സ്കൂൾ പാചക ജീവനക്കാർക്ക് പാചക മത്സരം
1464191
Sunday, October 27, 2024 1:43 AM IST
വാഴക്കുളം: സ്കൂൾ പാചക തൊഴിലാളികൾക്കായി പാചക മത്സരം നടത്തി. പൊതുവിദ്യാഭ്യാസ വകുപ്പിന്റെ ഉച്ചഭക്ഷണ പദ്ധതിയുമായി ബന്ധപ്പെട്ട് കല്ലൂർക്കാട്, പിറവം ഉപജില്ലകളിലെ സ്കൂളുകളിലെ പാചക വിഭാഗത്തിലെ ജീവനക്കാരുടെ പാചക മത്സരമാണ് സംഘടിപ്പിച്ചത്. വാഴക്കുളം സെന്റ് ലിറ്റിൽ തെരേസാസ് ഹൈസ്കൂളിൽ നടത്തിയ മത്സരം ബ്ലോക്ക് പഞ്ചായത്ത് പ്രസിഡന്റ് കെ.ജി. രാധാകൃഷ്ണൻ ഉദ്ഘാടനം ചെയ്തു.
കല്ലൂർക്കാട് ഉപജില്ലാ വിദ്യാഭ്യാസ ഓഫീസർ കെ.എം. രാജേഷ്, പിറവം ഉപജില്ലാ വിദ്യാഭ്യാസ ഓഫീസർ എം.പി. സജീവ്, പി. റേച്ചൽ ജോർജ്, കെ.കെ. സുരേഷ് ബാബു, സിസ്റ്റർ മെറിൻ, മോളി ജോൺ, അരുൺ, അമൽ ടോമി, കെ.ആർ. രശ്മി എന്നിവർ പ്രസംഗിച്ചു.
രണ്ടു ഉപജില്ലകളിൽനിന്ന് നടത്തിയ മത്സരത്തിൽ 11 പാചക തൊഴിലാളികൾ പങ്കെടുത്തു. കല്ലൂർക്കാട് ഉപജില്ലയിൽനിന്നും മരുതൂർ പിയുപി സ്കൂളിലെ സിനി ഷിബു ഒന്നാം സ്ഥാനവും വാഴക്കുളം സെന്റ് ലിറ്റിൽ തെരേസാസ് ഹൈസ്കൂളിലെ സ്റ്റെല്ല ബിജു രണ്ടാം സ്ഥാനവും വാഴക്കുളം ഇൻഫന്റ് ജീസസ് ഹൈസ്കൂളിലെ പെണ്ണമ്മ വിൻസെന്റ് മൂന്നാം സ്ഥാനവും കരസ്ഥമാക്കി.
പിറവം ഉപജില്ലയിൽനിന്നു ജിഎച്ച്എസ് പിറവം സ്കൂളിലെ ലീല രവി ഒന്നാം സ്ഥാനവും നാമക്കുഴി ജിഎൽപിഎസ് സ്കൂളിലെ ഗിരിജ ശ്രീധരൻ രണ്ടാം സ്ഥാനവും കളമ്പൂർ ജിയുപിഎസ് സ്കൂളിലെ സുലോചന ഹരിദാസ് മൂന്നാം സ്ഥാനവും കരസ്ഥമാക്കി.