞുനിൽക്കുന്നു. 65 ദിവസം കൊണ്ട് മൊട്ടിട്ടു. മൊട്ട് വിടരാൻ രണ്ടാഴ്ചയും. കുമ്പളങ്ങിയിൽ ആദ്യമായാണ് ചെണ്ടുമല്ലി കൃഷി നടത്തുന്നത്. ജൈവ വളം മാത്രമാണ് ഇതിനുപയോഗിച്ചിരിക്കുന്നത്. ഓണനാളുകളിലെ കച്ചവട ലക്ഷ്യം മാത്രമല്ല, മനസിന് കുളിർമയേകുന്ന ഇവിടുത്തെ കാഴ്ച കാണാൻ സന്ദർശകരെത്തുന്നതും സന്തോഷം പകരുന്നതാണെന്നു മൂവരും പറഞ്ഞു.

ലൈഫ് പദ്ധതിയിൽ വൈപ്പിനിൽ 2040 വീടുകളൊരുങ്ങി

താക്കോൽ ദാനം നാളെ മന്ത്രി നിർവഹിക്കും വൈപ്പിൻ: ലൈഫ് പദ്ധതിയിൽ വൈപ്പിൻ മണ്ഡലത്തിൽ 2040 വീടുകൾ പൂർത്തിയായതായി കെ.എൻ. ഉണ്ണിക്കൃഷ്ണൻ എംഎൽഎ. 376 വീടുകൾ വിവിധ ഘട്ടങ്ങളിലായി പുരോഗമിക്കുകയാണ്. പൂർത്തിയായ വീടുകളുടെ താക്കോൽ വിതരണം നാളെ ഉച്ചകഴിഞ്ഞ് മൂന്നിന് മന്ത്രി എം.ബി. രാജേഷ് നിർവഹിക്കും. എടവനക്കാട് പുളിക്കനാട്ട് ഓഡിറ്റോറിയത്തിൽ നടക്കുന്ന പരിപാടിയിൽ കെ എൻ. ഉണ്ണിക്കൃഷ്ണൻ എംഎൽഎ അധ്യക്ഷനാകും.

ഭാരതമാതാ മലയാള വിഭാഗത്തിന് സ്വന്തം ആപ്പ്

കൊച്ചി: തൃക്കാക്കര ഭാരതമാതാ കോളജ് മലയാള വിഭാഗം സ്വന്തമായി ആപ്പും ഇന്‍ററാക്ടീവ് ആപ്ലിക്കേഷനും ആരംഭിച്ചു. കേരള മീഡിയ അക്കാദമി സെക്രട്ടറി എസ്. എസ്. അരുൺ ഉദ്ഘാടനം ചെയ്തു. മലയാളം അസോസിയേഷൻ ഉദ്ഘാടനവും കോളജിന്‍റെ കുടുംബപത്രിക ഗുൽമോഹറിന്‍റെ പ്രകാശനവും നടന്നു. പ്രിൻസിപ്പൽ ഡോ. സൗമ്യ തോമസ് അധ്യക്ഷത വഹിച്ചു. കോളജ് മാനേജർ റവ. ഡോ. ഏബ്രഹാം ഓലിയപ്പുറം , ഡോ. തോമസ് പനക്കളം, റവ. ഡോ. വർഗീസ് പോൾ, കെ. കരുൺ, മാഹിൻ അബൂബക്കർ, ഡോ. തോമസ് പനക്കളം തുടങ്ങിയവർ പ്രസംഗിച്ചു.

സിആർഇസെഡ്: എടവനക്കാട് പഞ്ചായത്തിന് മുന്നിൽ സമരം

വൈപ്പിൻ: സംസ്ഥാനത്ത് സിആർഇസഡ് നിയമത്തിലെ മാർഗനിർദ്ദേശങ്ങളിൽ നിർണയകമായ തിരുത്ത് വരുത്തിയിട്ടും ഭവന നിർമാണത്തിന് അപേക്ഷ വെക്കുന്നവരെ ആട്ടിയോടിക്കുന്ന എടവനക്കാട് പഞ്ചായത്തിലെ ഉദ്യോഗസ്ഥ നിലപാടിനെതിരെ സിആർ സെഡ് ആക്ഷൻ കൗൺസിലിൽ പഞ്ചായത്ത് ഓഫീസിനു മുന്നിൽ സമരം നടത്തി. പഞ്ചായത്ത് സെക്രട്ടറി ഉൾപ്പെടെയുള്ള ഉദ്യോഗസ്ഥന്മാർ ഓഫീസിൽ ഇല്ലാതിരുന്നതിനാൽ ആക്ഷൻ കൗൺസിൽ ചെയർമാൻ കെ. സലിഹരന്‍റെ നേതൃത്വത്തിൽ എത്തിയ സമരക്കാർ പഞ്ചായത്തിനു മുന്നിൽ കുത്തിരുന്നു. തിരുത്തൽ അനുസരിച്ച് കഴിഞ്ഞ 14ന് കേരളതീരദേശ പരിപാലന മാനേജ്മെന്‍റ് അഥോറിറ്റി പഞ്ചായത്തുകൾക്ക് വ്യക്തമായ ഉത്തരവ് നൽകിയിട്ടുള്ളതാണെന്ന് ആക്ഷൻ കൗൺസിൽ ചൂണ്ടിക്കാട്ടുന്നു. ഇതുപ്രകാരം അപേക്ഷകന്‍റെ ഭൂമി മാപ്പിൽ വികസന നിഷിദ്ധ മേഖലയിൽ ആയിരുന്നാലും തദ്ദേശവാസി ആണെങ്കിൽ 3229 ചതുരശ്ര അടി വരെയുള്ള വീട് നിർമാണത്തിന് അനുവാദം നല്കാൻ പഞ്ചായത്തുകൾക്ക് കഴിയുമത്രേ. എന്നാൽ ഈ ഉത്തരവ് ലഭിച്ച് ഒരു മാസം പിന്നിട്ടിട്ടും ഉദ്യോഗസ്ഥ ധാർഷ്ട്യം മൂലം ഇതിന്‍റെ ആനുകൂല്യം ഇവിടുത്തെ സാധാരണക്കാർക്ക് ലഭിക്കുന്നില്ലെന്ന് ആക്ഷൻ കൗൺസിൽ ആരോപിക്കുന്നു.

ദേവസ്വം പാടത്തെ മൂന്നര ഏക്കറിൽ കൊയ്ത്തുത്സവം നടത്തി; ഇല്ലംനിറ ഇന്ന്

നെടുമ്പാശേരി: നെടുമ്പാശേരി ആവണംകോട് സരസ്വതി ക്ഷേത്രത്തിൽ ഇല്ലംനിറയ്ക്ക് മുന്നോടിയായുള്ള ദേവസ്വം വക പാടശേഖരത്തിലെ മൂന്നര ഏക്കർ സ്ഥലത്തെ ഇല്ലംനിറയ്ക്ക് ആവശ്യമായ നെൽക്കൃഷിയുടെ കൊയ്ത്തുത്സവം നടത്തി. കഴിഞ്ഞ രണ്ടു ദിവസങ്ങളിലായി നടന്ന കൊയ്ത്തുത്സവത്തിൽ പ്രദേശത്തെ കർഷകത്തൊഴിലാളികൾ പങ്കെടുത്തു. രാവിലെ ക്ഷേത്ര ദർശനത്തിന് ശേഷം പാടത്തേക്ക് എത്തിയ കർഷകത്തൊഴിലാളികൾ കൊയ്ത്തു പാട്ടുകളുമായാണ് കൊയ്ത്തുത്സവം കൊണ്ടാടിയത്. കൊയ്തെടുത്ത കറ്റകൾ ഇന്ന് ഇല്ലംനിറ എന്ന ചടങ്ങോടെ ക്ഷേത്രത്തിൽ ഏറ്റുവാങ്ങും. തുടർന്ന് പൂജകൾക്കുശേഷം ഇവ ഭക്തർക്ക് വിതരണം ചെയ്യും.

പെരുന്പാവൂർ നഗരത്തിൽ മോഷ്ടാക്കൾ വിലസുന്നു

പെരുമ്പാവൂർ : നഗരത്തിലെ വ്യാപാര സ്ഥാപനങ്ങളിൽ പരക്കെ മോഷണവും മോഷണ ശ്രമങ്ങളും. പെരുമ്പാവൂർ കെഎസ്ആർടിസി ബസ് സ്റ്റാൻഡിന് സമീപത്തെ ട്രേഡിംഗ് കോംപ്ലക്സിൽ ചൊവ്വാഴ്ച്ച പുലർച്ചെ ആണ് സംഭവം. ഇവിടെ പ്രവർത്തിക്കുന്ന പെറ്റ് കെയർ കയർ ഷോപ്പിൽ നിന്നും 10,000 രൂപ നഷ്ടപ്പെട്ടതായി ഉടമ തൊടാപ്പറമ്പ് സ്വദേശി ജയൻ പറഞ്ഞു. രാവിലെ കട തുറക്കാനെത്തിയ ജീവനക്കാരാണ് പൂട്ടുകൾ തകർത്ത നിലയിൽ കണ്ടത്. സമീപത്ത് മറ്റ് മൂന്ന് കടകളുടെ പൂട്ടുകൾ തകർത്തെങ്കിലും മോഷ്ടാവിന് അകത്ത് പ്രവേശിക്കാൻ സാധിച്ചില്ല. കടയിൽ കയറി മോഷണം നടത്തുന്നതിന്‍റെ സി‌സിടിവി ദൃശ്യങ്ങൾ പൊലീസ് പരിശോധിച്ചു. പണം മാത്രമാണ് നഷ്ടപ്പെട്ടിട്ടുള്ളതെന്ന് ഉടമ ജയൻ പറഞ്ഞു. മോഷ്ടാവ് ഇതരസംസ്ഥാന സ്വദേശിയാണെന്നാണ് പ്രാഥമിക നിഗമനം. പൊലീസ് അന്വേഷണം ഊർജ്ജിതമാക്കി.

സ്കൂൾ കെട്ടിട നിർമാണം ആരംഭിച്ചു

കാലടി: മഞ്ഞപ്ര പഞ്ചായത്തിന്‍റെ കീഴിലുള്ള നടുവട്ടം ജൂനിയർ ബേസിക് സ്കൂളിന്‍റെ പുതിയ കെട്ടിടത്തിന്‍റെ നിർമാണോദ്ഘാടനം റോജി എം. ജോൺ എംഎൽഎ നിർവഹിച്ചു. ഗ്രാമപഞ്ചായത്ത് പ്രസിഡന്‍റ് വത്സലകുമാരി വേണു അധ്യക്ഷയായി. പ്രധാന അധ്യാപിക വി .കെ. ബിനല സ്വാഗതവും വാർഡ് മെമ്പർ ഷെമിത ബിജോ നന്ദിയും പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചൻ , ജില്ലാ പഞ്ചായത്ത് മെമ്പർ അനിമോൾ ബേബി, ഗ്രാമപഞ്ചായത്ത് വൈസ് പ്രസിഡന്‍റ് ബിനോയ് ഇടശേരി, ബ്ലോക്ക് പഞ്ചായത്ത് മെമ്പർ സരിത സുനിൽ ചാലക്ക, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ജാൻസി ജോർജ്, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൗമിനി ശശീന്ദ്രൻ, മെമ്പർമാരായ അനു ജോർജ്, സാജു കോളാട്ടുകുടി, സിജു ഈരാളി, അൽഫോൻസ ഷാജൻ, ജേക്കബ് മഞ്ഞളി, സീന മാർട്ടിൻ, അങ്കമാലി എഇഓ സീന പോൾ, പി.പി. രാജേഷ് , മനൂപ് എന്നിവർ പ്രസംഗിച്ചു.

