പോലീസിനു നേരേ പെപ്പർ സ്പ്രേ ആക്രമണം: മൂന്നു പേർ പിടിയിൽ
1464121
Saturday, October 26, 2024 7:14 AM IST
കോട്ടയം: പോലീസ് ഉദ്യോഗസ്ഥരെ ആക്രമിച്ച കേസിൽ മൂന്ന് പേരെ പോലീസ് അറസ്റ്റ് ചെയ്തു. മുട്ടമ്പലം കാച്ചുവേലിക്കുന്ന് പരിയാത്തുശേരിൽ ഡോൺ മാത്യു (25), പുതുപ്പള്ളി കൈതേപ്പാലം ആഞ്ഞാലിക്കടുപ്പിൽ ഷെബിൻ സി. വർഗീസ് (29), മുട്ടമ്പലം മടുക്കാനി വീട്ടിൽ സിബി തോമസ് (29) എന്നിവരെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്.
കഴിഞ്ഞ ദിവസം വൈകുന്നേരം 4.30 ഓടുകൂടി പുതുപ്പള്ളി കൈതേപ്പാലം ഭാഗത്ത് പോലീസ് നടത്തിയ വാഹന പെട്രോളിംഗിനിടയിൽ നിരവധി ക്രിമിനൽക്കേസുകളിൽ പ്രതിയായ ഇവരെ സംശയാസ്പദമായ രീതിയിൽ കണ്ടതിനെത്തുടർന്ന് പോലീസ് ഉദ്യോഗസ്ഥർ വാഹനം നിർത്താൻ ആവശ്യപ്പെട്ടു. തുടർന്നു കാര്യങ്ങൾ തിരക്കിയതിൽ വൈരാഗ്യം തോന്നിയ ഇവർ സംഘം ചേർന്ന് പോലീസ് ഉദ്യോഗസ്ഥരെ ചീത്തവിളിക്കുകയും മർദിക്കുകയും കൈയിൽ കരുതിയിരുന്ന പെപ്പർസ്പ്രേ കൊണ്ട് ആക്രമിക്കുകയുമായിരുന്നു.
തുടർന്ന് കൂടുതൽ പോലീസ് സ്ഥലത്തെത്തി ഇവരെ സാഹസികമായി കീഴ്പ്പെടുത്തി അറസ്റ്റ് ചെയ്യുകയായിരുന്നു. പോലീസിന്റെ പരിശോധനയിൽ ഡോൺ മാത്യുവിന്റെ കൈയിൽനിന്നു രണ്ട് ഗ്രാം കഞ്ചാവ് കണ്ടെടുക്കുകയും ചെയ്തു.
ഡോൺ മാത്യുവിന് കോട്ടയം ഈസ്റ്റ്, ഗാന്ധിനഗർ സ്റ്റേഷനുകളിലും, ഷെബിന് കോട്ടയം ഈസ്റ്റ് സ്റ്റേഷനിലും ക്രിമിനൽ കേസ് നിലവിലുണ്ട്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. മറ്റു പ്രതികൾക്കായി തെരച്ചിൽ ശക്തമാക്കി.