വൈക്കം ബ്ലോക്ക് പഞ്ചായത്ത് ഗ്രാമവണ്ടി അഷ്ടമികാലത്ത് ഓടിത്തുടങ്ങിയേക്കും
1464346
Sunday, October 27, 2024 7:07 AM IST
വൈക്കം: ഗ്രാമീണ മേഖലയിലെ ജനങ്ങൾക്ക് കുറഞ്ഞ ചെലവിൽ യാത്രചെയ്യുന്നതിന് വൈക്കം ബ്ലോക്ക് പഞ്ചായത്തും കെഎസ്ആർടിസിയും സംയുക്തമായി ആരംഭിക്കുന്ന ഗ്രാമവണ്ടി സർവീസ് വൈത്തഷ്ടമി ഉത്സവകാലത്ത് സർവീസ് നടത്തിയേക്കും. രാവിലെ വൈക്കം കെഎസ്ആർടിസി ബസ് സ്റ്റേഷനിൽനിന്നു സർവീസ് ആരംഭിച്ച് ബ്ലോക്ക് പഞ്ചായത്ത് നിർദേശിക്കുന്ന റൂട്ടിലൂടെ സഞ്ചരിച്ച് രാത്രി സർവീസ് അവസാനിപ്പിക്കും.
വൈക്കത്തെ തലയാഴം, വെച്ചൂർ, ടിവി പുരം തുടങ്ങിയ പഞ്ചായത്തുകളിലെ ഉൾപ്രദേശങ്ങളിലെ ജനങ്ങൾക്ക് കുറഞ്ഞചെലവിൽ പ്രധാന റോഡിലെത്തി വിവിധ സ്ഥലങ്ങളിലേയ്ക്ക് യാത്ര ചെയ്യുന്നതിന് സഹായിക്കുന്നതിന് ഗ്രാമവണ്ടി സർവീസ് ഉപകാരപ്പെടുമെന്ന് ബ്ലോക്ക് പഞ്ചായത്ത് പ്രസിഡന്റ് കെ.കെ. രഞ്ജിത്ത്, ബ്ലോക്ക് പഞ്ചായത്ത് സെക്രട്ടറി അജിത്ത് എന്നിവർ പറഞ്ഞു.
ശനി, ഞായർ ഒഴിച്ച് ആഴ്ചയിൽ അഞ്ചു ദിവസമാണ് സാധാരണ ഗ്രാമവണ്ടി സർവീസ് നടത്തുന്നത്. അവധി ദിവസങ്ങളിൽ യാത്രക്കാർ കുറവായതിനാൽ സർവീസ് നഷ്ടമാകുന്നത് കണക്കിലെടുത്താണ് സർവീസ് അഞ്ചു ദിവസമായി ചുരുക്കുന്നത്. ബ്ലോക്ക് പഞ്ചായത്ത് ആവശ്യപ്പെട്ടാൽ ഏഴു ദിവസവും സർവീസ് നടത്തും. ഒരു ദിവസം 150 കിലോമീറ്റർ ദൂരമാണ് സർവീസ് നടത്തുന്നത്. ഇതിന് ഇന്ധനചെലവായി 4000 രൂപ ചെലവുവരും.
വൈക്കത്തെ ഉൾപ്രദേശങ്ങളിൽ യാത്രാക്ലേശം രൂക്ഷമായതിനാൽ സർവീസ് ലാഭകരമാകുമെന്നാണ് പ്രതീക്ഷ. നിലവിൽ വൈക്കത്തുനിന്ന് തലയോലപ്പറമ്പ് കോരിക്കൽ, പഴമ്പെട്ടി, എഴുമാംതുരുത്ത് മേഖലയുമായി ബന്ധപ്പെട്ട് നടന്നുവരുന്ന സർവീസ് ലാഭകരമായി തുടരുന്നതും പ്രതീക്ഷ വർധിപ്പിക്കുന്നു. വൈക്കം ബ്ലോക്ക് പഞ്ചായത്ത് സെക്രട്ടറിയും കെഎസ്ആർടിസി എംഡിയുമായി സർവീസ് ആരംഭിക്കാനുള്ള ധാരണാപത്രം ഒപ്പുവയ്ക്കാനുള്ള നടപടിക്രമങ്ങൾ പുരോഗമിക്കുകയാണ്.