"ദൃഷ്ടി' സന്പൂർണ തിമിരവിമുക്ത ചികിത്സാപദ്ധതി രണ്ടാംഘട്ടത്തിന് തുടക്കം

ആലുവ: ജില്ലയെ സമ്പൂർണ തിമിരവിമുക്തമാക്കാനുള്ള ദൃഷ്ടി 2024-26 സൗജന്യ ചികിത്സാപദ്ധതിയുടെ രണ്ടാംഘട്ടത്തിന് ആലുവ യുസി കോളജിൽ തുടക്കമായി. ബെന്നി ബഹനാൻ എംപി ഉദ്ഘാടനം ചെയ്തു. നേത്രബാങ്ക് പ്രസിഡന്‍റും എല്‍എഫ് ആശുപത്രി ഡയറക്ടറുമായ ഫാ. ജേക്കബ് ജി. പാലയ്ക്കാപ്പിള്ളി, പ്രിൻസിപ്പൽ ഡോ. മിനി ആലീസ്, അസി. ഡയറക്ടർ ഫാ. വർഗീസ് പാലാട്ടി, മുനിസിപ്പൽ ചെയർമാൻ എം.ഒ. ജോൺ, എൽദോ കെ. ജോയി തുടങ്ങിയവർ പ്രസംഗിച്ചു. ചടങ്ങിൽ കോളജിലെ അധ്യാപകർ, അനധ്യാപകർ, വിദ്യാർഥികൾ, കുടുംബാംഗങ്ങൾ എന്നിവരുടെ നേത്രദാന സമ്മതപത്രങ്ങൾ കൈമാറി.

വല്ലാർപാടം ബൈബിൾ കൺവൻഷൻ തുടങ്ങി

കൊച്ചി: വരാപ്പുഴ അതിരൂപതയുടെ നേതൃത്വത്തിലുള്ള 13-ാമത് വല്ലാർപാടം കൃപാഭിഷേകം ബൈബിൾ കൺവൻഷന് ഭക്തിസാന്ദ്രമായ തുടക്കം. വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിലിന്‍റെ മുഖ്യകാർമികത്വത്തിൽ പൊന്തിഫിക്കൽ ദിവ്യബലിയോടെയാണു കൺവൻഷനു തുടക്കമായത്. വചനശുശ്രൂഷകൾ വിശ്വാസ സമൂഹത്തിന്‍റെ ജീവിത നവീകരണത്തിനും മാനസാന്തരത്തിനും നിദാനമാകണമെന്ന് ആർച്ച്ബിഷപ് ഉദ്ഘാടന സന്ദേശത്തിൽ ഓർമിപ്പിച്ചു. വികാരി ജനറാൾ മോൺ. മാത്യു ഇലഞ്ഞിമറ്റം, ബസിലിക്ക റെക്ടർ ഫാ. ജെറോം ചമ്മിണിക്കോടത്ത് എന്നിവർ സഹകാർമികരായി. അണക്കര മരിയൻ ധ്യാനകേന്ദ്രം ഡയറക്ടർ ഫാ. ഡൊമിനിക് വാളന്മനാലാണ് അഞ്ചു ദിവസത്തെ കൺവൻഷൻ ന‍യിക്കുന്നത്. ദിവസവും വൈകുന്നേരം നാലു മുതൽ ഒന്പതു വരെയാണ് ശുശ്രൂഷകൾ. 31നു സമാപിക്കും. ബസിലിക്ക റെക്ടർ ഫാ. ജെറോം ചമ്മിണിക്കോടത്ത്, അതിരൂപത പ്രൊക്ലമേഷൻ കമ്മീഷൻ ഡയറക്ടർ ഫാ.ആന്‍റണി ഷൈൻ കാട്ടുപറമ്പിൽ എന്നിവർ നേതൃത്വം നൽകുന്നു. ദിവസവും കൺവൻഷനു ശേഷം വിശ്വാസികൾക്കായി വിവിധ സ്ഥലങ്ങളിലേക്കു യാത്രാസൗകര്യം ഏർപ്പെടുത്തിയിട്ടുണ്ട്.

റോഡ് നവീകരണം: മുഖ്യമന്ത്രിക്ക് കത്ത് നൽകി

തൃപ്പൂണിത്തുറ: ഇരുമ്പനം പുതിയ റോഡ് ജംഗ്ഷൻ മുതൽ ചിത്രപ്പുഴ പാലം വരെ ഭാരത് പെട്രോളിയം കോർപറേഷൻ കൊച്ചി റിഫൈനറിയുടെ സിഎസ്ആർ ഫണ്ടുപയോഗിച്ച് നവീകരിക്കുന്നതിനുള്ള അടിയന്തിര നടപടി സ്വീകരിക്കണമെന്ന് അനൂപ് ജേക്കബ് എംഎൽഎ ആവശ്യപ്പെട്ടു. നിലവിൽ പുതിയ റോഡ് ജംഗ്ഷൻ മുതൽ എച്ച്ഒസി വരെയുള്ള ഭാഗം നവീകരിക്കാനാണ് തീരുമാനമെടുത്തിട്ടുള്ളത്. ഇതുമൂലം യഥാര്‍ഥ ഗതാഗത തടസവും ടാങ്കര്‍ ലോറികളുടെ പാർക്കിംഗ് പ്രശ്നങ്ങളും നേരിടുന്ന ഇരുമ്പനം-ചിത്രപ്പുഴ റോഡ് വീണ്ടും പഴയതു പോലെ ദുരിതാവസ്ഥയിൽ തുടരുമെന്ന് അദ്ദേഹം ചൂണ്ടിക്കാട്ടി. പുതിയ റോഡ് മുതൽ ചിത്രപ്പുഴ വരെയുള്ള 1.2 കിലോമീറ്റർ ഭാഗമാണ് അടിയന്തരമായി നവീകരിക്കാനുള്ളത്. ഈ ആവശ്യമുന്നയിച്ച് മുഖ്യമന്ത്രിക്കും പൊതുമരാമത്ത്, വ്യവസായ വകുപ്പ് മന്ത്രിമാർക്കും റിഫൈനറി അധികൃതര്‍ക്കും എംഎൽഎ കത്ത് നല്‍കി.

കിഴക്കമ്പലം പഞ്ചായത്ത് അസി. സെക്രട്ടറിയെ സസ്‌പെൻഡ് ചെയ്തെന്ന്

കിഴക്കമ്പലം: കിഴക്കമ്പലം ബസ് സ്റ്റാന്‍ഡ് നവീകരണവുമായി ബന്ധപ്പെട്ട് ഗ്രാമപഞ്ചായത്ത് ഭരണസമിതിയുടെ തീരുമാനം സിപിഎമ്മുമായി ചേര്‍ന്ന് അട്ടിമറിച്ചതിനെതുടർന്ന് കിഴക്കമ്പലം ഗ്രാമപഞ്ചായത്ത് അസിസ്റ്റന്‍റ് സെക്രട്ടറി സി.എം. ദര്‍ശിനിയെ സസ്‌പെൻഡ് ചെയ്തതായി പ്രസിഡന്‍റ് മിനി രതീഷ്‌ അറിയിച്ചു. സെക്രട്ടറി ടി. അജിക്ക് കാരണകാണിക്കല്‍ നോട്ടീസും നല്കി. ബസ് സ്റ്റാന്‍ഡ് പൂർണമായും അടച്ചിട്ട് നിര്‍മാണം നടത്തണമെന്ന പഞ്ചായത്ത് കമ്മിറ്റി തീരുമാനത്തിനു വിരുദ്ധമായി, സെക്രട്ടറിയും, അസി. സെക്രട്ടറിയും ചേർന്ന് തീരുമാനം മാറ്റി എഴുതുകയായിരുന്നുവെന്നും ഇതിനെ തുടർന്നാണ് നടപടി‌യെന്നും മിനി രതീഷ് പറഞ്ഞു.

വികസന കൈപ്പുസ്തകത്തെച്ചൊല്ലി ബഹളം : രണ്ടാം ദിവസവും കോർപറേഷൻ കൗൺസിൽ യോഗം അലങ്കോലമായി

കൊച്ചി: തുടര്‍ച്ചയായി രണ്ടാം ദിവസവും പ്രതിപക്ഷ ബഹളത്തെ തുടര്‍ന്ന് കോര്‍പറേഷന്‍ കൗണ്‍സില്‍ യോഗം അലങ്കോലമായി. ആദ്യദിനം അവസാന സമയത്തായിരുന്നെങ്കില്‍ ഇന്നലെ കൗണ്‍സില്‍ ആരംഭിച്ച ഘട്ടത്തില്‍ തന്നെ പ്രതിപക്ഷം പ്ലക്കാര്‍ഡുമേന്തി സമരവുമായി കൗണ്‍സില്‍ നടപടികള്‍ തടസപ്പെടുത്തി. പ്രതിപക്ഷത്തോട് ശാന്തരാകാന്‍ ആവശ്യപ്പെടുക പോലും ചെയ്യാതെ മേയര്‍ സഭാ നടപടികള്‍ അവസാനിപ്പിച്ച് ചെയര്‍ വിട്ടുപോയി. അപ്പോഴേക്കും കൗണ്‍സില്‍ ആരംഭിച്ച് അഞ്ച് മിനിറ്റ് മാത്രമേ പിന്നിട്ടിരുന്നുള്ളു. കഴിഞ്ഞ അഞ്ച് വര്‍ഷക്കാലം ഡിവിഷനുകളില്‍ നടപ്പാക്കിയ വികസന പദ്ധതികള്‍ ജനങ്ങളിലെത്തിക്കുന്നതിന് 40 ലക്ഷം മുടക്കി ബുക്ക്‌ലെറ്റുകള്‍ അടിച്ച് വിതരണം ചെയ്യുന്ന പദ്ധതിയടക്കം പ്രതിപക്ഷം എതിര്‍പ്പ് പ്രകടിപ്പിച്ച ഒട്ടേറെ അജണ്ടകള്‍ ചര്‍ച്ച ചെയ്യേണ്ടിയിരുന്ന കൗണ്‍സിലാണ് ബഹളത്തെ തുടര്‍ന്ന് ആദ്യ മിനിറ്റുകളില്‍ തന്നെ അവസാനിപ്പിക്കേണ്ടി വന്നത്. കോര്‍പറേഷന്‍റെ തനത് ഫണ്ട് ഉപയോഗിച്ച് എല്‍ഡിഎഫ് തെരഞ്ഞെടുപ്പ് പ്രചാരണം നടത്തുവെന്നാരോപിച്ചായിരുന്നു പ്രതിപക്ഷത്തിന്‍റെ പ്രതിഷേധം. ഏഴാം നമ്പറായി ഉള്‍പ്പെടുത്തിയ അജണ്ട ചര്‍ച്ചയ്ക്ക് വരും മുന്‍പേ പ്രതിപക്ഷ ബഹളത്തിനിടെ മേയര്‍ കൗണ്‍സില്‍ നടപടികള്‍ അവസാനിപ്പിച്ചു ചെയര്‍വിട്ടുപോയി. വികസന നേട്ടങ്ങള്‍ ജനങ്ങളില്‍ എത്തിക്കുന്നതിനെ യുഡിഎഫ് ഭയക്കുന്നത് എന്തിനെന്ന് മേയര്‍ അഡ്വ. എം.അനില്‍കുമാര്‍ ചോദിച്ചു. ഭരണസമിതി നടപ്പാക്കിയ നേട്ടങ്ങളാണ് ബുക്ക്‌ലെറ്റിലുള്ളത്. പ്രതിപക്ഷത്തിന്‍റെ ഡിവിഷനുകളില്‍ ഉള്‍പ്പെടെ നടപ്പാക്കിയ മാതൃകാപരമായ വികസന പദ്ധതികളുണ്ട്. അതെല്ലാം ഉള്‍ക്കൊള്ളിച്ചാണ് കൈപ്പുസ്തകം തയാറാക്കുന്നത്. ഏറ്റവും കുറഞ്ഞനിരക്ക് ക്വാട്ട് ചെയ്ത സ്ഥാപനത്തെയാണ് കൈപ്പുസ്തകം തയാറാക്കാന്‍ പരിഗണിക്കുന്നതെന്നും മേയര്‍ പറഞ്ഞു. എന്നാല്‍ ക്ഷേമ പദ്ധതികള്‍ക്ക് പോലും പണം ചെലവഴിക്കാതെ തെരഞ്ഞെടുപ്പ് പ്രചാരണത്തിനായി ജനങ്ങളുടെ നികുതിപ്പണം ചെലവഴിക്കുന്നത് അധികാരദുര്‍വിനിയോഗമാണെന്ന് പ്രതിപക്ഷ നേതാവ് ആന്‍റണി കുരീത്തറയും പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടിലും കുറ്റപ്പെടുത്തി.

