കൊ​ര​ട്ടി: ദേ​ശീ​യ​പാ​ത ഇ​ന്ന​ലെ പുലർച്ചെ മു​ത​ൽ രാ​വി​ലെ 11 വ​രെ അ​ക്ഷ​രാ​ഥത്തി​ൽ ദു​രി​ത​പാ​ത​യാ​യി മാ​റി. ചി​റ​ങ്ങ​ര​യി​ലും മു​രി​ങ്ങൂ​രി​ലും പ്ര​ധാ​ന​പാ​ത കൊ​ട്ടി​യ​ട​ച്ച് അ​ടി​പ്പാ​ത നി​ർ​മാ​ണം ആ​രം​ഭി​ച്ച​തു മു​ത​ൽ പ്ര​ദേ​ശ​വാ​സി​ക​ൾ മു​ത​ൽ ദീ​ർ​ഘ​ദൂ​ര യാ​ത്രി​ക​ർ വ​രെ നേ​രി​ടു​ന്ന​തു ന​ര​ക​യാ​ത​ന​യാ​ണ്. ഇ​ന്ന​ലെ ക​ര​യാം​പ​റ​മ്പ് മു​ത​ൽ ചാ​ല​ക്കു​ടി പാ​ലം വ​രെ ഇ​രുദി​ശ​ക​ളി​ലും രൂ​പ​പ്പെ​ട്ട​തു മ​ണി​ക്കൂ​റു​ക​ളോ​ളം നീ​ണ്ട ഗ​താ​ഗ​ത​ക്കു​രു​ക്കാ​ണ്.

ര​ണ്ടാം ശ​നി​യാ​ഴ്ച​യാ​യ ഇ​ന്ന​ലെ മു​ത​ലു​ള്ള അ​വ​ധി​ക​ളും വി​ഷു​വും വി​ശു​ദ്ധ​വാ​ര​വും സ്കൂൾ അ​വ​ധി​ക​ളും മൂ​ലം ദേ​ശീ​യ പാ​ത​യി​ൽ പ​തി​വി​ലേ​റെ വാ​ഹ​ന​ങ്ങ​ളു​ണ്ടാ​യി​രു​ന്നു. ഗ​താ​ഗ​ത​ക്കുരു​ക്ക് രൂ​ക്ഷ​മാ​കു​മ്പോ​ൾ നി​യ​ന്ത്രി​ക്കാ​നും വ​ഴി​തി​രി​ച്ചുവി​ടാ​നും യാ​തൊ​രു സ​ന്നാ​ഹ​വും ഉ​ണ്ടാ​യി​രു​ന്നി​ല്ല. ഫ്ലാ​ഗ്‌ മാൻ​മാ​രെ വി​വി​ധ ഇ​ട​ങ്ങ​ളി​ൽ ചു​മ​ത​ല​പ്പെ​ടു​ത്തു​മെ​ന്നും അ​വ​ശ്യഘ​ട്ട​ത്തി​ൽ പോ​ലീ​സി​ന്‍റെ സ​ഹാ​യം ഉ​റ​പ്പു​വ​രു​ത്തു​മെ​ന്നും അ​ധി​കൃ​ത​ർ പ​റ​ഞ്ഞി​രു​ന്നെ​ങ്കി​ലും പാ​ഴ്‌വാ​ക്കാ​യി.

