ചെറുപുഴ: പെരിങ്ങോം-വയക്കര പഞ്ചായത്തിലെ കരക്കാട് പയ്യന്നൂർ ബ്ലോക്ക് കർഷക ഉത്പാദക സംഘത്തിന്റെ നേതൃത്വത്തിൽ മൂല്യവർധിത ഉത്പന്ന നിർമാണ യൂണിറ്റ് പ്രവർത്തനം ആരംഭിച്ചു. പയ്യന്നൂർ ബ്ലോക്ക് ഫാം പ്ലാൻ വികസന സമീപന പദ്ധതി പ്രകാരമാണു സംഘം പ്രവർത്തനം ആരംഭിച്ചിരിക്കുന്നത്. ടി.ഐ. മധുസൂദനൻ എംഎൽഎ ഉദ്ഘാടനം നിർവഹിച്ചു.
പെരിങ്ങോം-വയക്കര പഞ്ചായത്ത് പ്രസിഡന്റ് വി.എം. ഉണ്ണികൃഷ്ണൻ അധ്യക്ഷത വഹിച്ചു. പയ്യന്നൂർ കൃഷി അസിസ്റ്റന്റ് ഡയറക്ടർ കെ. രാഖി, പയ്യന്നൂർ ബ്ലോക്ക് പഞ്ചായത്ത് വികസനകാര്യ സ്റ്റാന്റിംഗ് കമ്മിറ്റി ചെയർപേഴ്സൺ രജനി മോഹൻ, പഞ്ചായത്തംഗം ഷജീർ ഇക്ബാൽ, ചീമേനി തുറന്ന ജയിൽ കൃഷി ഓഫീസർ കെ.എൻ. അജയകുമാർ, പെരിങ്ങോം-വയക്കര കൃഷി ഓഫീസർ ടി.വി. തുഷാര, പയ്യന്നൂർ കർഷക ഉത്പാദക സംഘം സെക്രട്ടറി എം. കേശവൻ എന്നിവർ പ്രസംഗിച്ചു.