റവന്യു റിക്കവറി നടപടികള്‍ വേഗത്തിലാക്കും

കൊച്ചി: റവന്യു റിക്കവറി സ്റ്റേ ഉള്ളതും ഇല്ലാത്തതുമായ 20ഓളം കേസുകളില്‍ പ്രത്യേക ലിസ്റ്റ് തയാറാക്കി കുടിശിക പിരിച്ചെടുക്കുന്നതിന് നടപടി സ്വീകരിക്കാന്‍ തഹസില്‍ദാര്‍മാര്‍ക്ക് ജില്ലാ കളക്ടറുടെ നിര്‍ദേശം. കളക്ടറേറ്റ് സ്പാര്‍ക്ക് ഹാളില്‍ നടന്ന റവന്യു റിക്കവറി അവലോകനയോഗത്തിലാണ് നടപടികള്‍ വേഗത്തിലാക്കാന്‍ കളക്ടര്‍ ജി. പ്രിയങ്കയുടെ നിര്‍ദേശം. മോട്ടോര്‍ വെഹിക്കിള്‍ ടാക്‌സ്, മോട്ടര്‍ ക്ലെയിം കേസ്, സെയില്‍ ടാക്‌സ്, വാട്ടര്‍ ചാര്‍ജ്, കെഎസ്ഇബി കുടിശിക, റോയല്‍റ്റി കുടിശിക, ബാങ്ക് ലോണ്‍, ലീസ്,പട്ടയം, ഡിജിറ്റല്‍ സര്‍വേ എന്നീ വിഷയങ്ങളാണ് യോഗത്തില്‍ അവലോകനം ചെയ്തത്. ഹൈക്കോടതി സ്റ്റേയുള്ള പത്തോളം കേസുകള്‍ നേരിട്ട് ഇടപെട്ട് സ്റ്റേ ഒഴിവാക്കുന്നതിനുള്ള നടപടികള്‍ സ്വീകരിക്കും. പട്ടയം സംബന്ധമായ കേസുകളില്‍ എല്ലാ ആഴ്ചകളിലും പ്രത്യേക മീറ്റിംഗ് കൂടുന്നതിനും യോഗത്തില്‍ തീരുമാനമായി.

ജില്ലാ ഒളിമ്പിക് അസോസിയേഷൻ ഭാരവാഹികൾ ചുമതലയേറ്റു

കൊച്ചി: എറണാകുളം ജില്ലാ ഒളിമ്പിക് അസോസിയേഷന്‍റെ 2025-2029 വർഷ കാലയളവിലേക്കുള്ള 23 അംഗ ഭരണസമിതി ചുമതലയേറ്റു. എറണാകുളം രവിപുരം മേഴ്സി ഹോട്ടലിൽ ചേർന്ന ജില്ലാ ജനറൽ കൗൺസിൽ യോഗത്തിൽ വരണാധികാരി എം.ജി. ശ്രീജിത്ത് തെരഞ്ഞെടുക്കപ്പെട്ട ഭാരവാഹികളെ പ്രഖ്യാപിച്ചു. പൊതുയോഗത്തിന്‍റെ ഉദ്ഘാടനം കേരള ഒളിമ്പിക് അസോസിയേഷൻ പ്രസിഡന്‍റ് വി. സുനിൽകുമാർ നിർവഹിച്ചു. പ്രസിഡന്‍റ് ഡെന്നി തോമസ് അധ്യക്ഷത വഹിച്ചു. കേരള ഒളിമ്പിക് അസോസിയേഷൻ സെക്രട്ടറി ജനറൽ എസ്. രാജീവ് മുഖ്യപ്രഭാഷണം നടത്തി. പുതിയ ജില്ലാ ഭാരവാഹികളായ പ്രസിഡന്‍റ് ഡെന്നി തോമസ്, ജനറൽ സെക്രട്ടറി ജോയി പോൾ, ട്രഷറർ വി.എ. മൊയ്തീൻ നൈന എന്നിവരെ പൊന്നാട അണിയിച്ച് ആദരിച്ചു. വേൾഡ് അക്വാട്ടിക് മത്സരങ്ങളുടെ ടെക്നിക്കൽ കമ്മിറ്റിയിലേക്ക് തെരഞ്ഞെടുക്കപ്പെട്ട കെഒഎ സെക്രട്ടറി ജനറൽ എസ്. രാജീവിനെയും ആദരിച്ചു. കഴിഞ്ഞ 10 മാസമായി അഡ്ഹോക് കമ്മിറ്റിയാണ് ജില്ലയിൽ അസോസിയേഷൻ പ്രവർത്തനങ്ങളുടെ ചുമതല നിർവഹിച്ചിരുന്നത്.

മെട്രോ രണ്ടാംഘട്ടം : ആദ്യ പിയര്‍ക്യാപ് സ്ഥാപിച്ചു

കൊച്ചി: ജെഎല്‍എന്‍ സ്‌റ്റേഡിയം മുതല്‍ കാക്കനാട് ഇന്‍ഫോപാര്‍ക്ക് വരെയുള്ള കൊച്ചി മെട്രോ രണ്ടാംഘട്ട നിര്‍മാണത്തിന്‍റെ ഭാഗമായി തൂണുകള്‍ക്കു മുകളില്‍ പിയര്‍ക്യാപ് സ്ഥാപിക്കുന്ന ജോലികള്‍ ആരംഭിച്ചു. കളമശേരിയിലെ കാസ്റ്റിംഗ് യാര്‍ഡില്‍ നിര്‍മിച്ച 80 ടണ്‍ ഭാരമുള്ള പിയര്‍ക്യാപ് ഇന്‍ഫോപാര്‍ക്ക് എക്‌സ്പ്രസ് വേ പാതയിലുള്ള 281-ാം നമ്പര്‍ തൂണിലാണ് ഇന്നലെ അര്‍ധരാത്രിയോടെ ഹെവി ഡ്യൂട്ടി ക്രെയിന്‍ ഉപയോഗിച്ച് സ്ഥാപിച്ചത്. തുടര്‍ന്നുള്ള ദിവസങ്ങളില്‍ 284 വരെയുള്ള തൂണുകളില്‍ പിയര്‍ക്യാപ്പുകള്‍ സ്ഥാപിക്കുമെന്ന് കെഎംആര്‍എല്‍ അധികൃതര്‍ അറിയിച്ചു. സെസ്, ആലിന്‍ചുവട്, വാഴക്കാല സ്‌റ്റേഷനുകളുടെ സമീപമായി ഇതുവരെ 22 തൂണുകളുടെ നിര്‍മാണം പൂര്‍ത്തിയായി. മെട്രോപാതയ്ക്കുള്ള 670 പൈലുകളും, സ്‌റ്റേഷനുകള്‍ക്കുള്ള 228 പൈലുകളും ഉള്‍പ്പെടെ മൊത്തം 898 പൈലുകളുടെ നിര്‍മാണവും പൂര്‍ത്തിയായി. കളമശേരിയിലെ കാസ്റ്റിംഗ് യാര്‍ഡില്‍ ഗര്‍ഡറുകളുടെയും പിയര്‍ക്യാപുകളുടെയും നിര്‍മാണം പുരോഗമിക്കുകയാണ്. 64 യു ഗര്‍ഡറുകളുടെയും 30 ഐ ഗര്‍ഡറുകളുടെയും 56 പിയര്‍ക്യാപുകളുടെയും നിര്‍മാണമാണ് ഇതേവരെ പൂര്‍ത്തിയായിരിക്കുന്നത്.

വിദേശമദ്യ ഷോപ്പിൽ മോഷണം: വിലകൂടിയ മദ്യവുമായി കള്ളൻ കടന്നു

തൃപ്പൂണിത്തുറ: താഴ് മുറിച്ച് വിദേശമദ്യ ഷോപ്പിൽ കയറിയ മോഷ്ടാവ് വില കൂടിയ രണ്ട് കുപ്പി വിദേശമദ്യവുമായി കടന്നു. തൃപ്പൂണിത്തുറ പുതിയകാവിനടുത്ത് ചൂരക്കാടുള്ള വിദേശമദ്യ ഷോപ്പിലാണ് ചൊവ്വാഴ്ച്ച രാത്രി കള്ളൻ കയറിയത്. ഷോപ്പിന്‍റെ നാല് താഴുകൾ മുറിച്ചു മാറ്റി അകത്ത് കടന്ന കള്ളൻ 2,800 രൂപയും 2500 രൂപയും വിലയുള്ള ഓരോ വിദേശമദ്യ കുപ്പിയുമായി കടന്നു കളയുകയായിരുന്നു. ബുധനാഴ്ച രാവിലെയെത്തിയ ജീവനക്കാർ ഷോപ്പിന്‍റെ താഴുകൾ മുറിച്ചു മാറ്റിയിരിക്കുന്നത് കണ്ട് സിസിടിവി ദൃശ്യങ്ങൾ പരിശോധിച്ചപ്പോഴാണ് മോഷണം നടന്നതായി തിരിച്ചറിഞ്ഞത്. ചൊവ്വാഴ്ച രാത്രി 12.45 ഓടെയാണ് മോഷണം നടന്നിരിക്കുന്നത്.

