റേഡിയോ 90 ക്ലബ് - ദീപിക ബാലസഖ്യം ലീഡേഴ്സ് ട്രെയിനിംഗ് പ്രോഗ്രാം
1463827
Friday, October 25, 2024 5:33 AM IST
കാഞ്ഞിരപ്പള്ളി: റേഡിയോ 90 ക്ലബ്ബും ദീപിക ബാലസഖ്യവും സംയുക്തമായി സംഘടിപ്പിക്കുന്ന ലീഡേഴ്സ് ട്രെയിനിംഗ് പ്രോഗ്രാം കാഞ്ഞിരപ്പള്ളി അമൽജ്യോതി എൻജിനിയറിംഗ് കോളജിൽ 31നു രാവിലെ 10ന് നടക്കും.
ജില്ലാ കളക്ടർ ജോൺ വി. സാമുവൽ ട്രെയിനിംഗ് പ്രോഗ്രാം ഉദ്ഘാടനം ചെയ്യും. രാഷ്ട്രദീപിക ഡയറക്ടറും കാഞ്ഞിരപ്പള്ളി രൂപത വികാരി ജനറാളുമായ ഫാ. ബോബി അലക്സ് മണ്ണംപ്ലാക്കൽ അധ്യക്ഷത വഹിക്കും. റേഡിയോ 90 എഫ്എം സ്റ്റേഷൻ ഡയറക്ടർ ഫാ. സിജു ജോൺ പു ല്ലംപ്ലായിൽ സന്ദേശം നൽകും.
മാധ്യമ പ്രവർത്തക മാതു സജി, അമൽജ്യോതി കോളജ് പ്രിൻസിപ്പൽ ഡോ. ലില്ലിക്കുട്ടി ജേക്കബ്, റേഡിയോ 90 എഫ്എം പ്രോഗ്രാം ഡയറക്ടർ ഫാ. ജോമി കുമ്പുക്കാട്ട്, ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ, സ്വരുമ ചാരിറ്റബിൾ ട്രസ്റ്റ് മെംബർ സക്കറിയ ഞാവള്ളിയിൽ എന്നിവർ വിവിധ വിഷയങ്ങളിൽ ക്ലാസുകൾ നയിക്കും.
മദ്യത്തിനും മയക്കുമരുന്നിനുമെതിരേ കുട്ടികളെ ബോധവത്കരിക്കുക, ലക്ഷ്യബോധവും കലാമൂല്യവും സർഗാത്മക ചിന്തകളും ഉയർത്തി സമൂഹത്തിനും രാജ്യനന്മയ്ക്കും ഉപകരിക്കുന്ന വിധത്തിൽ കുട്ടികളെ രൂപപ്പെടുത്തുക, മികച്ച മാധ്യമ സംസ്കാരവും മികച്ച നേതൃപാടവവുമുള്ള കുട്ടികളായി വളർന്നു വരുന്നതിന് സഹായിക്കുക എന്നീ ലക്ഷ്യത്തോടെയാണ് പരിപാടി സംഘടിപ്പിച്ചിരിക്കുന്നത്. വിവിധ സ്കൂളുകളിലെ റേഡിയോ 90 ക്ലബ് ഭാരവാഹികളും ഡിസിഎൽ ഭാരവാഹികളുമായ കുട്ടികൾക്കാണ് ലീഡേഴ്സ് ട്രെയിനിംഗ് നടത്തപ്പെടുന്നത്.
ട്രെയിനിംഗിന്റെ ഭാഗമായി റേഡിയോ 90 എഫ്എം ടീമിന്റെ ഐസ് ബ്രേക്കിഗ് സെഷൻസും ഒപ്പം കുട്ടികൾക്ക് റേഡിയോ നിലയം സന്ദർശിക്കുന്നതിനും സൗകര്യമുണ്ടായിരിക്കും. ട്രെയിനിംഗ് പ്രോഗ്രാമിൽ പങ്കെടുക്കുന്ന കുട്ടികൾക്ക് ഉച്ചഭക്ഷണം ഉണ്ടായിരിക്കുന്നതാണ്.