നെല്കൃഷിക്കു പുതുജീവനേകാന് രാമപുരത്ത് സംരക്ഷണസമിതി
1464281
Sunday, October 27, 2024 5:33 AM IST
രാമപുരം: നെല്കൃഷി കൂടുതല് പ്രദേശങ്ങളിലേക്കു വ്യാപിപ്പിക്കാന് മുന്കൈയെടുത്ത് രാമപുരം നെല്കൃഷി സംരക്ഷണസമിതി. പ്രദേശത്ത് തരിശായിക്കിടക്കുന്ന പാടശേഖരങ്ങളില് വിത്തു വിതയ്ക്കാനുള്ള തയാറെടുപ്പിലാണ് അംഗങ്ങള്. പഞ്ചായത്തിലെ വെള്ളിലാപ്പിള്ളി പാടശേഖരത്ത് നാല് ഏക്കറോളം തരിശായി കിടന്നിരുന്ന പാടത്ത് നെല്കൃഷി സംരക്ഷണസമിതി അംഗങ്ങളുടെ നേതൃത്വത്തില് നെല്വിത്ത് വിതച്ച് നെല്കൃഷിക്ക് പുതുജീവനേകി.
കാര്യപ്പുറത്ത് സന്തോഷിന്റെ ഉടമസ്ഥതയിലുള്ള സ്ഥലമാണിത്. രാമപുരം കൃഷിഭവന്റെ നിര്ദേശപ്രകാരം കടുത്തുരുത്തി വാലാഞ്ചിറ സീഡ് ഫാമില് വികസിപ്പിച്ചെടുത്ത ജ്യോതി ഇനത്തില്പ്പെട്ട നെല്വിത്താണ് വിതച്ചത്. രാമപുരം പഞ്ചായത്ത് പ്രസിഡന്റ് ലിസമ്മ മത്തച്ചന് വിത ഉദ്ഘാടനം നിർവഹിച്ചു. വൈസ് പ്രസിഡന്റ് സണ്ണി അഗസ്റ്റിന് പൊരുന്നക്കോട്ട് അധ്യക്ഷത വഹിച്ചു. വിളവെടുക്കാന് 115 ദിവസം മൂപ്പുള്ള വിത്താണിത്.
രാമപുരം പഞ്ചായത്തില് 45 ഹെക്ടറോളം പടശേഖരമാണുള്ളത്. ഇതില് 15 ഹെക്ടറില് താഴെ മാത്രമേ നെല്കൃഷി നടക്കുന്നുള്ളൂ. ബാക്കിവരുന്ന എല്ലാ പാടത്തും വരുംനാളില് കൃഷിയിറക്കാന് പഞ്ചായത്തും ബ്ലോക്ക് പഞ്ചായത്തും മുന്കൈയെടുത്ത് നെല്കൃഷി വ്യാപിപ്പിക്കുമെന്ന് ജനപ്രതിനിധികള് പറഞ്ഞു.
യുവജനങ്ങളെ കൃഷിയിലേക്ക് ആകര്ഷിക്കുന്നതിനായി സര്ക്കാര്തലത്തില് രാമപുരം കൃഷിഭവന്റെ കീഴില് പ്രത്യേക ക്ലാസുകള് നടത്തുമെന്ന് അസി. കൃഷി ഓഫീസര് പി.എസ്. ശ്രീജയും കൃഷി അസിസ്റ്റന്റ് പി.സി. രത്നമ്മയും പറഞ്ഞു. ഇപ്പോള് നെല്കൃഷിക്ക് കുമ്മായത്തിന് 50 ശതമാനവും നെല്വിത്തിന് 100 ശതമാനവും സബ്സിഡി നല്കുന്നുണ്ട്.
ഉഴവൂര് ബ്ലോക്ക് പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയര്പേഴ്സണ് സ്മിത അല്ക്സ് തെങ്ങുംപള്ളിക്കുന്നേല്, കെ.കെ. ശാന്താറാം, മനോജ് ചീങ്കല്ലേല്, റോബി ഊടുപുഴ, വിജയകുമാര് മണ്ഡപത്തില്, ജോഷി കുമ്പളത്ത്, ആല്ബിന് ഇടമനശേരില്, അഡ്വ. ബിജു പുന്നത്താനം, അജി സെബാസ്റ്റ്യൻ, സണ്ണി കാര്യപ്പുറം, സന്തോഷ് കിഴക്കേക്കര, വിന്സെന്റ് മാടവന, ജോയി കോലത്ത്, ബേബി തട്ടാറയില്, രാജു മാനുവല്, സജി കട്ടക്കയം തുടങ്ങിയവർ നേതൃത്വം നൽകി.