വിലക്കയറ്റവും കരിഞ്ചന്തയും : 32 സ്ഥാപനങ്ങളില്‍ പരിശോധന; ക്രമക്കേടിൽ നോട്ടീസ്

കൊച്ചി: ഓണത്തോടനുബന്ധിച്ച് വിപണിയിലെ വിലക്കയറ്റത്തില്‍ സപ്ലൈ ഓഫീസറുടെ നേതൃത്വത്തില്‍ ജില്ലയില്‍ മിന്നല്‍ പരിശോധന. വിവിധയിടങ്ങളിലായി ജില്ലയിലെ 32 സ്ഥാപനങ്ങളിലാണ് പൊതുവിതരണ വകുപ്പ്, ലീഗല്‍ മെട്രോളജി, ഭക്ഷ്യ സുരക്ഷ, പോലീസ് എന്നീ വകുപ്പുകളിലെ ഉദ്യോഗസ്ഥര്‍ ഉള്‍പ്പെട്ട സ്‌ക്വാഡ് പരിശോധന നടത്തിയത്. വിവിധ വ്യാപാര സ്ഥാപനങ്ങള്‍, പലവ്യഞ്ജന പച്ചക്കറി വിപണന കേന്ദ്രങ്ങള്‍, ഹോട്ടലുകള്‍, റസ്റ്റോറന്‍റുകള്‍ എന്നിവിടങ്ങളിലായിരുന്നു പരിശോധന. സാധനങ്ങളുടെ വിലവിവരപ്പട്ടിക പ്രദര്‍ശിപ്പിക്കാത്തത്, അളവുതൂക്ക ഉപകരണങ്ങളിലെ കൃത്രിമം, ലൈസന്‍സില്ലായ്മ, പാക്കിംഗ് മാനദണ്ഡങ്ങള്‍ പാലിക്കാത്തത്, ഉപഭോക്താക്കള്‍ക്ക് ബില്ല് നല്‍കാത്തത്, ഭക്ഷണത്തിനു ഗുണനിലവാരമില്ലായ്മ തുടങ്ങിയ കാര്യങ്ങളാണ് പരിശോധിച്ചത്. ക്രമക്കേടുകള്‍ കണ്ടെത്തിയ സ്ഥാപനങ്ങള്‍ക്കെതിരെ നോട്ടീസ് നല്‍കി. ഓണത്തോടനുബന്ധിച്ച് അവശ്യസാധനങ്ങളുടെ വിലക്കയറ്റവും കരിഞ്ചന്തയും തടയുന്നതിന്‍റെ ഭാഗമായി നടത്തിയ പരിശോധന വരുംദിവസങ്ങളിലും തുടരുമെന്ന് അധികൃതര്‍ അറിയിച്ചു. ജില്ലാ സപ്ലൈ ഓഫീസര്‍ എസ്.ഒ. ബിന്ദു, ലീഗല്‍ മെട്രോളജി അസി. കണ്‍ട്രോളര്‍ എം.വി. അജിത്കുമാര്‍, ഫുഡ് സേഫ്റ്റി ഓഫീസര്‍ രാജീവ് സൈമണ്‍, സീനിയര്‍ സൂപ്രണ്ട് പി.എ. റിയാസ്, കൊച്ചി അസി. താലൂക്ക് സപ്ലൈ ഓഫീസര്‍ ക്രിസ്റ്റിന വര്‍ക്കി, സിപിഒമാരായ പി.എം. നൗഷാദ്, രാജേഷ് തങ്കമണി, പൊതുവിതരണ വകുപ്പ് ജീവനക്കാരന്‍ കെ. രാധേഷ് എന്നിവര്‍ പരിശോധനയില്‍ പങ്കെടുത്തു.

കനാല്‍ നവീകരണ പദ്ധതി : ചെലവന്നൂരില്‍ ഡ്രഡ്ജിംഗ് ആരംഭിച്ചു

കൊച്ചി: കൊച്ചിയുടെ മുഖച്ഛായ മാറ്റുന്ന കനാല്‍ നവീകരണ പദ്ധതിയുടെ ഭാഗമായി ചെലവന്നൂര്‍ കനാലില്‍ ഡ്രഡ്ജിംഗ് ജോലികള്‍ ആരംഭിച്ചു. ആറുമാസം കൊണ്ട് 65,000 ക്വുബിക് മീറ്റര്‍ മണ്ണ് നീക്കി കനാലിന്‍റെ ആഴം കൂട്ടുകയാണ് ലക്ഷ്യം. ചിലവന്നൂര്‍ കനാലിലൂടെയുള്ള ജലഗതാഗതത്തിനുള്ള സാധ്യതയും ഇതോടെ ഉരുത്തിരിയുമെന്ന് മന്ത്രി പി. രാജീവ് പറഞ്ഞു. ബണ്ട് റോഡ് പാലത്തിന്‍റെ നിര്‍മാണം ഡിസംബറില്‍ പൂര്‍ത്തിയാകും. ബണ്ട് റോഡ് ഭാഗത്ത് 500 മീറ്റര്‍ നീളത്തില്‍ കനാല്‍തീരം സൗന്ദര്യവത്കരിക്കുന്ന ജോലികളുടെ ടെൻഡറിംഗ് നടപടികളും ആരംഭിച്ചു. ടൂറിസം, റിക്രിയേഷന്‍, ജലകായിക വിനോദം തുടങ്ങിയവയ്ക്കുള്ള സംവിധാനങ്ങളും പദ്ധതിയുടെ ഭാഗമായി ഏര്‍പ്പെടുത്തും. രണ്ട് ബോട്ട് ജട്ടികള്‍ നിര്‍മിക്കാനും മംഗളവനം കനാല്‍ വികസിപ്പിക്കാനുമുള്ള ഡിപിആര്‍ ഇതിനോടകം സമര്‍പ്പിച്ചിട്ടുണ്ട്. കൊച്ചിയിലെ ആറുകനാലുകള്‍ നവീകരിക്കുന്ന കിഫ്ബി ധനസഹായത്തോടെ കെഎംആര്‍എല്ലും വാട്ടര്‍ അഥോറിറ്റിയും ചേര്‍ന്ന് നടപ്പാക്കുന്ന 3716.10 കോടി രൂപയുടെ ഐയുആര്‍ഡബ്ല്യുറ്റിസ് പദ്ധതിയുടെ ഭാഗമായാണ് ചെലവന്നൂര്‍ കനാല്‍ നവീകരണ ജോലികള്‍ ആരംഭിച്ചത്. പദ്ധതി സംബന്ധിച്ച വിശദാംശങ്ങള്‍ പൊതുജനങ്ങളെ അറിയിക്കാന്‍ കഴിഞ്ഞയിടെ ടൗണ്‍ഹാളില്‍ ബോധവത്കരണ പരിപാടിയും വര്‍ക്ക്‌ഷോപ്പും സംഘടിപ്പിച്ചിരുന്നു.

പാലിന്‍റെ ഗുണനിലവാരം ഉറപ്പാക്കാന്‍ നടപടികളുമായി ക്ഷീരവികസന വകുപ്പ്

കൊച്ചി: ഓണക്കാലത്ത് സംസ്ഥാനത്തേക്ക് എത്തുന്നതും വിറ്റഴിക്കുന്നതുമായ പാലിന്‍റെ ഗുണനിലവാരം ഉറപ്പാക്കാന്‍ നടപടികളുമായി ക്ഷീരവികസന വകുപ്പ്. ജില്ലാ ക്വാളിറ്റി കണ്‍ട്രോള്‍ യൂണിറ്റിന്‍റെ നേതൃത്വത്തിലുള്ള പാല്‍ പരിശോധനയുടെയും ഇന്‍ഫര്‍മേഷന്‍ സെന്‍ററിന്‍റെയും ഉദ്ഘാടനം 30ന് ജില്ലാ കളക്ടര്‍ ജി. പ്രിയങ്ക നിര്‍വഹിക്കും. സെപ്റ്റംബര്‍ മൂന്നുവരെ കാക്കനാട് സിവില്‍ സ്‌റ്റേഷന്‍ അഞ്ചാം നിലയില്‍ പ്രവര്‍ത്തിക്കുന്ന ക്വാളിറ്റി കണ്‍ട്രോള്‍ യൂണിറ്റില്‍ വിപണിയില്‍ ലഭ്യമായ വിവിധ ബ്രാന്‍ഡ് പാല്‍ സൗജന്യമായി പരിശോധിച്ചറിയുന്നതിനും പാലിന്‍റെ ഗുണനിലവാരം സംബന്ധിച്ച സംശയങ്ങള്‍ ഇല്ലാതാക്കുന്നതിനുള്ള ക്രമീകരണങ്ങളും ഏര്‍പ്പെടുത്തിയിട്ടുണ്ട്. പരിശോധനയ്ക്കുള്ള പാല്‍ സാമ്പിളുകള്‍ 200 മില്ലി ലിറ്ററില്‍ കുറയാത്ത രീതിയിലും, പാക്കറ്റ് പാല്‍ പൊട്ടിക്കാത്ത രീതിയിലുമായിരിക്കണം. ഫോണ്‍: 0484 2425603.

ന്യായവില ഓണച്ചന്തകള്‍ ഓണ്‍ ആയി

കൊച്ചി: ഓണത്തോടനുബന്ധിച്ച് അവശ്യസാധനങ്ങള്‍ക്ക് വില ഉയരുന്നതിനിടെ ജില്ലയില്‍ കണ്‍സ്യൂമര്‍ ഫെഡിന്‍റെയും സഹകരണ സംഘങ്ങളുടെയും നേതൃത്വത്തില്‍ ഓണവിപണികള്‍ സജീവമായി. ജില്ലയില്‍ ത്രിവേണി മുഖേന 14 വിപണികളും സഹകരണ സംഘങ്ങള്‍ മുഖേന 159 വിപണികളുമാണ് നടത്തുന്നത്. കണ്‍സ്യൂമര്‍ ഫെഡിന്‍റെ ഓണ വിപണികളില്‍ നോണ്‍ സബ്‌സിഡി ഇനത്തിലുള്ള അവശ്യ നിത്യോപയാഗ സാധനങ്ങള്‍ പൊതു മാര്‍ക്കറ്റിനേക്കാള്‍ 10 മുതല്‍ 40 ശതമാനം വരെ വിലക്കുറവില്‍ ലഭ്യമാണ്. ഓണ വിപണികള്‍ സെപ്റ്റംബര്‍ നാലുവരെ നീണ്ടുനില്‍ക്കും. സപ്ലൈകോയുടെ ജില്ലാ ഓണം ഫെയറിന് കഴിഞ്ഞ ദിവസം കലൂരില്‍ തുടക്കമായിരുന്നു. ഇവിടെ 250ല്‍ അധികം ബ്രാന്‍ഡഡ് ഉത്പന്നങ്ങളാണ് ഓഫര്‍ വിലയിലും വിലക്കുറവിലും നല്‍കുന്നത്. വടവുകോട് ഫാര്‍മേഴ്‌സ് കോ-ഓപ്പറേറ്റീവ് ബാങ്ക്,കുമ്പളങ്ങി സര്‍വീസ് സഹകരണ ബാങ്ക് എന്നിവിടങ്ങളില്‍ കണ്‍സ്യൂമര്‍ ഫെഡിന്‍റെ സഹകരണത്തോടെ ഇന്നലെ ഓണം വിപണി ആരംഭിച്ചു. നോര്‍ത്ത് ചെല്ലാനം സഹകരണ സംഘത്തിന്‍റെ ആഭിമുഖ്യത്തിലും ഓണച്ചന്ത ആരംഭിച്ചിട്ടുണ്ട്.

