ഓള്‍ ഇന്ത്യ ഗിരിദീപം ട്രോഫി ടൂര്‍ണമെന്‍റുകള്‍ക്ക് ഇന്നു തുടക്കം
1463888
Friday, October 25, 2024 6:54 AM IST
കോട്ടയം: ഓള്‍ ഇന്ത്യ ഗിരിദീപം ട്രോഫി ടൂര്‍ണമെന്‍റുകള്‍ക്ക് ഇന്നു തുടക്കം. 31-ാമത് ഓള്‍ ഇന്ത്യ ഗിരിദീപം ട്രോഫി ബാസ്‌ക്കറ്റ്‌ബോള്‍, 16-ാമത് ഗിരിദീപം ട്രോഫി വോളിബോള്‍, 15-ാമത് ഗിരിദീപം ജൂണിയര്‍ ബാസ്കറ്റ്ബോള് ടൂര്‍ണമെന്‍റുകള്‍ 25 മുതല്‍ 28 വരെ ഗിരിദീപം ഫ്ലഡ്‌ലിറ്റ് ഇന്‍ഡോര്‍ സ്റ്റേഡിയത്തില്‍ നടക്കും.
ഇന്നും നാളെയും ബാസ്കറ്റ്ബോള് ലീഗ് മത്സരങ്ങളും 27നു രാവിലെ ക്വാര്‍ട്ടര്‍ ഫൈനല്‍ മത്സരങ്ങളും വൈകുന്നേരം സെമി ഫൈനല്‍ മത്സരങ്ങളും 28നു രാവിലെ ഫൈനല്‍ മത്സരങ്ങളും നടക്കും. ഇന്നും നാളെയും വോളിബോള്‍ ആദ്യ റൗണ്ട് മത്സരങ്ങളും 27നു രാവിലെയും വൈകുന്നേരവും സെമിഫൈനല്‍ മത്സരവും 28നു രാവിലെ ഫൈനല്‍ മത്സരവും നടക്കും.
നാല് ദിവസങ്ങളിലായി ഗിരിദീപം കാമ്പസിലെ വിവിധ കോര്‍ട്ടുകളില്‍ 47ല്‍പ്പരം ബാസ്കറ്റ്ബോള് മത്സരങ്ങള്‍ വിവിധ വിഭാഗങ്ങളില്‍ (ജനറല്‍ സ്‌കൂള്‍, ആണ്‍/പെണ്‍, ജൂണിയര്‍ ആണ്‍കുട്ടികള്‍) നടക്കും. സംസ്ഥാനത്തുനിന്നും പുറത്തുനിന്നുമുള്ള 32 ടീമുകള്‍ ബാസ്കറ്റ്ബോള് വിഭാഗത്തിലും എട്ട് സ്‌കൂള്‍ വോളിബോള്‍ ടീമുകള്‍ പങ്കെടുക്കുന്ന 17-ാമത് വോളിബോള്‍ ടൂര്‍ണമെന്‍റിനും ഗിരിദീപം കാമ്പസ് സജ്ജമായി.
വിവിധ വിഭാഗങ്ങളിലായി 47 ലീഗ് കം നോക്കൗണ്ട് മത്സരങ്ങള്‍ ബാസ്‌കറ്റ്ബോളിലും വോളിബോളില്‍ നോക്കൗണ്ട് അടിസ്ഥാനത്തില്‍ ഏഴ് മത്സരങ്ങളുമാണ് ഇന്നു രാവിലെ മുതല്‍ 28 രാവിലെ വരെ രാവും പകലുമായി ഗിരിദീപം കാമ്പസില്‍ നടക്കുക.
ഇന്നു രാവിലെ ഒന്പതിന് ബഥനി സന്യാസ സമൂഹങ്ങളുടെ സുപ്പീരിയര്‍ ജനറല്‍ റവ.ഡോ. ഗീവര്‍ഗീസ് കുറ്റിയിലില്‍ അധ്യക്ഷതവഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്യും. ഗിരിദീപം സ്ഥാപനങ്ങളുടെ ഡയറക്ടര്‍ ഫാ. മാത്യു ഏബ്രഹാം മോടിയില്‍ പതാക ഉയര്‍ത്തും. അന്താരാഷ്‌ട്ര വോളിബോള്‍ താരം ഷോണ്‍ ടി. ജോണ്‍ മുഖ്യപ്രഭാഷണവും, ദേശീയ ബാസ്‌ക്കറ്റ്‌ബോള്‍ താരവും ഗിരിദീപം പൂര്‍വ വിദ്യാര്‍ഥിനിയുമായ സൂസന്‍ ഫ്‌ലോറന്റീന പ്രസംഗിക്കും. മന്ത്രി വി.എന്‍. വാസവന് മുഖ്യാതിഥിയായെത്തും.
ഉദ്ഘാടനസമ്മേളനത്തിനു മുന്നോടിയായി കായിക താരങ്ങള്‍ പങ്കെടുക്കുന്ന പ്രൗഢഗംഭീരമായ മാര്‍ച്ച് പാസ്റ്റും ഉദ്ഘാടനത്തിനുശേഷം ഗിരിദീപം സ്‌കൂളുകളിലെ കുട്ടികളുടെ കലാവിരുന്ന് ഉണ്ടായിരിക്കും.
28നു രാവിലെ 11നു നടക്കുന്ന സമാപന സമ്മേളനത്തില്‍ ചാണ്ടി ഉമ്മന്‍ എംഎല്‍എ മുഖ്യാതിഥിയായിരിക്കും. ബഥനി നവജ്യോതി പ്രൊവിന്സന്റെ പ്രൊവിന്ഷ്യല് സുപ്പീരിയര്‍ റവ.ഡോ. ജോര്‍ജ് ജോസഫ് അയ്യനേത്ത് അധ്യക്ഷത വഹിക്കും.