റവന്യു ജില്ല സ്കൂള് കായികമേള : സെന്റ് തോമസിന്റെ ചിറകിലേറി പാലായ്ക്ക് കിരീടം
1464053
Saturday, October 26, 2024 5:46 AM IST
സ്കൂള് തലത്തില് പൂഞ്ഞാര് എസ്എംവി
പാലാ: സെന്റ് തോമസിന്റെ ചിറകിലേറി പാലാ ഉപജില്ല റവന്യു ജില്ല സ്കൂള് കായികമേളയില് ഓവറോള് കിരീടം നേടി. 27 സ്വര്ണം,26 വെള്ളി, 14 വെങ്കലം എന്നിങ്ങനെ 259 പോയിന്റ് നേടിയാണ് പാലാ വിദ്യാഭ്യാസ ഉപജില്ല ചാമ്പ്യന്മാരായത്. 21 വര്ഷത്തിന് ശേഷം കിരീടം ചൂടാന് പാലായെ തുണച്ചത് പാലാ സെന്റ് തോമസിലെ കായികപ്രതിഭകള്. 253.5 പോയിന്റുമായി ഈരാറ്റുപേട്ട ഉപജില്ലയാണ് റണ്ണറപ്പ്. 146 പോയിന്റുമായി കാഞ്ഞിരപ്പള്ളി ഉപജില്ലയാണ് മൂന്നാമത്.
പാലാ സബ്ജില്ല നേടിയ 259 പോയിന്റില് 14 സ്വര്ണവും 13 വെള്ളിയും 7 വെങ്കലവും ഉള്പ്പെടെ 116 പോയിന്റ് സെന്റ് തോമസ് സ്കൂളിന്റെ നേട്ടമാണ്. സ്കൂളുകളുടെ ഓവറോള് പോയിന്റ് നിലയില് ഫസ്റ്റ് റണ്ണര് അപ്പും സെന്റ് തോമസാണ്. സ്പോര്ട്സ് സ്കൂളുകള്ക്ക് മാത്രം സ്വന്തമാക്കാന് കഴിയുന്ന സ്വപ്നനേട്ടമാണ് സെന്റ് തോമസ് സ്വന്തമാക്കിയത്.
സ്കൂളിലെ കായികാധ്യാപകന് ഡോ. ബോബന് ടി. ഫ്രാന്സിസിന്റെയും മുഖ്യ പരിശീലകന് ഡോ. തങ്കച്ചന് മാത്യുവിന്റെയും നേതൃത്വത്തില് നടക്കുന്ന ചിട്ടയായ പരിശീലനവും കുട്ടികളുടെ കഠിനാധ്വാനവുമാണ് സെന്റ് തോമസിന്റെ വിജയത്തിനു പിന്നില്.
മാനേജര് റവ. ഡോ. ജോസ് കാക്കല്ലില്, പ്രിന്സിപ്പല് റെജിമോന് കെ.മാത്യു, ഹെഡ്മാസ്റ്റര് ഫാ. റെജി സ്കറിയ, പാലാ കോര്പറേറ്റ് സെക്രട്ടറി ഫാ. ജോര്ജ് പുല്ലുകാലായില് എന്നിവര് വിജയികളെ അനുമോദിച്ചു.
അല്ഫോന്സാ അത്ലറ്റിക് അക്കാദമിക്കും അഭിമാനനിമിഷം
പാലാ: ജില്ലാ കായികമേളയില് പാലാ വിദ്യാഭ്യാസ ജില്ല 21 വര്ഷത്തിനിടയില് ആദ്യമായി 259 പോയിന്റുമായി ഓവറോള് ചാമ്പ്യന്മാരായപ്പോള് കൂടുതല് പോയിന്റും കരസ്ഥമാക്കിയത് പാലാ അല്ഫോന്സ അത്ലറ്റിക് അക്കാദമിയില് പരിശീലനം നേടുന്ന പാലാ സെന്റ് തോമസിലെയും പാലാ സെന്റ് മേരീസിലെയും കായിക താരങ്ങളാണ്.
259 പോയിന്റുമായി പാലാ സബ്ജില്ല ഓവറോള് ജേതാക്കളായപ്പോള് 200 ഓളം പോയിന്റും അക്കാദമിയില് പരിശീലനം നേടുന്ന കായിക താരങ്ങളാണ് നേടിയത്. ദീര്ഘദൂര, മധ്യദൂര ഓട്ടത്തിലും ത്രോ ഇനങ്ങളിലും മികച്ച പ്രകടനമാണ് കുട്ടികള് കാഴ്ചവച്ചത്. ഡോ. തങ്കച്ചന് മാത്യുവിന്റെ നേതൃത്വത്തിലാണ് പരിശീലനം.
പൂഞ്ഞാര് എസ്എംവി
പാലാ: 185.5 പോയിന്റുമായി പൂഞ്ഞാര് എസ്എംവി ഹയര്സെക്കന്ഡറി സ്കൂള്, സ്കൂള് തലത്തില് ചാമ്പ്യന്മാരായി. 116 പോയിന്റ് നേടിയ പാലാ സെന്റ് തോമസ് ഹയര്സെക്കന്ഡറി സ്കൂള് രണ്ടാം സ്ഥാനം കരസ്ഥമാക്കി.
സ്കൂള് തലത്തിലും പാലായിലെ സ്കൂളുകള് പൂഞ്ഞാര് എസ്എംവിക്ക് ശക്തമായ വെല്ലുവിളിയാണ് ഉയര്ത്തിയത്. 39 പോയിന്റ് നേടിയ പാലാ സെന്റ് മേരീസ് ഗേള്സ് ഹയര്സെക്കന്ഡറി സ്കൂളാണ് മൂന്നാമത്.
സമാപന സമ്മേളനത്തില് മുനിസിപ്പല് ചെയര്മാന് ഷാജു വി. തുരുത്തന് വിജയികള്ക്ക് സമ്മാനദാനം നിര്വഹിച്ചു.