ഇരിട്ടി: ആറളം ഫാം പുനരധിവാസ മേഖല ബ്ലോക്ക് പതിമൂന്നിലെ കരിക്കൻമുക്കിൽ കാട്ടാന ഇറങ്ങി കൃഷി നശിപ്പിച്ചു. ചൊവ്വാഴ്ച രാത്രിയാണ് സംഭവം. പുനരധിവാസ മേഖലയിലെ താമസക്കാരനായ കരിക്കന്റെയും നങ്ങയുടെയും വീട്ടുമുറ്റത്തെ തെങ്ങും വാഴകളുമാണ് ആന നശിപ്പിച്ചത്. ബ്ലോക്ക് പതിമൂന്നിലെ പ്രധാന റോഡിനോട് ചേർന്ന കരിക്കന്റെ വീട്ടുമുറ്റത്ത് ആന ഭീകരാന്തരീക്ഷം സൃഷ്ടിച്ചു. മുറ്റത്തെത്തിയ ആന കൃഷി നശിപ്പിച്ചതോടെ പ്രദേശവാസികൾ ഭീതിയിലാണ്.
നേരം വൈകിയാൽ വീടിന് വെളിയിൽ വരാൻ കഴിയാത്ത സാഹചര്യം ആണെന്ന് പ്രദേശവാസികൾ പറയുന്നു. ആറളം ഫാമിലെ കൃഷിയിടത്തിൽ നിന്ന് തുരത്തുന്ന ആനകൾ പുനരധിവാസ മേഖലയിലെ ആളൊഴിഞ്ഞ കാടുപിടിച്ച് പ്രദേശങ്ങളിൽ തമ്പടിക്കുകയും രാത്രി കാലങ്ങളിൽ പുനരധിവാസ മേഖലയിൽ വ്യാപകമായി കൃഷി നശിപ്പിക്കുന്നതും പതിവായിരിക്കുകയാണ്. കാട്ടാന ശല്യത്തിന് പരിഹാരമായി നിർമിക്കുന്ന ആന മതിലിന്റെ നിർമാണം അനന്തമായി നീളുന്നതും ആനകളുടെ ശല്യം വർധിക്കുന്നതിന് കാരണമാകുന്നു.