വി​വി​ധ കോ​ണു​ക​ളി​ൽനി​ന്നും സാ​മൂ​ഹ്യ മാ​ധ്യ​മ​ങ്ങ​ളി​ലൂ​ടെ​യും പ്ര​തി​ഷേ​ധം ക​ടു​ത്ത​തോ​ടെ മാ​ത്ര​മാ​ണു പ്ര​ധാ​ന ക​വ​ല​ക​ളി​ലെ​ല്ലാം പോ​ലീ​സും ഫ്ലാ​ഗ് മാന്മാ​രും എ​ത്തി ഗ​താ​ഗ​തനി​യ​ന്ത്ര​ണം ഏ​റ്റെ​ടു​ത്ത​ത്. രാ​വി​ലെ പതിനൊ ന്നോ​ടെ മാ​ത്ര​മാ​ണ് ചാ​ല​ക്കു​ടി ഭാ​ഗ​ത്തേ​ക്കു​ള്ള ഗ​താ​ഗ​തം നി​യ​ന്ത്ര​ണ വി​ധേ​യ​മാ​യ​ത്. അ​ങ്ക​മാ​ലി ഭാ​ഗ​ത്തേ​ക്കു​ള്ള പാ​ത​യി​ൽ ത​ട​സം തു​ട​ർ​ന്നു‌കൊ​ണ്ടേ​യി​രു​ന്നു. ചെ​റു​വാ​ഹ​ന​ങ്ങ​ൾ പോ​ലീ​സ് ഇ​ട​പെ​ട്ട് വ​ഴി തി​രി​ച്ചു​വി​ട്ട​തു ഒ​രു പ​രി​ധി വ​രെ കു​രു​ക്കി​ന് അ​യ​വുവ​രു​ത്തി.

എ​ന്നാ​ൽ ദി​ശാ​ബോ​ർ​ഡു​ക​ൾ സ്ഥാ​പി​ക്കു​ന്ന​തി​ൽ സം​ഭ​വി​ച്ച വീ​ഴ്ചമൂ​ലം മ​റു​വ​ഴി തേ​ടി​യ​വ​ർ ല​ക്ഷ്യ​സ്ഥാ​ന​ത്തേ​ക്കു​ള്ള ദി​ക്ക് അ​റി​യാ​തെ ക​ഷ്ട​പ്പെ​ട്ടു. ചി​റ​ങ്ങ​ര​യി​ലും മു​രി​ങ്ങൂ​രി​ലും അ​ടി​പ്പാ​ത നി​ർ​മാ​ണം പൂ​ർ​ത്തി​യാ​യശേ​ഷം മാ​ത്ര​മേ കൊ​ര​ട്ടി​യി​ലെ നി​ർ​മാ​ണ​ത്തി​നാ​യി പ്ര​ധാ​ന‌പാ​ത അ​ട​യ്ക്കാ​വൂ എ​ന്ന ശ​ക്ത​മാ​യ ആ​വ​ശ്യം ഉ​യ​രു​ന്നു​ണ്ട്. കൊ​ര​ട്ടി​യും കൂ​ടി നി​ർ​മാ​ണ​ങ്ങ​ൾ​ക്കാ​യി കൊ​ട്ടി​യ​ട​ച്ചാ​ൽ നി​യ​ന്ത്ര​ണാ​തീ​ത​മാ​കും എ​ന്ന​താ​ണു യാ​ഥാ​ർ​ഥ്യം.

മു​ന്നൊ​രു​ക്ക​ങ്ങ​ളി​ല്ലാ​ത്ത നി​ർ​മാ​ണ പ്ര​വൃ​ത്തി​ക​ൾമൂ​ലം ദു​രി​ത​ത്തി​ലാ​കു​ന്ന​ത് സാ​ധാ​ര​ണ ജ​ന​ങ്ങ​ളാ​ണ്. എ​ന്നാ​ൽ ജ​ന​പ്ര​തി​നി​ധി​ക​ളു​ടെ ഭാ​ഗ​ത്തുനി​ന്നോ രാ​ഷ്ട്രീ​യ പാ​ർ​ട്ടി സം​വി​ധാ​ന​ങ്ങ​ളി​ൽ നി​ന്നോ ഇ​തി​ന് പ​രി​ഹാ​രം കാ​ണാ​ൻ ഇ​ട​പെ​ട​ലു​ണ്ടാ​കു​ന്നി​ല്ല എ​ന്ന ഗു​രു​ത​ര​മായ ആ​ക്ഷേ​പ​മാ​ണ് ജ​ന​ങ്ങ​ൾ​ക്കു​ള്ള​ത്. ഗ​താ​ഗ​തക്കുരു​ക്കി​ൽ‌പെ​ട്ട് മ​ണി​ക്കൂ​റു​ക​ളോ​ളം വ​ല​യു​ന്ന യാ​ത്രി​ക​രി​ൽനി​ന്നും ടോ​ൾ പി​രി​ക്കു​ന്ന ന​ട​പ​ടി വി​രോ​ധാ​ഭാ​സ​മാ​ണെ​ന്നും താ​ത്കാലി​ക​മാ​യി ടോ​ൾ നി​ർ​ത്തി​വ​യ്ക്ക​ണ​മെ​ന്നും ജ​ന​ങ്ങ​ൾ​ക്കി​ട​യി​ൽ ആവശ്യം ശ​ക്ത​മാ​ണ്.