14 കിലോ തൂക്കമുള്ള രാക്ഷസ കൂന്തൽ

വൈപ്പിൻ: മുനമ്പം ഹാർബറിൽനിന്നു മത്സ്യബന്ധനത്തിനു പോയ കുളച്ചൽ ബോട്ടുകാർക്ക് വളരെ വിരളമായി മാത്രം കണ്ടുവരാറുള്ള രാക്ഷസ കൂന്തൽ ലഭിച്ചു. ആഴക്കടലിൽ മാത്രം കണ്ടു വരാറുള്ള ഒരുതരം കൂന്തലാണിതെന്ന് മത്സ്യത്തൊഴിലാളികൾ പറയുന്നു. ഇവറ്റകൾ പൊതുവെ ആക്രമണകാരികളായതിനാലാണത്രേ രാക്ഷസ കൂന്തൽ എന്ന് വിളിക്കുന്നത്. ചുവന്ന നിറത്തിലുള്ള ഈ കൂന്തലിന് 14 കിലോ തൂക്കം ഉണ്ടായിരുന്നതായി കച്ചവടക്കാരനായ സജീവൻ പറഞ്ഞു. ഇന്നലെ രാവിലെ ഹാർബറിലെ ലേല ഹാളിൽ വില്പനക്കായി ഇറക്കിയിട്ടിരുന്ന രാക്ഷസ കൂന്തൽ കാഴ്ചക്കാരിലും കൗതുകമുണർത്തി.

ഓണാഘോഷം: കോളജുകള്‍ കേന്ദ്രീകരിച്ചും പരിശോധന

കൊച്ചി: കലാലയങ്ങളിലെ ഓണാഘോഷ പരിപാടികള്‍ അതിരുകടക്കാതിരിക്കാന്‍ മോട്ടോര്‍ വാഹന വകുപ്പിന്‍റെ നേതൃത്വത്തില്‍ പ്രത്യേക പരിശോധന നടത്തി. ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണറുടെ പ്രത്യേക നിര്‍ദേശ പ്രകാരം എന്‍ഫോഴ്‌സ്‌മെന്‍റ് ആര്‍ടിഒയുടെ നേതൃത്വത്തിലാണ് കലാലയങ്ങള്‍ കേന്ദ്രീകരിച്ച് വാഹന പരിശോധന നടത്തിയത്. കൊച്ചിന്‍ കോളജ്, ഗുജറാത്തി കോളജ്, കെഎംഇഎ കോളജ്, ഫാത്തിമ സ്‌കൂള്‍, മോഡല്‍ എന്‍ജിനീയറിംഗ് കോളജ്, ഫിസാറ്റ്, മോണിംഗ് സ്റ്റാര്‍ എന്നീ കോളജുകളിലാണ് പരിശോധന നടത്തിയത്. അശ്രദ്ധമായ ഡ്രൈവിംഗ്, അനധികൃതമായി രൂപമാറ്റം വരുത്തിയ വാഹനങ്ങള്‍ ഓടിക്കുന്നത്, സൈലന്‍സര്‍ മാറ്റം വരുത്തുന്നത്, ഹെല്‍മെറ്റ് ധരിക്കാതെയുള്ള യാത്ര, അനുവദനീയമായതിലും അധികം ആളുകളുമായി യാത്ര ചെയ്യുന്നത് തുടങ്ങിയ നിയമലംഘനങ്ങള്‍ക്കെതിരേ നടപടി സ്വീകരിച്ചു. വരും ദിവസങ്ങളിലും പരിശോധന തുടരുമെന്ന് എന്‍ഫോഴ്‌സ്‌മെന്‍റ് ആര്‍ടിഒ അറിയിച്ചു.

ഗോത്ര കലാ പൈതൃകങ്ങളുടെ വൈവിധ്യങ്ങളുമായി ഗദ്ദിക

കൊച്ചി: പട്ടികവിഭാഗങ്ങളുടെ തനതുകലകളും പരമ്പരാഗത ഉത്പന്നങ്ങളും പരിചയപ്പെടാന്‍ അവസരം ഒരുക്കി ഗദ്ദിക 2025 നാടന്‍ ഉത്പന്ന പ്രദര്‍ശന കലാമേളയ്ക്ക് നാളെ കൊച്ചിയില്‍ തുടക്കമാകും. വൈകുന്നേരം നാലിന് കലൂര്‍ ജെഎന്‍എല്‍ സ്റ്റേഡിയത്തില്‍ മന്ത്രി പി. രാജീവ് ഉദ്ഘാടനം നിര്‍വഹിക്കും. സെപ്റ്റംബര്‍ രണ്ടുവരെ നീളുന്ന മേളയിലൂടെ പരമ്പരാഗത ഉത്പന്നങ്ങള്‍ കാണാനും വാങ്ങുന്നതിനും പാരമ്പര്യ കലാമേളകള്‍ ആസ്വദിക്കാനുമുളള അവസരം ഒരുക്കിയിട്ടുണ്ട്. 65 സ്റ്റാളുകളും, പട്ടികവര്‍ഗ, പിന്നാക്ക, കിര്‍ടാഡ്‌സ് വകുപ്പുകളുടെ 25 സ്റ്റാളുകളും ഉള്‍പ്പെടെ 90ലധികം സ്റ്റാളുകളും, പരമ്പരാഗത ഗോത്ര വിഭാഗക്കാരുടെ കുടിലുകളും ഏറുമാടങ്ങളും മേളയിലുണ്ടാകും. പരമ്പരാഗത ഗോത്ര രുചിവൈവിധ്യങ്ങള്‍ ആസ്വദിക്കാന്‍ കഴിയുന്ന ഭക്ഷണ സ്റ്റാളുകളും പരമ്പരാഗത ചികിത്സാ രീതികള്‍ പരിചയപ്പെടുത്തുന്ന സ്റ്റാളുകളും മേളയില്‍ ഒരുക്കിയിട്ടുണ്ട്. ദിവസവും വിവിധ വിഷയങ്ങളില്‍ സെമിനാറുകളും വൈകിട്ട് അഞ്ചിന് സാംസ്‌കാരിക സമ്മേളനവും നടക്കും. രാത്രികളില്‍ പട്ടിക വിഭാഗക്കാരുടെ പരമ്പരാഗത കലാരൂപങ്ങള്‍, പ്രശസ്ത കലാകാരന്‍മാരുടെ കലാപരിപാടികള്‍ എന്നിവ അരങ്ങേറും. പ്രവേശനം സൗജന്യമാണ്.

ഓണക്കൊയ്ത്ത്

മേടവും ചിങ്ങവും കാര്‍ഷികസംബന്ധിയായ രണ്ട് സംക്രമ കാലങ്ങളാണ്.മേടത്തിനു തുടങ്ങുന്ന വിരിപ്പു കൃഷിയുടെ കൊയ്ത്ത് കാലമാണ് കേരളത്തിന്‍റെ ഏറ്റവും വലിയ ആഘോഷ കാലമായ ഓണമായി കൊണ്ടാടുന്നത്. കര്‍ക്കടകത്തിലെ കറുത്ത വാവ് കഴിഞ്ഞു വരുന്ന ആദ്യത്തെ ഞായറാഴ്ചയാണ് പലയിടങ്ങളിലും ഇല്ലംനിറ. നെല്‍ക്കതിര്‍ മുറ്റത്ത് വച്ച് പൂജിച്ച് പത്തായത്തിലും മച്ചിലും പൂജാമുറികളിലും കതിര് നിറയ്ക്കും. ചിലര്‍ കതിര്‍ക്കുലകള്‍ കെട്ടിയിടും. കര്‍ക്കടകം കഴിഞ്ഞാല്‍ ഉത്രാടം വരെയും ഉത്തര മലബാറില്‍ നിറയുണ്ട്. ഉത്രാട നിറ കാസര്‍ കോഡിന്‍റെ പ്രത്യേകതയാണ്. തെക്കന്‍ തിരുവിതാംകൂറില്‍ ഓണത്തിന് നെല്ലിന്‍റെ പിറന്നാളാണ്. ചിങ്ങത്തിലെ മകം ഇങ്ങനെ ആചരിക്കുന്നവരുണ്ട്. നെല്ലിനെ ഒഴുകുന്ന വെള്ളത്തില്‍ കുളിപ്പിച്ച് ആഘോഷപൂര്‍വം വീട്ടുമുറ്റത്തേക്ക് എത്തിച്ച് ചന്ദനമണിയിച്ച് പൂജിക്കുന്നതാണ് ചടങ്ങ്. നിറയ്ക്കു ശേഷം ആദ്യത്തെ വിളവെടുപ്പിന്‍റെ പുന്നെല്ലരി കൊണ്ട് ആഹാരമുണ്ടാക്കുന്നതാണ് പുത്തരി നിവേദ്യം. പുത്തരി പായസം, പുത്തരി ചോറ്, പുത്തരി അവല്‍ എന്നിവയും ഉണ്ടാക്കും. ഗുരുവായൂര്‍, ശബരിമല, ഹരിപ്പാട് ക്ഷേത്രങ്ങളില്‍ നിറ പുത്തരി ചടങ്ങുകള്‍ പ്രശസ്തമാണ്. ഓണക്കൊയ്ത്തിന്‍റെ ഈ പുത്തരി ഊണോടെയായിരുന്നു പണ്ടത്തെ ഓണസദ്യകള്‍.

