കന്നുകാലി സെൻസസിന് ജില്ലയിൽ തുടക്കം
1464124
Saturday, October 26, 2024 7:14 AM IST
കോട്ടയം: കന്നുകാലി സെൻസസിന്റെ ജില്ലാതല വിവരശേഖരണത്തിനു തുടക്കം. ജില്ലയിൽ ആകെയുള്ള കന്നുകാലികൾ, പക്ഷികൾ, വളർത്തുമൃഗങ്ങൾ എന്നിവയുടെ ഇനം, പ്രായം, ലിംഗം എന്നിവയുടെ അടിസ്ഥാനത്തിലുള്ള വിശദവിവരങ്ങളും മൃഗസംരക്ഷണ മേഖലയിലെ കർഷകർ, വനിതാ സംരംഭകർ, ഗാർഹിക-ഗാർഹികേതര സംരംഭങ്ങൾ, സ്ഥാപനങ്ങൾ എന്നിവയുടെ വിശദവിവരങ്ങളും ശേഖരിക്കും.
കുടുംബശ്രീ മിഷനിൽനിന്ന് മൃഗസംരക്ഷണ വകുപ്പ് മുഖേന നിയോഗിച്ച എ ഹെൽപ്, പശു സഖി പ്രവർത്തകരാണ് ജില്ലയിലെ 5,80,000 വീടുകളും സ്ഥാപനങ്ങളും സന്ദർശിച്ച് വിവരശേഖരണം നടത്തുക. നാലുമാസം കൊണ്ട് സെൻസസ് പൂർത്തീകരിക്കുകയാണ് ലക്ഷ്യം. 21-ാമത് കന്നുകാലി സെൻസസിന്റെ ജില്ലാതല വിവരശേഖരണം ജില്ലാ പഞ്ചായത്ത് പ്രസിഡന്റ് കെ.വി. ബിന്ദുവിന്റെ വസതിയിൽനിന്ന് വിവരങ്ങൾ ശേഖരിച്ച് ഉദ്ഘാടനം ചെയ്തു.
കുമരകം പഞ്ചായത്ത് വൈസ് പ്രസിഡന്റ് വി.കെ. ജോഷി, ജില്ലാ മൃഗസംരക്ഷണ ഓഫീസർ ഡോ. സജീവ് കുമാർ, ഡെപ്യൂട്ടി ഡയറക്ടർ ഡോ. മാത്യു ഫിലിപ്, കുടുംബശ്രീ ജില്ലാ മിഷൻ കോ-ഓർഡിനേറ്റർ അഭിലാഷ് കെ. ദിവാകർ, ഡോ. സായി പ്രസാദ്, മാർട്ടിൻ, ഉഷ സലി, സി.എസ്. ശ്രുതി എന്നിവർ പങ്കെടുത്തു.
വിവരശേഖരണം മൊബൈൽ ആപ്ലിക്കേഷനിലൂടെ
സെൻസസിനായി പ്രത്യേക മൊബൈൽ ആപ്ലിക്കേഷൻ തയാറാക്കിയിട്ടുണ്ട്. വീടുകൾ തോറും കയറിയിറങ്ങിയാണ് വിവരശേഖരണം. സൂപ്പർവൈസർമാർ പ്രാഥമിക വിലയിരുത്തലിനു ശേഷം ഇവ ജില്ലാതലത്തിൽ സമർപ്പിക്കും. തുടർന്ന് അത് സംസ്ഥാനതലത്തിലേക്കും ദേശീയ തലത്തിലേക്കും നൽകും.
കുടുംബശ്രീ മുഖേന തെരഞ്ഞെടുത്തവരിൽ പരിശീലനം വിജയകരമായി പൂർത്തീകരിച്ചവരാണ് പശു സഖിമാർ. പശു സഖിമാർക്ക് മൃഗസംരക്ഷണ വകുപ്പ് പരിശീലനകേന്ദ്രം വഴി പ്രത്യേക പരിശീലനം നൽകി എ ഹെൽപ് പരിശീലകരാക്കി മാറ്റിയിട്ടുണ്ട്. 182 പശു സഖിമാരാണ് ജില്ലയിലുള്ളത്.