ആലുവയിൽ കെഎസ്ആർടിസി യാത്രക്കാർ ദുരിതത്തിൽ
1463726
Friday, October 25, 2024 2:22 AM IST
ആലുവ: പ്രൈവറ്റ് ബസ് സ്റ്റാൻഡിന് മുന്നിൽ ബസ് സ്റ്റോപ്പ് നിരോധിച്ചതോടെ പറവൂർ, അങ്കമാലി മേഖലയിലേക്ക് പോകേണ്ട യാത്രക്കാർ ദുരിതത്തിൽ. പോലീസ് നിർദേശപ്രകാരം കഴി ഞ്ഞദിവസം മുതലാണ് കെഎസ്ആർടിസി ബസുകളുടെ സ്റ്റോപ്പ് ട്രാഫിക് പോലീസ് നിരോധിച്ചത്.
മുനിസിപ്പൽ ബസ് സ്റ്റാൻഡിന് മുമ്പുള്ള കാരോത്തുകുഴി ജംഗ്ഷൻ സ്റ്റോപ്പിലേക്കോ അതിനു ശേഷമുള്ള ബാങ്ക് ജംഗ്ഷനിലേക്കോ നടന്നാൽ മാത്രമേ ഇനി കെഎസ്ആർടിസി ബസുകളിൽ കയറാനാകൂ. സമീപത്തെ ഈ ബസ് സ്റ്റോപ്പുകളിലെത്താൻ.
യാത്രക്കാർക്ക് അര കിലോമീറ്ററോളം നടക്കേണ്ടി വരും. അങ്കമാലി, പറവൂർ മാത്രമല്ല പെരുമ്പാവൂർ കെഎസ്ആർടിസി റൂട്ടിലേക്കുള്ള ബസുകളും ഇവിടെ നിർത്തിയിരുന്നതാണ്.
മുനിസിപ്പൽ ബസ് സ്റ്റാൻഡിന് സമീപത്ത് ബസാർ പോസ്റ്റ് ഓഫീസിന് മുന്നിൽ നേരത്തേ ഉണ്ടായിരുന്ന ബസ് സ്റ്റോപ്പ് നിർത്തിയ ശേഷമാണ് ബസ് സ്റ്റാൻഡിന് മുന്നിൽ കെഎസ്ആർടിസിബസുകൾക്ക് സ്റ്റോപ്പ് അനുവദിച്ചത്. കോവിഡ് കാലം കഴിഞ്ഞതോടെയാണ് കെഎസ്ആർടിസി ബസുകൾക്ക് സ്റ്റോപ്പ് ലഭിച്ചത്.
ട്രാഫിക് തടസം ഉണ്ടാകാതിരിക്കാനാണ് സ്റ്റോപ്പുകൾ നിർത്തിയതെന്നാണ് പോലീസ് പറയുന്നത്. എന്നാൽ ബസ് സ്റ്റാൻഡിന് മുന്നിൽ തന്നെ പുതിയതായി രൂപം കൊണ്ട ഓട്ടോ സ്റ്റാൻഡിന് മാറ്റമില്ല. നടപ്പാത കൈയേറിയാണിവിടെ ഓട്ടോസ്റ്റാൻഡ് പ്രവർത്തിക്കുന്നത്. ഓട്ടോ സ്റ്റാൻഡ് മാറ്റിയാൽ ബസുകൾക്ക് നിർത്താൻ സ്ഥലം ലഭിക്കുമെന്ന് യാത്രക്കാർ പറയുന്നു.