സ്വകാര്യ ബസിൽ ഇടിക്കാതിരിക്കാൻ ടോറസ് വെട്ടിച്ചു മാറ്റി; വൻ അപകടമൊഴിവായി
1464127
Saturday, October 26, 2024 7:14 AM IST
വൈക്കം:വളവിൽ സൈക്കിൾ യാത്രക്കാരനെ മറികടന്ന് പാഞ്ഞെത്തിയ സ്വകാര്യ ബസിൽ ഇടിക്കാതിരിക്കാൻ ടോറസ് വെട്ടിച്ചു മാറ്റിയതിനാൽ വൻ ദുരന്തമൊഴിവായി. വൈക്കം തോട്ടകം ഷാപ്പിനു വടക്കുഭാഗത്തെ വളവിനുസമീപം വ്യാഴാഴ്ച രാത്രി 7.30ഓടെ ആയിരുന്നു സംഭവം.
ടോറസ് ഡ്രൈവറുടെ ജാഗ്രത മൂലമാണ് വൻ അപകടമൊഴിവായത്. ടോറസ് ചാഞ്ഞ ഭാഗത്ത് റോഡരികിലെ ഓടയും ഇടത്തോടുമുണ്ടായിരുന്നു. 1500 അടി മെറ്റലുമായി ദേശീയപാത നിർമ്മാണ സ്ഥലത്തേക്കു പോകുകയായിരുന്നു ടോറസ്. വെച്ചൂരിൽ നിന്ന് നിരവധി യാത്രക്കാരുമായി ബസ് വൈക്കത്തേക്ക് വരികയായിരുന്നു.
ടോറസ് വെട്ടിച്ചു മാറ്റിയപ്പോൾ റോഡിലേയ്ക്ക് മറിയുമെന്ന നിലയിൽ ചാഞ്ഞു. ക്രയിനും ജെ സി ബി യുമെത്തിച്ച് ടോറസ് ഏറെ നേരം പണിപ്പെട്ടാണ് റോഡിലേയ്ക്ക് കയറ്റിയത്.