26 ഹൈബ്രീഡ് നായകളോടൊപ്പം മൂന്നാം ക്ലാസുകാരനെ തനിച്ചാക്കി പിതാവ് കടന്നു

തൃപ്പൂണിത്തുറ: 26 നായകളോടൊപ്പം മൂന്നാം ക്ലാസുകാരനായ മകനെ തനിച്ചാക്കി പിതാവ് കടന്നു കളഞ്ഞു. എരൂർ പിഷാരി കോവിൽ റോഡിനടുത്തുള്ള തൈക്കാട്ട് ദേവീ ക്ഷേത്രത്തിനു സമീപത്തെ വാടക വീട്ടിലാണ് 26 ഹൈബ്രീഡ് നായകളെയും മകനെയും ഉപേക്ഷിച്ച് പിതാവ് സുധീഷ് എസ്. കുമാർ പോയത്. കഴിഞ്ഞ ഞായറാഴ്ച്ചയായിരുന്നു സംഭവം. വീട്ടിൽ തനിച്ചായ കുട്ടി പിറ്റേന്ന് ഫോണിൽ പോലീസിനെ വിളിച്ചപ്പോഴാണ് വിവരം പുറംലോകമറിഞ്ഞത്. സ്ഥലത്തെത്തിയ പോലീസ് തിങ്കളാഴ്ച രാത്രിയോടെ കുട്ടിയെ ബന്ധുക്കളെ ഏൽപ്പിച്ചു. പിതാവിനെ ഫോണിൽ ബന്ധപ്പെടാൻ ശ്രമിച്ചെങ്കിലും ലഭ്യമായിരുന്നില്ല. കുട്ടിയുടെ മാതാവ് വിദേശത്താണെന്ന് പറയുന്നു. മൂന്നു ദിവസത്തിലധികമായി ഭക്ഷണവും മറ്റും കിട്ടാതെ പട്ടിണിയിലായ നായകൾ റോഡിലേക്കിറങ്ങി അലയാൻ തുടങ്ങിയിരുന്നു. വാർഡ് കൗൺസിലർ പി.ബി. സതീശൻ അറിയിച്ചതനുസരിച്ച് എസ്പിസിഎ ജില്ലാ സെക്രട്ടറി ടി.കെ. സജീവൻ സ്ഥലത്തെത്തി നായകൾക്ക് ഭക്ഷണം നൽകി. പിന്നീട് നായകളെ ഇവിടെനിന്നും മാറ്റണമെന്ന പ്രദേശവാസികളുടെ ആവശ്യത്തെ തുടർന്ന് 26 നായകളെയും കൊച്ചിയിൽ നായകളെ പരിപാലിക്കുന്ന ഷെൽട്ടറിലേക്ക് ഇന്നലെ വൈകുന്നേരത്തോടെ മാറ്റി.

സ്വകാര്യ ബസുകളിൽ എംവിഡി പരിശോധന : 42 വാഹനങ്ങള്‍ക്കെതിരേ നടപടി; 35,250 രൂപ പിഴ

ലൈസന്‍സ് ഇല്ലാത്ത ഡ്രൈവറും കുടുങ്ങി കൊച്ചി: എംവിഡിയുടെ പരിശോധനയില്‍ കുടുങ്ങിയത് നിരോധിത എയര്‍ ഹോണ്‍ മുതല്‍ ലൈസന്‍സ് ഇല്ലാത്ത ഡ്രൈവര്‍ വരെ. സ്വകാര്യ ബസുകള്‍ കേന്ദ്രീകരിച്ച് മട്ടാഞ്ചേരിയില്‍ മോട്ടോര്‍ വാഹനവകുപ്പ് നടത്തിയ പരിശോധനയിലാണ് നിരവധി നിയമലംഘനങ്ങള്‍ കണ്ടെത്തിയത്. 42 വാഹനങ്ങള്‍ക്കെതിരേ നടപടി സ്വീകരിച്ച എംവിഡി 35,250 രൂപ പിഴയും ചുമത്തി. എന്‍ഫോഴ്‌സ്‌മെന്‍റ് ആര്‍ടിഒ, എറണാകുളം ആര്‍ടിഒ എന്നിവരുടെ നിര്‍ദേശപ്രകാരം എന്‍ഫോഴ്‌സ്‌മെന്‍റ് ആര്‍ടിഒയില്‍ നിന്നുള്ള രണ്ടു സ്‌ക്വാഡുകളും മട്ടാഞ്ചേരി സബ് ആര്‍ടിഒ ഓഫീസില്‍ നിന്നുള്ള ഒരു സ്‌ക്വാഡും പരിശോധന നടത്തിയത്. 95 വാഹനങ്ങള്‍ ഉദ്യോഗസ്ഥര്‍ പരിശോധിച്ചു. റോഡ് ടാക്‌സ് ഇല്ലാത്ത ഒരു വാഹനവും ലൈസന്‍സ് ഇല്ലാതെ വാഹനം ഓടിച്ച ഒരു ഡ്രൈവറെയും പരിശോധനയില്‍ പിടികൂടി. നിരോധിത എയര്‍ഹോണ്‍, അമിത ശബ്ദത്തില്‍ മ്യൂസിക് സിസ്റ്റം പ്രവര്‍ത്തിപ്പിക്കുക, കണ്ടക്ടര്‍ ലൈസന്‍സ് ഇല്ലാത്തവര്‍ തുടങ്ങിയ നിയമലംഘനങ്ങളാണ് കണ്ടെത്തിയവയില്‍ ഭൂരിഭാഗവും. എന്‍ഫോഴ്‌സ്‌മെന്‍റ് വിഭാഗത്തിന്‍റെ നേതൃത്വത്തില്‍ വരും ദിവസങ്ങളിലും പരിശോധന തുടരും.

ടെറസിൽ നിന്നും കാൽ വഴുതി വീണ് മരിച്ചു

പനങ്ങാട്: ടെറസിൽ നിന്നും കാൽ വഴുതി വീണ് ചികിത്സയിലായിരുന്ന ഗൃഹനാഥൻ മരിച്ചു. പനങ്ങാട് മണപൊഴിൽ പരേതരായ മാധവന്‍റെയും ശാരദയുടെയും മകൻ രഞ്ജിത്താ(46)ണ് മരിച്ചത്. മഴ വരുന്നത് കണ്ട് അലക്കിയിട്ട തുണിയെടുക്കാൻ ടെറസിൽ കയറിയതായിരുന്നു.അബദ്ധത്തിൽ കാൽ വഴുതി വീണ് പരിക്കേറ്റതിനെ തുടർന്ന് ചികിത്സയിലിരിക്കേയാണ് മരണം. എട്ടു ദിവസത്തോളം നെട്ടൂരിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലായിരുന്നു. സംസ്കാരം നടത്തി.ഭാര്യ: സനിത. സഹോദരങ്ങൾ: പരേതനായ മോഹനൻ, അജിത, രമ, പൊന്നൻ, വിനോദ്, രജനി.

തടിലോറിയുടെ പിന്നിൽ ബൈക്കിടിച്ച് യുവാവിന് ദാരുണാന്ത്യം

മൂവാറ്റുപുഴ: വെള്ളൂര്‍ക്കുന്നത്ത് നിര്‍ത്തിയിട്ടിരുന്ന തടിലോറിയുടെ പിന്നില്‍ ബൈക്കിടിച്ച് കയറി യുവാവിന് ദാരുണാന്ത്യം. പെരുമ്പാവൂര്‍ എംസി റോഡില്‍ വെള്ളൂര്‍ക്കുന്നം സിഗ്‌നല്‍ ജംഗ്ഷന് സമീപം ഇന്നലെ പുലര്‍ച്ചെയുണ്ടായ അപകടത്തില്‍ സ്വകാര്യ ധനകാര്യ സ്ഥാപനത്തിലെ ജീവനക്കാരനായ കോട്ടയം പാമ്പാടി ആലുങ്കല്‍ പറമ്പില്‍ അനന്ദു ചന്ദ്രനാ(30)ണ് മരിച്ചത്.അനന്ദു സഞ്ചരിച്ച ബൈക്ക് ടയര്‍ പഞ്ചറായതിനെ തുടര്‍ന്ന് നിയന്ത്രണം നഷ്ടപ്പെട്ട് റോഡരികില്‍ നിര്‍ത്തിയിട്ടിരുന്ന തടിലോറിയുടെ പിന്നിലേക്ക് ഇടിച്ച് കയറുകയായിരുന്നു. ഗുരുതര പരിക്കേറ്റ അനന്ദുവിനെ മൂവാറ്റുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. തലയ്ക്ക് ഗുരുതരമായി പരിക്കേറ്റ അനന്ദുവിനെ പേഴയ്ക്കാപ്പിള്ളി സ്വദേശി ഷൗക്കത്ത്, ലോറി ഡ്രൈവര്‍ എന്നിവര്‍ ചേര്‍ന്ന് ആശുപത്രിയില്‍ എത്തിക്കുകയായിരുന്നു. സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ട് നല്‍കും.

