ഹോസ്റ്റലുകളിലും കാന്റീനുകളിലും ഭക്ഷ്യസുരക്ഷാ പരിശോധന : എട്ടു സ്ഥാപനങ്ങള് അടയ്ക്കാന് നോട്ടീസ്
1463884
Friday, October 25, 2024 6:54 AM IST
കോട്ടയം: ഹോസ്റ്റലുകളിലും കാന്റീനുകളിലും സുരക്ഷിത ഭക്ഷണം എന്ന ലക്ഷ്യത്തോടെയുള്ള പ്രത്യേക ഡ്രൈവിന്റെ ഭാഗമായി ഭക്ഷ്യസുരക്ഷാവകുപ്പിന്റെ നേതൃത്വത്തില് വിദ്യാഭ്യാസ സ്ഥാപനങ്ങളോടനുബന്ധിച്ച് പ്രവര്ത്തിക്കുന്ന ഹോസ്റ്റലുകളിലും കാന്റീനുകളിലും പരിശോധന നടത്തി.
107 സ്ഥാപനങ്ങളില് നടത്തിയ പരിശോധനയില് എട്ടു സ്ഥാപനങ്ങള് അടച്ചുപൂട്ടാന് നോട്ടീസ് നല്കി. 25 സ്ഥാപനങ്ങള്ക്ക് പിഴ ഈടാക്കാനുള്ള നോട്ടീസും 10 സ്ഥാപനങ്ങള്ക്ക് അപാകതകള് പരിഹരിക്കാനുള്ള നോട്ടീസും നല്കി.
ഭക്ഷ്യസുരക്ഷാ നിയമത്തില് നിര്ദേശിച്ചിട്ടുള്ള മാനദണ്ഡങ്ങള് പാലിക്കുന്നുണ്ടോ എന്നു കണ്ടെത്താനായിരുന്നു പരിശോധന. ഭക്ഷ്യസുരക്ഷ ലൈസന്സ്/രജിസ്ട്രേഷന് ഇല്ലാതെയും ഭക്ഷ്യസുരക്ഷാ മാനദണ്ഡങ്ങള് പാലിക്കാതെയും കാന്റീനുകള്/മെസ് എന്നിവ പ്രവര്ത്തിക്കാന് പാടില്ലെന്ന് ജില്ല ഭക്ഷ്യസുരക്ഷ അസി. കമ്മീഷണര് എ.എ. അനസ് പറഞ്ഞു.
പരിശോധനയ്ക്ക് ഭക്ഷ്യസുരക്ഷ ഓഫീസര്മാരായ നിമ്മി അഗസ്റ്റിന്, ഡോ. തെരേസ്ലിന് ലൂയിസ്, നീതു രവികുമാര്, നവീന് ജെയിംസ്, ഡോ. അക്ഷയ വിജയന്, ജി.എസ്. സന്തോഷ് കുമാര് എന്നിവര് നേതൃത്വം നല്കി.