ആലക്കോട്: വത്തിക്കാനിൽ മാർപാപ്പയുടെ പൊന്തിഫിക്കൽ ഹിസ്റ്റോറിക്കൽ സയൻസ് കമ്മിറ്റി അംഗമായി മലയാളി വൈദികൻ റവ. ഡോ. ഫ്രാൻസിസ് തോണിപ്പാറയെ മാർപാപ്പ നിയമിച്ചു. അഞ്ചുവർഷത്തേക്കാണു നിയമനം. ബംഗളൂരു ധർമാരാം വിദ്യാക്ഷേത്രത്തിൽ സഭാചരിത്രത്തിൽ മുൻ അധ്യാപകനും ഇപ്പോൾ ആഫ്രിക്കയിൽ നമീബിയായിൽ അധ്യാപകനുമാണ്. സിഎംഐ സഭാംഗമായ ഫാ. തോണിപ്പാറ നേരത്തെ സിഎംഐ കോഴിക്കോട് പ്രോവിൻസ് പ്രൊവിൻഷ്യാളായി സേവനം ചെയ്തിരുന്നു. ആലക്കോട് നെല്ലിപ്പാറയിലെ തോണിപ്പാറ പരേതരായ കുര്യൻ ഫ്രാൻസിസ്-മേരിക്കുട്ടി ദന്പതികളുടെ മകനാണ്. അടുത്തമാസം വത്തിക്കാനിൽ ചുമതലയേൽക്കും.