രാജവീഥിയെ പുളകംകൊള്ളിച്ച് അത്തം ഘോഷയാത്ര

തൃപ്പൂണിത്തുറ: മലയാളത്തിന്‍റെ മഹോത്സവമായ ഓണത്തിന്‍റെ വരവറിയിച്ച് തൃപ്പൂണിത്തുറയിൽ നിറപ്പകിട്ടിന്‍റെ ആഘോഷമായി അത്തം ഘോഷയാത്ര. ഗവ.ബോയ്സ് ഹയർ സെക്കൻഡറി സ്കൂൾ ഗ്രൗണ്ടിലെ അത്തം നഗറിൽ മന്ത്രി എം.ബി. രാജേഷ് അത്താഘോഷം ഉദ്ഘാടനം ചെയ്തു. മന്ത്രി പി. രാജീവ് അത്തപ്പതാക ഉയർത്തി. ചലച്ചിത്രതാരം ജയറാം ഫ്ലാഗ് ഓഫ് ചെയ്തതോടെ തടിച്ചുകൂടിയ പതിനായിരങ്ങൾക്ക് ആവേശം പകർന്ന് ചമയ പുറപ്പാടിനായി കാത്തുനിന്ന കലാരൂപങ്ങൾ രാജവീഥിയിലേക്കിറങ്ങി. അത്തം ഘോഷയാത്രയുടെ വരവറിയിക്കുന്ന അനൗൺസ്മെന്‍റ് വാഹനത്തിന് പിറകെ നീങ്ങിയ ജനപ്രതിനിധികളുൾപ്പെടുന്ന സംഘാടകർക്ക് പിന്നാലെയായി രാജഭരണകാലത്തെ അത്തച്ചമയത്തെ ഓർമപ്പെടുത്തും വിധം പെരുമ്പറ മുഴക്കി നകാരയിറങ്ങി. പിന്നാലെ രാജാവിന്‍റെ പല്ലക്ക്, മാവേലി, വിദ്യാർഥികളുടെ മാർച്ചിനും കലാപ്രകടനങ്ങൾക്കും പുറകെ പൗരാണികവും ആധുനികവുമായ ഒട്ടേറെ കലാരൂപങ്ങളും നൃത്തച്ചുവട് വച്ചിറങ്ങി. ഏറ്റവും പിന്നിലായി നിശ്ചലദൃശ്യങ്ങളും ഘോഷയാത്രയ്ക്ക് കൊഴുപ്പേകി. മൂവായിരത്തിലധികം കലാകാരന്മാർ പങ്കെടുത്ത ഘോഷയാത്രയുടെ മുൻനിര കിഴക്കേക്കോട്ട പിന്നിട്ടപ്പോഴും അത്തം നഗറിൽ നിന്ന് മുഴുവനായി ഇറങ്ങിയിരുന്നില്ല. നഗരം ചുറ്റിയ ഘോഷയാത്ര ഉച്ചയ്ക്ക് 2.30ഓടെയാണ് തിരികെയെത്തിയത്. രാവിലെ സിയോൺ ഓഡിറ്റോറിയത്തിൽ നടന്ന പൂക്കള മത്സരങ്ങളുടെ പ്രദർശനം വൈകു ന്നേരം നടന്നു. ലായം കൂത്തമ്പലത്തിൽ വൈകുന്നേരം നടന്ന കലാസന്ധ്യ ഉദ്ഘാടനത്തോടെ രാജനഗരിക്ക് ആഘോഷനാളുകൾ സമ്മാനിച്ച് 10 ദിവസം നീണ്ടുനിൽക്കുന്ന കലാപരിപാടികൾക്കും തുടക്കമായി. ആനയെ തിരികെ കൊണ്ടുപോയി ഘോഷയാത്രയിൽ പങ്കെടുത്ത കുറുവട്ടൂർ ഗണേഷ് എന്ന ആനയെ സ്റ്റാച്ച്യു ജംഗ്ഷനിൽ നിന്ന് തിരികെ കൊണ്ടുപോയി. രാവിലെ 11ന് ശേഷം ആനകളെ എഴുന്നള്ളിക്കാൻ പാടില്ലെന്ന ഉത്തരവ് നിലനിൽക്കുമ്പോഴാണ് ഘോഷയാത്രയിൽ പങ്കെടുപ്പിക്കാൻ ആനയെ സംഘാടകർ എത്തിച്ചത്. ആനയ്ക്ക് ഫിറ്റ്നസ് സർട്ടിഫിക്കറ്റ് ഇല്ലായിരുന്നുവെന്നും ആരോപണമുണ്ട്. വേദിയിൽ മോക് പോളിംഗ് ബൂത്ത് ‌ തദ്ദേശ തെരഞ്ഞെടുപ്പ് ബോധവത്കരണ പദ്ധതിയുടെ ഭാഗമായി അത്തച്ചമയ വേദിയിൽ മോക് പോളിംഗ് ബൂത്ത് ഒരുക്കിയിരുന്നു. ജില്ലാ കളക്ടർ ജി. പ്രിയങ്ക തെരഞ്ഞെടുപ്പ് ഡെസ്ക് ഉദ്ഘാടനം ചെയ്തു. അത്തച്ചമയം കാണാനെത്തിയ നിരവധിപേർ വോട്ട് ചെയ്താണ് മടങ്ങിയത്. വാടിത്തളർന്ന് കലാകാരന്മാർ നിശ്ചലദൃശ്യങ്ങളിൽ പങ്കെടുത്ത കലാകാരന്മാർ കനത്ത ചൂടിൽ അവശരായി. ഓർമകളിലെ എം.ടി. വൈശാലി എന്ന പേരിൽ അവതരിപ്പിച്ച നിശ്ചല ദൃശ്യത്തിലെ കലാകാരി മോഹാലസ്യപ്പെട്ടതിനെ തുടർന്ന് ഫയർഫോഴ്സ് വാഹനത്തിൽ ആശുപത്രിയിലെത്തിച്ചു. മറ്റ് നിശ്ചലദൃശ്യങ്ങളിൽ പങ്കെടുത്ത കലാകാരന്മാരും വെള്ളം ശരീരത്തിൽ സ്പ്രേ ചെയ്തും മറ്റുമാണ് പൂർത്തിയാക്കിയത്. പ്രളയം പ്രഥമം അത്തം ഘോഷയാത്രയിൽ നിശ്ചലദൃശ്യങ്ങളുടെ വിഭാഗത്തിൽ കുരീക്കാട് ഉദയ ക്ലബ് അവതരിപ്പിച്ച തോരാമഴയും തീരാദുഃഖവും - പ്രളയം ഒന്നാം സ്ഥാനം നേടി. രണ്ടാം സ്ഥാനം മുളന്തുരുത്തി പെരുമ്പിള്ളി ഗ്രാമീണ വായനശാല അവതരിപ്പിച്ച മറയുന്ന കർമ്മ രംഗവും മൂന്നാം സ്ഥാനം തെക്കുംഭാഗം ചങ്ങാതിക്കൂട്ടം അവതരിപ്പിച്ച മാരക ലഹരി ആപത്ത്; ആസ്വദിക്കാം ജീവിതം എന്ന ദൃശ്യവും നേടി. പൂക്കള മത്സരത്തിൽ സി.സി ഗ്രൂപ്പ് പള്ളുരുത്തി ഒന്നാം സ്ഥാനവും മഴവിൽ ആർട്‌സ് വരാപ്പുഴ രണ്ടാം സ്ഥാനവും നവോദയ എളമക്കര മൂന്നാം സ്ഥാനവും നേടി. സ്കൂൾ മാർച്ച് പാസ്റ്റിൽ തൃപ്പൂണിത്തുറ ഗവ. വൊക്കേഷണൽ ആൻഡ് ഹയർ സെക്കൻഡറി സ്കൂൾ ഫോർ ബോയ്സ് ഒന്നാം സ്ഥാനവും തൃപ്പൂണിത്തുറ സെന്‍റ് ജോസഫ് സിജിഎച്ച്എസ്എസ് രണ്ടാം സ്ഥാനവും തൃപ്പൂണിത്തുറ ഗവ. ഗേൾസ് ഹയർ സെക്കൻഡറി സ്കൂൾ മൂന്നാം സ്ഥാനവും നേടി. ഓണം ചവിട്ടി താഴ്ത്തലുകളെ അതിജീവിക്കുന്ന ആഘോഷം: മന്ത്രി എം.ബി. രാജേഷ് തൃപ്പൂണിത്തുറ: ചവിട്ടി താഴ്ത്തലുകളെ അതിജീവിക്കുന്നതിന്‍റെയും അതിൽനിന്ന് ഉയിർത്തെഴുന്നേൽക്കുന്നതിന്‍റെയും ആഘോഷമാണ് ഓണമെന്ന് മന്ത്രി എം.ബി. രാജേഷ്. തൃപ്പൂണിത്തുറയിൽ അത്താഘോഷം ഉദ്ഘാടനം ചെയ്യുകയായിരുന്നു അദ്ദേഹം. ഓണാഘോഷത്തെ മറിച്ച് വ്യാഖ്യാനിക്കാനുള്ള ശ്രമങ്ങളുണ്ടായെങ്കിലും അതെല്ലാം മലയാളികൾ തള്ളിക്കളഞ്ഞുവെന്നത് അഭിമാനത്തോടെ ഓർക്കേണ്ടതാണെന്നും അദ്ദേഹം പറഞ്ഞു. എത്ര ചവിട്ടി താഴ്ത്തിയാലും സമത്വദർശനം ഏതു പാതാളത്തിൽ നിന്നും ഉയിർത്തെഴുന്നേൽക്കുമെന്ന ആശയമാണ് ഓണം മുന്നോട്ടുവയ്ക്കുന്നത്. ഒരു തരത്തിലുള്ള വ്യത്യാസവുമില്ലാതെ മനുഷ്യരെ മുഴുവൻ ഒന്നായി കാണുന്ന മറ്റൊരു ആഘോഷം ഇന്ത്യയിൽ മറ്റൊരിടത്തുമില്ലായെന്നതും നമുക്ക് അഭിമാനിക്കാനുള്ള കാര്യമാണ്. പ്ലാസ്റ്റിക്കിനെ പൂർണമായും ഒഴിവാക്കി ഹരിതചട്ടങ്ങൾ പാലിച്ചു വേണം, ഓണാഘോഷങ്ങൾ നടത്താനെന്നും മന്ത്രി കൂട്ടിച്ചേർത്തു. കെ. ബാബു എംഎൽഎ അധ്യക്ഷത വഹിച്ചു. അത്തച്ചമയം ഘോഷയാത്ര സിനിമാതാരം ജയറാം ഫ്ലാഗ് ഓഫ് ചെയ്തു. ഫ്രാൻസിസ് ജോർജ് എംപി, അനൂപ് ജേക്കബ് എംഎൽഎ, ജില്ലാ കളക്ടർ ജി. പ്രിയങ്ക, നടൻ രമേശ് പിഷാരടി തുടങ്ങിയവർ മുഖ്യാതിഥികളായി. തൃപ്പൂണിത്തുറ നഗരസഭാ ചെയർപേഴ്സൺ രമ സന്തോഷ്, ഉപാധ്യക്ഷൻ കെ.കെ. പ്രദീപ്കുമാർ തുടങ്ങിയവർ പങ്കെടുത്തു.

നവജാതശിശുവിനെ കുഴിച്ചിട്ട നിലയിൽ: മാതാപിതാക്കൾക്ക് എതിരെ കൊലക്കുറ്റം ഒഴിവാക്കി

പെരുമ്പാവൂർ: നവജാത ശിശുവിനെ വീടിന് സമീപം കുഴിച്ചിട്ട നിലയിൽ കണ്ടെത്തിയ സംഭവത്തിൽ മാതാപിതാക്കൾക്കെതിരെ കൊലപാതകക്കുറ്റം ഒഴിവാക്കി പോലീസ്. കുഞ്ഞ് ഗർഭപാത്രത്തിൽ വച്ചുതന്നെ മരണപ്പെട്ടുവെന്ന പോസ്റ്റുമോർട്ടം റിപ്പോർട്ടിന്‍റെ അടിസ്ഥാനത്തിലാണ് ഇരുവർക്കെതിരെയുള്ള കൊലപാതകതക്കുറ്റം ഒഴിവാക്കിയത്. എന്നാൽ മരണം മറച്ചുവച്ച് വീട്ടുപരിസരത്ത് കുഴിച്ചിട്ടതിന് ഇരുവർക്കുമെതിരെ കേസെടുക്കും. തിങ്കളാഴ്ച വൈകുന്നേരമാണ് പെരുമ്പാവൂർ കാഞ്ഞിരക്കാട് ഇതരസംസ്ഥാന സ്വദേശികളായ ദമ്പതികൾ വാടകയ്ക്ക് താമസിക്കുന്ന വീടിന്‍റെ സമീപത്ത് നവജാത ശിശുവിന്‍റെ മൃതദേഹം കണ്ടെത്തിയത്. നായ്ക്കൾ മണ്ണ മാന്തുന്നതു കണ്ട് സമീപവാസികളാണ് മൃതദേഹം ആദ്യം കണ്ടത്. തുടർന്ന് പോലീസിൽ വിവരം അറിയിക്കുകയായിരുന്നു.

