പ്ലാറ്റിനം ജൂബിലി ആഘോഷം : പാലാ സെന്റ് തോമസ് കോളജ് കേരള സൈക്കിള് പ്രയാണം നടത്തും
1464276
Sunday, October 27, 2024 5:33 AM IST
പാലാ: പാലാ സെന്റ് തോമസ് കോളജ് ഓട്ടോണമസിന്റെ പ്ലാറ്റിനം ജൂബിലി ആഘോഷത്തോടനുബന്ധിച്ചുള്ള ഫ്ളാഗ്ഷിപ് പ്രോഗ്രാമുകളിലൊന്നായ നേച്ചര്ഫിറ്റ് കേരള സൈക്കിള് പ്രയാണത്തിനുള്ള പരിശീലനപരിപാടികള് കോളജ് പ്രിന്സിപ്പല് ഡോ. സിബി ജയിംസിന്റെ നേതൃത്വത്തില് ആരംഭിച്ചു. ഡിസംബര് ആദ്യവാരം പ്രയാണം ആരംഭിക്കും. 30 വിദ്യാര്ഥികള് ഇപ്പോള് പരിശീലനം നടത്തുന്നുണ്ട്.
ശാരീരിക-മാനസിക ആരോഗ്യമുള്ള തലമുറയെ വാര്ത്തെടുക്കേണ്ടതിന്റെ ആവശ്യകത വിളിച്ചറിയിക്കുന്നതോടൊപ്പം പ്രകൃതി സൗഹൃദ ഗതാഗത മാര്ഗമെന്ന നിലയില് സൈക്ലിംഗിനെ പ്രോത്സാഹിപ്പിക്കുക എന്നതും ഈ ഉദ്യമത്തിന്റെ ഉദ്ദേശ്യലക്ഷ്യങ്ങളാണ്. കേരളത്തിലെ 14 ജില്ലകളിലൂടെയുംഅധ്യാപകരുടെയും വിദ്യാര്ഥികളുടെയും നേതൃത്വത്തിലുള്ള ഈ സൈക്കിള് റാലി കടന്നുപോകും.
സൈക്കിള് റാലിയില് പങ്കെടുക്കുന്ന അധ്യാപകര്ക്കും വിദ്യാര്ഥികള്ക്കും പരിശീലനത്തിനുള്ള ജേഴ്സി കോളജ് ബര്സാര് ഫാ. മാത്യു ആലപ്പാട്ടുമേടയില് വിതരണം ചെയ്തു. വൈസ് പ്രിന്സിപ്പല് ഡോ. സാല്വിന് കെ. തോമസ്, ജൂബിലി കമ്മിറ്റി സെക്രട്ടറി ആശിഷ് ജോസഫ്, വിവിധ ഡിപ്പാര്ട്ടുമെന്റുകളിലെ അധ്യാപകര് എന്നിവര് വിദ്യാര്ഥികളോടൊപ്പം സൈക്കിള്പ്രയാണ പരിശീലനത്തില് പങ്കെടുത്തു.