വിദ്യാർഥികൾ വെളിവും സഹാനുഭൂതിയും ആർജിക്കണം ബിഷപ് മാർ സെബാസ്റ്റ്യൻ എടയന്ത്രത്ത്
1464130
Saturday, October 26, 2024 7:24 AM IST
വൈക്കം: വിദ്യാലയങ്ങളിൽ നിന്ന് വിദ്യാർഥികൾ അറിവ് മാത്രമല്ല വെളിവും സഹാനുഭൂതിയും ആർജിക്കണമെന്ന് മാണ്ഡ്യ രൂപത ബിഷപ് മാർ സെബാസ്റ്റ്യൻ എടയന്ത്രത്ത്. വൈക്കം സെന്റ് ലിറ്റിൽ തെരേസാസ് ഗേൾസ് ഹയർ സെക്കൻഡറി സ്കൂളിന്റെ 75-ാം വാർഷികാഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു സ്കൂളിലെ പൂർവ വിദ്യാർഥി കൂടിയായ ബിഷപ്പ്. മറ്റുള്ളവരോടു നമുക്ക് അനുകമ്പ ഉണ്ടാകണം.
നമ്മുടെ മോഹങ്ങളുടെ പേരിൽ മറ്റുള്ളവരുടെ ആവശ്യങ്ങളും സൗകര്യങ്ങളും നഷ്ടപ്പെടുത്തരുതെന്നും ബിഷപ്പ്മാർ സെബാസ്റ്റ്യൻ എടയന്ത്രത്ത് കുട്ടിച്ചേർത്തു. സ്കൂൾ മാനേജർ റവ.ഡോ. ഫാ.ബർക്കുമൻസ് കൊടയ്ക്കൽ അധ്യക്ഷത വഹിച്ചു.
നഗരസഭ വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ആർ. സന്തോഷ്, സഹവികാരി ഫാ. ജെഫിൻ മാവേലി, സ്കൂൾ പ്രിൻസിപ്പൽ സിൽവി തോമസ്, ഹെഡ്മിസ്ട്രസ് മിനി അഗസ്റ്റിൻ, കൺവീനർ മാത്യു കൂടല്ലി, പിടിഎ പ്രസിഡന്റ് എൻ.സി. തോമസ്, റവ.ഡോ. ജ്യോതിസ് പോത്താറ, കൈക്കാരൻമാരായ മാത്യു കോടാലിച്ചിറ, മോനിച്ചൻ പെരുംചേരിൽ, സോണി പൂതവേലി, സജി കുളങ്ങര, രമാകാന്ദൻ തുടങ്ങിയവർ പ്രസംഗിച്ചു.
സമ്മേളനത്തിനു മുന്നോടിയായി വൈക്കം വെൽഫെയർ സെന്ററിൽ നിന്നും നൂറുകണക്കിന് വിദ്യാർഥികൾ അണിചേർന്ന വർണാഭമായ വിളംബര ഘോഷയാത്രയും നടന്നു.