കഞ്ചാവുമായി ഒഡീഷ സ്വദേശി പിടിയിൽ

കോതമംഗലം: കോഴിപ്പിള്ളിയിൽ 3.5 കിലോ കഞ്ചാവുമായി ഒഡീഷ സ്വദേശി ഭിമോ ബിറോ(27)യെ അറസ്റ്റ് ചെയ്തു. കോതമംഗലം എക്സൈസ് ഇൻസ്പെക്ടറുടെ നേതൃത്വത്തിലുള്ള പ്രത്യേക അന്വേഷണ സംഘവും എറണാകുളം എക്സൈസ് ഇന്‍റലിജൻസ് ബ്യൂറോയും ചേർന്ന് പിടികൂടിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

വാക്‌പോര്, ബഹളം; കൗണ്‍സില്‍ യോഗം പിരിഞ്ഞു

കൊച്ചി: നഗരത്തിലെ പ്ലാസ്റ്റിക് മാലിന്യനീക്കവുമായി ബന്ധപ്പെട്ട് നഗരസഭാ ആരോഗ്യവിഭാഗം ഉദ്യോഗസ്ഥന്‍ കണ്ടെത്തിയ ക്രമക്കേടുകള്‍ക്ക് മേയര്‍ ഒത്താശ ചെയ്യുകയാണെന്നും പിന്നില്‍ സിപിഎം താല്‍പര്യങ്ങളുണ്ടെന്നുമുള്ള പ്രതിപക്ഷ ആരോപണം കൊച്ചി കോര്‍പറേഷന്‍ കൗണ്‍സില്‍ യോഗത്തില്‍ ഭരണ പ്രതിപക്ഷ വാക്‌പോരിനും ബഹളത്തിനും ഇടയാക്കി. പാര്‍ട്ടിയെ അനാവശ്യമായി വലിച്ചിഴച്ചതിലായിരുന്നു സിപിഎം കൗണ്‍സിലര്‍മാരുടെ എതിര്‍പ്പ്. തെളിവ് നല്‍കണമെന്ന് ആവശ്യപ്പെട്ട് ഭരണപക്ഷ കൗണ്‍സിലര്‍മാര്‍ നടുത്തളത്തിലിറങ്ങി പ്രതിപക്ഷത്തെ നേരിട്ടു. ഇതിനിടെ കൗണ്‍സില്‍ യോഗം അവസാനിപ്പിച്ച് മേയര്‍ ചെയര്‍വിട്ട് ഇറങ്ങിപ്പോയി. തെളിവ് നല്‍കാതെ പ്രതിപക്ഷ കൗണ്‍സിലര്‍മാരെ പുറത്തിറക്കാന്‍ അനുവദിക്കില്ലെന്ന് പറഞ്ഞ് യുവ സിപിഎം അംഗങ്ങള്‍ കൗണ്‍സില്‍ ഹാളിന്‍റെ വാതില്‍ കുറ്റിയിട്ടു. മുതിര്‍ന്ന കൗണ്‍സിലര്‍മാര്‍ ഇടപെട്ടാണ് ഇവരെ പിന്തിരിപ്പിച്ചത്. കളക്ഷന്‍ പോയിന്‍റില്‍ നിന്ന് തൂക്കം അളക്കുന്ന അതേ പ്ലാസ്റ്റിക് മാലിന്യം ആര്‍ആര്‍ആറില്‍ എത്തിച്ച് വീണ്ടും ഭാരം അളക്കുന്നതുവഴി നഗരസഭയ്ക്ക് സാമ്പത്തികനഷ്ടം ഉണ്ടാകുന്നുവെന്നാണ് നഗരസഭാ ഹെല്‍ത്ത് ഇന്‍സ്‌പെക്ടറുടെ റിപ്പോര്‍ട്ട് ഉദ്ധരിച്ച് പ്രതിപക്ഷം ആരോപണം ഉന്നയിച്ചത്. ഇതുവഴി യഥാര്‍ഥ ഭാരത്തേക്കാള്‍ ഇരട്ടി ഭാരം കണക്കാക്കപ്പെടുന്നതായും കൂട്ടിക്കാണിച്ച ഭാരത്തിനുള്ള തുകയാണ് കരാര്‍ ഏജന്‍സി ആവശ്യപ്പെട്ടിരിക്കുന്നത് എന്നുമാണ് റിപ്പോര്‍ട്ടിലുള്ളത്. ഹെല്‍ത്ത് ഇന്‍സ്‌പെക്ടര്‍ എതിര്‍പ്പറിയിച്ച റിപ്പോര്‍ട്ട് അവഗണിച്ച് കരാര്‍ ഏജന്‍സിക്ക് മേയര്‍ പണം അനുവദിച്ചത് സ്വന്തം പാര്‍ട്ടിക്കാരായ മാലിന്യ നീക്ക വാഹന കരാറുകാരെ സഹായിക്കാനാണെന്നും പ്രതിപക്ഷ നേതാവ് ആന്‍റണി കുരീത്തറയും യുഡിഎഫ് പാര്‍ലമെന്‍ററി നേതാവ് എം.ജി. അരിസ്റ്റോട്ടിലും ആരോപിച്ചു. ഇതേതുടര്‍ന്നാണ് സിപിഎം കൗണ്‍സിലര്‍മാര്‍ എതിര്‍പ്പുമായി നടുത്തളത്തിലിറങ്ങിയത്. ടോണി ചമ്മണി മേയറായിരുന്ന യുഡിഎഫ് ഭരണകാലത്താണ് പ്രതിപക്ഷം ആക്ഷേപം ഉന്നയിക്കുന്ന ഏജന്‍സിക്ക് ബ്രഹ്മപുരത്തുനിന്ന് പ്ലാസ്റ്റിക് മാലിന്യം നീക്കാന്‍ കരാര്‍ നല്‍കിയതെന്ന് മേയര്‍ എം. അനില്‍കുമാര്‍ തിരിച്ചടിച്ചു. തെരുവുവിളക്ക് തെളിക്കാന്‍ യുഡിഎഫ് കാലത്ത് ചെലവെത്ര? റിപ്പോര്‍ട്ട് ആവശ്യപ്പെട്ട് മേയര്‍ കൊച്ചി: നഗരത്തില്‍ തെരുവുവിളക്കുകള്‍ കത്തുന്നില്ലെന്ന് പ്രതിപക്ഷ ആരോപണത്തെ മേയര്‍ നേരിട്ടത് യുഡിഎഫ് ഭരണകാലത്തെ ചെലവിന്‍റെ റിപ്പോര്‍ട്ട് ആവശ്യപ്പെട്ട്. 2010 മുതല്‍ 2015 വരെയുള്ള കാലഘട്ടത്തില്‍ തെരുവുവിളക്ക് പ്രവര്‍ത്തിപ്പിക്കാന്‍ എത്ര രൂപ ചെലവായി എന്നുള്ള റിപ്പോര്‍ട്ടാണ് അടുത്ത കൗണ്‍സില്‍ യോഗത്തിന് മുന്‍പ് നല്‍കാന്‍ സെക്രട്ടറിയോട് മേയര്‍ എം. അനില്‍കുമാര്‍ ആവശ്യപ്പെട്ടത്. സിഎസ്എംഎല്‍ പദ്ധതിവഴി നഗരസഭയില്‍ സ്ഥാപിച്ച 40,000 തെരുവു വിളക്കുകളില്‍ 5600 ഓളം എണ്ണം കത്തുന്നില്ലെന്നായിരുന്നു പ്രതിപക്ഷം ആക്ഷേപം. എന്നാല്‍ സ്മാര്‍ട്‌സിറ്റി പദ്ധതിവഴി സംസ്ഥാനത്ത് നടപ്പാക്കിയ മികച്ച തെരുവുവിളക്ക് സംവിധാനമാണ് കൊച്ചിയിലുള്ളതെന്നും ഇതുവരെ ഉണ്ടായിരുന്നതിനാല്‍ ലാഭകരത്തിലാണ് ഇപ്പോള്‍ തെരുവുവിളക്കുകള്‍ പ്രവര്‍ത്തിക്കുന്നതെന്നും മേയര്‍ പറഞ്ഞു. ഇക്കാര്യം പ്രതിപക്ഷത്തെ ബോധ്യപ്പെടുത്താനാണ് യുഡിഎഫ് കാലത്തെ തെരുവുവിളക്കുകളുടെ ചെലവ് കണക്കുകൾ കൗണ്‍സിലില്‍ വയ്ക്കാന്‍ മേയര്‍ ആവശ്യപ്പെട്ടത്.

കസവു ചേല ചുറ്റുന്ന ഓണക്കാലം

ഓണക്കോടിയില്ലാതെ മലയാളിക്ക് എന്ത് ഓണാഘോഷം. ഓണനാളില്‍ പുതുവസ്ത്രം ധരിക്കുകയും പ്രിയപ്പെട്ടവര്‍ക്ക് ഓണക്കോടി സമ്മാനിക്കുകയും ചെയ്യുകയെന്നത് പരന്പരാഗതമായുള്ള രീതിയാണ്. തിരുവോണനാളില്‍ പ്രജകളെ കാണാന്‍ മഹാബലി എത്തുമ്പോള്‍ പുതുവസ്ത്രം ധരിച്ച് അണിഞ്ഞൊരുങ്ങി വേണം സ്വീകരിക്കാന്‍ എന്നതാണ് ഓണക്കോടിക്കു പിന്നിലെ വിശ്വാസം. പൂക്കളമൊരുക്കുന്നതുപോലെ തന്നെ ഓണക്കോടി സമ്മാനിക്കലും ഇന്ന് ഓണത്തിന്‍റെ ചടങ്ങായി മാറി. തെക്കന്‍ കേരളത്തില്‍ ഓണത്തിന് ബന്ധുക്കള്‍ പരസ്പരം ഓണക്കോടി സമ്മാനിക്കുന്ന പതിവുണ്ട്. പണ്ടൊക്കെ പഞ്ഞമാസമായ കര്‍ക്കിടകം കഴിഞ്ഞ് പുതുവസ്ത്രം കിട്ടുന്ന കാലം സമൃദ്ധിയുടെ ഓണത്തിനു മാത്രമായിരുന്നു. അതുകൊണ്ടുതന്നെ പഴയ തലമുറ അതിനെ വലിയ പ്രാധാന്യത്തോടെയായിരുന്നു കണ്ടിരുന്നത്. കാലം മാറിയതോടെ‍ ആര്‍ക്കും എപ്പോള്‍ വേണമെങ്കിലും പുതുവസ്ത്രം വാങ്ങാമെന്ന നിലയായി. ഓണനാളുകളില്‍ കസവുടുക്കാനാണ് മലയാളിക്കു പ്രിയം. കസവുസാരികളും മുണ്ടുകളുമെല്ലാം ഏറ്റവും കൂടുതല്‍ വിറ്റഴിക്കപ്പെടുന്നതും ഓണക്കാലത്തുതന്നെയാണ്. കസവുസാരികളില്‍ മ്യൂറല്‍ ഡിസൈനുകളും കഥകളിയും താമരയും മയില്‍പ്പീലിയുമൊക്കെ ചെയ്ത ഹാന്‍ഡ് ഡിസൈന്‍ സാരികളും ആണ് പുത്തൻ ട്രെന്‍ഡ്. കരയും കസവുമൊക്കെയുള്ളവയ്ക്കും ആവശ്യക്കാരുണ്ട്. ദാവണികളിലും വെറൈറ്റി ഡിസൈനുകള്‍ ലഭ്യമാണ്. പുരുഷന്മാര്‍ക്കാണെങ്കില്‍ ഷര്‍ട്ടിന്‍റെ നിറത്തിന് അനുസരിച്ചുള്ള മുണ്ടുകളും വിപണിയിലുണ്ട്. കൊച്ചുകുട്ടികള്‍ക്കായുള്ള കസവുവസ്ത്രങ്ങള്‍ക്കും ആവശ്യക്കാര്‍ ഏറെയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]