ചങ്ങനാശേരി അതിരൂപത ബൈബിള്‍ കലോത്സവം നാളെ
1463896
Friday, October 25, 2024 7:04 AM IST
ചങ്ങനാശേരി: അതിരൂപത മതബോധന കേന്ദ്രമായ സന്ദേശനിലയം നടത്തുന്ന ബൈബിള്‍ കലോത്സവം നാളെ എസ്ബി കോളജിലെ മാര്‍ ജയിംസ് കാളാശേരി നഗറില്‍ നടക്കും. സണ്‍ഡേസ്‌കൂള്‍, ചെറുപുഷ്പ മിഷന്‍ ലീഗ് കുട്ടികളാണ് കലാമത്സരങ്ങളില്‍ പങ്കെടുക്കുന്നത്. രാവിലെ ഒമ്പതിന് മത്സരങ്ങള്‍ ആരംഭിക്കും.
ചെറുപുഷ്പ മിഷന്‍ലീഗ് സ്ഥാപക പിതാവായ മാര്‍ ജയിംസ് കാളാശേരിയുടെ 75-ാം ചരമവാര്‍ഷിക ദിനത്തിന്‍റെ അനുസ്മരണാര്‍ഥമാണ് വേദിക്ക് ഈ പേരു നല്കിയിരിക്കുന്നത്.
പത്തു സ്റ്റേജുകളിലായി മത്സരങ്ങള്‍ നടത്തപ്പെടും. അതിരൂപതയിലെ 18 ഫൊറോനകളില്‍നിന്ന് ആയിരത്തിലധികം കുട്ടികള്‍ മത്സരങ്ങളില്‍ പങ്കെടുക്കും.അതിരൂപതാ തലത്തിലെ മൂന്നാം ഘട്ട മത്സരങ്ങളാണ് നാളെ നടത്തുന്നത്.
രചനാ മത്സരങ്ങളും ബൈബിള്‍ ക്വിസ് മത്സരങ്ങളും നേരത്തേ പൂര്‍ത്തിയായിരുന്നു. മത്സര വിജയികള്‍ക്ക് നാളെ വൈകുന്നേരം നടക്കുന്ന സമാപന സമ്മേളനത്തില്‍ സമ്മാനങ്ങളും സര്‍ട്ടിഫിക്കറ്റുകളും നല്കും.