വൈക്കം ബ്ലോക്ക് പഞ്ചായത്ത് ഇൻവെസ്റ്റേഴ്സ് മീറ്റ് നവംബർ 12ന്
1464131
Saturday, October 26, 2024 7:24 AM IST
വൈക്കം: വൈക്കത്തിന്റെ സാമ്പത്തിക പിന്നോക്കാവസ്ഥയ്ക്ക് മാറ്റമുണ്ടാക്കാൻ തൊഴിൽ ലഭ്യത വർധിപ്പിക്കാനായി വൈക്കം ബ്ലോക്ക് പഞ്ചായത്തിൻ്റെ നേതൃത്വത്തിൽ ഇൻവെസ്റ്റേഴ്സ് മീറ്റ് സംഘടിപ്പിക്കുന്നു. അഭ്യസ്ത വിദ്യരായ യുവജനങ്ങൾ കൂടുതലായി ഉണ്ടെങ്കിലും വൈക്കത്ത് തൊഴിലില്ലായ്മ സൃഷ്ടിക്കുന്ന പ്രതിസന്ധി രൂക്ഷമായ തിനാലാണ് ബ്ലോക്ക് പഞ്ചായത്ത് ഇൻവെസ്റ്റേഴ്സ് മീറ്റ് സംഘടിപ്പിക്കുന്നതെന്ന് ബ്ലോക്ക് പഞ്ചായത്ത് പ്രസിഡൻ്റ് കെ.കെ. രഞ്ജിത്ത് പറഞ്ഞു.
വൈക്കം നിവാസികളായ നിരവധി ആളുകൾ സ്വദേശത്തും വിദേശത്തും സംരഭകരായിട്ടുണ്ട്. ഇവരുടെ സേവനം നാടിന് പ്രയോജനകരമാക്കി തീർത്ത് തൊഴിലവസരങ്ങൾ സൃഷ്ടിച്ച് സാമൂഹ്യ പുരോഗതി കൈവരിക്കുകയാണ് ഈ പദ്ധതിയിലൂടെ ലക്ഷ്യമിടുന്നത്.
എന്റെ തൊഴിൽ എന്റെ അഭിമാനം എന്ന തദ്ദേശസ്വയംഭരണ വകുപ്പിന്റെ പദ്ധതിയുടെ ഭാഗമായി വ്യവസായ സ്ഥാപനങ്ങൾ ആരംഭിക്കുന്നതിന് തദ്ദേശസ്ഥാപനങ്ങൾ മുൻകൈ എടുക്കണമെന്നുള്ള വ്യവസായി വകുപ്പ് മന്ത്രിയുടെ നിർദ്ദേശാനുസരണമായാണ് നൂതന ആശയങ്ങളുള്ള സംരംഭകരെയടക്കം ചേർത്ത് നിർത്തി ഇൻവെസ്റ്റേഴ്സ് മീറ്റ് നടത്തുന്നത്.
വൈക്കം ബ്ലോക്ക് പഞ്ചായത്തിന്റെ 2024-25 വാർഷിക പദ്ധതിയിൽ ഉൾപ്പെടുത്തി നടപ്പിലാക്കുന്ന ഇൻവെസ്റ്റേഴ്സ് മീറ്റ് നവംബർ 12ന് രാവിലെ 10ന് സഹകരണ വകുപ്പ് മന്ത്രി വി.എൻ. വാസവന് ഉദ്ഘാടനം ചെയ്യും. സി.കെ. ആശ എംഎൽഎ അധ്യക്ഷത വഹിക്കുന്ന സമ്മേളനത്തിൽ ത്രിതലപഞ്ചായത്ത് ജനപ്രതിനിധികൾ, വിവിധ വകുപ്പ് തലവന്മാർ, സംരംഭകർ എന്നിവർ പങ്കെടുക്കും.
അന്ന് വൈകുന്നേരം നടക്കുന്ന സമാപന സമ്മേളനത്തിൻ്റെ ഉദ്ഘാ ടനവും സംരംഭകരെ ആദരിക്കലും വ്യവസായ വകുപ്പ് മന്ത്രി പി. രാജീവ് നിർവഹിക്കും.