സാമൂഹ്യ നീതി സംഗമം സംഘടിപ്പിക്കും
1464136
Saturday, October 26, 2024 7:24 AM IST
കോട്ടയം: പട്ടികജാതി-പട്ടിക വര്ഗ വിഭാഗങ്ങള്ക്ക് സംവരണത്തില് വരുമാന പരിധിയും ഉപസംവരണവും നടപ്പിലാക്കാന് പാടില്ലെന്ന് ആവശ്യപ്പെട്ടു അന്പത് ദളിത് സമുദായ സംഘടനകള് ചേര്ന്ന് രൂപീകരിച്ച സംവരണ സംരക്ഷണ സമിതി സംസ്ഥാന കമ്മിറ്റിയുടെ നേതൃത്വത്തില് നവംബര് മൂന്നിന് തൃശൂര് തേക്കിന്കാട് മൈതാനത്ത് സാമൂഹ്യ നീതി സംഗമവും, സംവരണ സംരക്ഷണ റാലിയും സംഘടിപ്പിക്കും.
സുപ്രീം കോടതി വിധിക്കെതിരെ റിവ്യു പെറ്റീഷനടക്കമുള്ള നിയമപോരാട്ടവും, സംസ്ഥാന വ്യാപകമായി ജനകീയ പ്രക്ഷോഭങ്ങളും സംഘടിപ്പിക്കുന്നതിനു മുന്നോടിയായാണ് സാമൂഹ്യ നീതി സംഗമം. ഉച്ചകഴിഞ്ഞ് മൂന്നിനു നടക്കുന്ന സമരപ്രഖ്യാപന സമ്മേളനം കെപിഎംഎസ് ജനറല് സെക്രട്ടറി കെ.എ. തങ്കപ്പന് ഉദ്ഘാടനം ചെയ്യും.
സംവരണ സംരക്ഷണ സമിതി വൈസ് ചെയര്മാനും കേരള വേലന് ഏകോപന സമിതി സംസ്ഥാന പ്രസിഡന്റുമായ രാജീവ് നെല്ലിക്കുന്നേല് അധ്യക്ഷത വഹിക്കും. സംവരണ സംരക്ഷണ സമിതിയുടെ ചെയര്മാന് സണ്ണി എം. കപിക്കാട് സമരപ്രഖ്യാപനവും നടത്തും.
നാഷണല് ലോ അക്കാദമിയുടെ മുന് ഡയറക്ടര് ഡോ. മോഹന് ഗോപാല് മുഖ്യാഥിതിയായി പങ്കെടുക്കും. സംവരണ സംരക്ഷണ സമിതി ജനറല് കണ്വീനര് ടി.ആര്. ഇന്ദ്രജിത്, രക്ഷാധികാരി കെ.എ. തങ്കപ്പന്, ട്രഷറര് കെ. വത്സകുമാരി, വി.കെ. വിമലന്, കെ. ദേവകുമാര്, കണ്വീനര് ബിജോയ് ഡേവിഡ് എന്നിവര് പ്രസംഗിക്കും.