ആശുപത്രിയിലെ സംഘർഷം: സിപിഎം ഏരിയ സെക്രട്ടറിയടക്കം 20 ഓളം പേർക്കെതിരേ കേസ്
1463422
Thursday, October 24, 2024 1:18 AM IST
തോപ്പുംപടി: കരുവേലിപ്പടി സർക്കാർ ആശുപത്രിയിൽ കെഎസ്യു-എസ്എഫ്ഐ വിദ്യാർഥികൾ തമ്മിൽ നടന്ന സംഘർഷത്തിൽ സിപിഎം കൊച്ചി ഏരിയ സെക്രട്ടറി കെ.എം. റിയാദ് ഉൾപ്പെടെ 20 ഓളം പേർക്കെതിരേ പോലീസ് കേസെടുത്തു. കെഎസ്യു വിദ്യാർഥികളായ അൽ അമീൻ, മുഹമ്മദ് നഫീദ്, റിസ്വാൻ എന്നിവരുടെ പരാതിയിലാണ് കേസ്.
20 ഓളം പേർ സംഘം ചേർന്ന് കെഎസ്യു വിദ്യാർഥികളെ ആശുപത്രിയിൽ കയറി മർദിച്ചതായാണ് പരാതി. ആശുപത്രിയിലെ ഗ്ലാസ് ഡോർ തല്ലിത്തകർക്കുകയും ആശുപത്രി വാർഡിലെ രോഗികൾക്ക് നേരെ ബഹളം വെക്കുകയും ചെയ്തതിന് ആശുപത്രി അധികൃതരുടെ പരാതിയിലും കണ്ടാലറിയാവുന്ന 20 ഓളം പേർക്കെതിരേ കേസെടുത്തിട്ടുണ്ട്.
പോലീസ് ഉദ്യോഗസ്ഥരെ അക്രമിക്കുകയും കൃത്യനിർവഹണം തടസപ്പെടുത്തുകയും ചെയ്തെന്ന തോപ്പുംപടി എസ്ഐ പി. ഷാബിയുടെ പരാതിയിലും കണ്ടാലറിയാവുന്ന 20 ഓളം പേർക്കെതിരെ കേസെടുത്തിട്ടുണ്ട്.