ഈ ​പു​ഴ​യും ക​ട​ന്ന്...

കൊ​ര​ട്ടി: ചി​റ​ങ്ങ​ര ജം​ഗ്ഷ​നി​ൽ കാ​ൽ​ന​ട യാ​ത്രി​ക​ർ​ക്കു ദേ​ശീ​യ​പാ​ത​ക്ക് കു​റു​കെ ക​ട​ക്കാ​ൻ ഇ​നി അ​ര കി​ലോ​മീ​റ്റ​റെ​ങ്കി​ലും താ​ണ്ട​ണം. തി​രു​മു​ടി​ക്കു​ന്ന് റോ​ഡി​ലു​ള്ള​വ​ർ​ക്ക് റെ​യി​ൽ​വേ മേ​ൽ​പ്പാ​ലം ഭാ​ഗ​ത്തേ​ക്കും അ​തു​പോ​ലെ തി​രി​ച്ചും സ​ഞ്ച​രി​ക്ക​ണ​മെ​ങ്കി​ൽ ഇ​താ​ണ് സ്ഥി​തി. അ​ടി​പ്പാ​ത​ക്ക് ഇ​രു​ഭാ​ഗ​വും പ്രി-​കാ​സ്റ്റ് കോ​ൺ​ക്രീ​റ്റ് റീ​റ്റെ​യി​ൻ വാ​ൾ സ്ഥാ​പി​ക്കു​ന്ന​തി​നാ​യി നാ​ലു​ഭാ​ഗ​ത്തും കു​ഴി​യെ​ടു​ത്ത​താ​ണ് ഇ​തി​ന് കാ​ര​ണം.

ഒ​രു ഭാ​ഗം കു​ഴി​യെ​ടു​ത്ത് ഇ​വ സ്ഥാ​പി​ച്ച​ശേ​ഷം മ​റു​ഭാ​ഗം പൊ​ളി​ക്കാ​വൂ എ​ന്ന നാ​ട്ടു​കാ​രു​ടെ നി​ർ​ദേശം മു​ഖ​വി​ല​ക്കെ​ടു​ക്കാ​തെ‌യാ​ണ് ക​രാ​ർ ക​മ്പ​നി​യു​ടെ ന​ട​പ​ടി. പ്ര​തി​ഷേ​ധം ശ​ക്ത​മാ​യ​തോ​ടെ ക​ഴി​ഞ്ഞ ദി​വ​സം നി​ർ​മി​ച്ച അ​ടി​പ്പാ​ത​യു​ടെ ബേ​സ്മെ​ന്‍റിൽ ക്യൂ​റിം​ഗി​നാ​യി നി​റ​ച്ചി​ട്ട വെ​ള്ള​ത്തി​നു മു​ക​ളി​ൽ പ​ല​ക​യി​ട്ട് ന​ട​പ്പാ​ത ഒ​രു​ക്കി​യി​രി​ക്കു​ക​യാ​ണ് ക​രാ​ർ ക​മ്പ​നി ജീ​വ​ന​ക്കാ​ർ. അ​ടി​പ്പാ​ത​യു​ടെ പാ​ർ​ശ്വ​ഭി​ത്തി​ക​ളും മു​ക​ളി​ലെ സ്ലാ​ബും കോ​ൺ​ക്രീ​റ്റ് ചെ​യ്യു​മ്പോ​ൾ ഏ​തു‌വ​ഴി സ​ഞ്ച​രി​ക്കു​മെ​ന്ന​റി​യാ​തെ ആ​ശ​യ​ക്കു​ഴ​പ്പ​ത്തി​ലാ​ണ് നാ​ട്ടു​കാ​ർ.