കേളകം: കംപ്യൂട്ടർ ന്യൂമറിക്കൽ കൺട്രോൾ (സിഎൻസി) സാങ്കേതിക വിദ്യയുടെ സഹായത്തോടെ ചിത്രങ്ങൾ വരയ്ക്കുന്നതിനുള്ള പുതിയ കണ്ടുപിടിത്തവുമായി കേളകം സ്വദേശിയായ പത്താംക്ലാസുകാരൻ. കേളകം സെന്റ് തോമസ് ഹയർ സെക്കൻഡറി സ്കൂളിലെ വിദ്യാർഥി ബർണാഡ് ജോഷിയാണ് കംപ്യൂട്ടർ സോഫ്റ്റ്വെയറുമായി വിവിധ ബോർഡുകൾ ബന്ധിപ്പിച്ച് ഏതു ചിത്രവും സൂക്ഷ്മതയോടെ വരച്ചെടുക്കുന്ന പുതിയ രീതി കണ്ടുപിടിച്ചത്.
ഈ പ്രോജക്ട് ബർണാർഡ് നാളെ എറണാകുളത്ത് നടക്കുന്ന ലിറ്റിൽ കൈറ്റ്സ് ക്യാന്പിൽ അവതരിപ്പിക്കും. ശാന്തിഗിരിയിലെ വേളാശേരി ജോഷി-അനു ദമ്പതികളുടെ മകനാണ് ബർണാഡ്. ശാന്തിഗിരി ഗവ. യു പി സ്കൂളിലെ രണ്ടാം ക്ലാസ് വിദ്യാർഥി ഡൊമിനിക് സഹോദരനാണ്. സ്കൂളിലെ അധ്യാപകരും ലിറ്റിൽ കൈറ്റ്സ് അംഗങ്ങളായ വിദ്യാർഥികളും ബർണാഡ് ജോഷിയെ വീട്ടിലെത്തി അഭിനന്ദിച്ചു. മുഖ്യാധ്യാപകൻ എം.വി. മാത്യു, പിടിഎ പ്രസിഡന്റ് എം.പി. സജീവൻ, ലിറ്റിൽ കൈറ്റസ് കോ-ഓർഡിനേറ്റർമാരായ പി.വി. അനൂപ് കുമാർ, ദിവ്യ തോമസ് എന്നിവരുടെ നേതൃത്വത്തിലാണ് വിദ്യാർഥികൾ എത്തിയത്.