കണ്ണൂർ: മംഗളൂരുവിലെ ബിപിസിഎൽ, ഹിന്ദുസ്ഥാൻ പെട്രോളിയും, ഐഒസി പ്ലാന്റുകളിൽ നിന്ന് പാചക വാതക സിലിണ്ടറുകൾ എത്തിക്കുന്ന ലോറി ഡ്രൈവർമാരുടെ അനിശ്ചിതകാല സമരം തുടരും.
കണ്ണൂര് ജില്ലാ ലേബര് ഓഫീസര് സി. വിനോദ്കുമാറിന്റെ മധ്യസ്ഥതയില് വിളിച്ചുചേർത്ത ചർച്ചയിൽ ബിപിസിഎല്, എച്ച്പിസി എന്നീ കമ്പനി പ്രതിനിധികളും ട്രാന്സ്പോര്ട്ടേഷന് കരാറുകാരും യോഗത്തില് പങ്കെടുത്തില്ല. ഇതേതുടർന്ന് ചർച്ച നിർത്തിവച്ചു. ഇന്ന് കണ്ണൂർ ജില്ലാ കളക്ടറുടെ നേതൃത്വത്തില് വീണ്ടും ചര്ച്ച നടക്കും.
കഴിഞ്ഞ ദിവസം മംഗളൂരു ഹിന്ദുസ്ഥാന് പെട്രോളിയം പ്ലാന്റില് നിന്നുള്ള ട്രക്ക് ഡ്രൈവര്മാരെ കമ്പനി അധികൃതര് ബുധനാഴ്ച ചര്ച്ചയ്ക്ക് വിളിച്ചിരുന്നു. എന്നാല്, ചര്ച്ച തീരുമാനമാകാതെ പിരിയുകയായിരുന്നു. സമരം തുടരുന്ന സാഹചര്യത്തിൽ പാചക വാതക ഏജന്സികളുടെ ഗോഡൗണുകളിലെല്ലാം സിലിണ്ടര് കാലിയായ അവസ്ഥയാണ്. ചേളാരി ഐഒസി എല്പിജി ബോട്ട്ലിംഗ് പ്ലാന്റില് നിന്ന് സിലിണ്ടർ ലോഡുകള് ജില്ലയിലേക്ക് അയക്കുന്നതും പൂര്ണമായി നിര്ത്തിയിട്ടുണ്ട്. ബുക്ക് ചെയ്ത് ദിവസങ്ങളായിട്ടും ഗ്യാസ് ലഭിച്ചില്ലെന്ന് പറഞ്ഞ് ഗ്യാസ് ഏജന്സികളിലേക്ക് ഒരേ ഫോണ് വിളികളാണ്. പുതുക്കിയ വേതനക്കരാര് നടപ്പാക്കാത്തതില് പ്രതിഷേധിച്ചാണ് മംഗളൂരുവിലെ ബിപിസിഎല്, ഹിന്ദുസ്ഥാന് പെട്രോളിയം, ഐഒസി പ്ലാന്റുകളില് നിന്ന് പാചകവാതക സിലിണ്ടറുകളെത്തിക്കുന്ന ലോറി ഡ്രൈവര്മാര് സമരം തുടങ്ങിയത്.