പഴയങ്ങാടി: പുതിയങ്ങാടി കടപ്പുറത്തിന് സമീപം മണ്ണെണ്ണ വിളക്കിൽനിന്ന് തീപടർന്ന് വയോധികൻ പൊള്ളലേറ്റ് മരിച്ചു. തിരുവനന്തപുരം സ്വദേശിയായ ഏണസ്റ്റ് (85) ആണ് മരിച്ചത്. 40 വർഷമായി പുതിയങ്ങാടിയിലെ കടപ്പുറത്തിന് സമീപമുള്ള വൈദ്യുതിയില്ലാത്ത ഒറ്റമുറിയിലായിരുന്നു താമസം.
വൈദ്യുതി ഇല്ലാത്തതിനാൽ മണ്ണെണ്ണ വിളക്ക് കത്തിച്ചുവച്ചിരുന്നു. ഇതിൽനിന്ന് തീപടർന്ന് അപകടം സംഭവിച്ചതെന്നാണ് പ്രാഥമിക നിഗമനം. ഇന്നലെ പുലർച്ചയ്ക്ക് ഒന്നോടെ റൂമിൽനിന്ന് പുകയും തീയും പടരുന്നതുകണ്ട നാട്ടുകാർ പോലീസിൽ വിവരം അറിയിക്കുകയായിരുന്നു. പഴയങ്ങാടി പോലീസ് സ്ഥലത്ത് എത്തുമ്പോഴേക്കും ഏണസ്റ്റ് മരിച്ചിരുന്നു.